【幽默】乱噏廿肆23
阿庆揾到钱喺广州河南市二宫附近买咗屋。装修咗两个几月，工人撤场。阿庆返到光明路叫上班兄弟到新屋搞卫生，装裱粉饰新房。用8万文买嘅一栋上下两层旧楼房，占地面积六十四平方，地下做商铺，二楼间成四个房，有两间俾阿庆结婚住。阿庆乡下有间大厂房，似乎对有无两间房不以为意。人有本事，有咗经济能力，处世态度往往喺世人趋之若鹜嘅财富前，表现出漫不经心嘅随意，令人觉得潇洒。一帮兄弟嘈嘈吵吵熬咗两晚深夜布置新房，大家都攰到不得了。
阿庆哩次系返广州结婚，班小兄弟听到内心都有一种感触，好特别讲唔出嚟。阿庆有今时今日大家并唔觉得奇怪，感到理所当然，佢系最早出嚟摆街做个体户，但系大家总觉得嚟得太快，嚟得好突然咁，先24岁，大家仲觉得自己未玩够嘅时候佢已经话要结婚，一下子，大家都觉得自己变咗成年人。当然个个都系非常为阿庆开心嗝，因为系第一个结婚，啯日肯定会好好玩，个个都相约要尽兴大醉方休。
但阿庆并唔似大家咁高兴，睇落心事重重。阿飞就更觉得自己可悲得多，阿庆已经结婚自己拖都未拍过。
过二日就系阿庆大喜日子，一班人借意日日聚会赌钱，赢啯个请食姜葱白切鸡。时下广州潮流兴食鸡，多数餐馆都标榜白切鸡系菜馆嘅撚手菜，间间都话系正宗清远鸡，最出名有清平饭店清平鸡，坚记面店隔离嘅同记鸡，洪寿餐馆洪寿鸡等等。由年头已经开始兴起，佢哋每晚宵夜落嚟至今计有百鸡落肚。阿飞晚晚熬夜赌钱宵夜，健身练唔成却日渐肥胖，体型劣变。曾经下决心戒口唔再食，但点敌得过鸡香飘逸，回味无穷。唯有赞叹啲整鸡师傅技术高超，整出嚟啲白切鸡，鸡香浓郁，鸡肉爽滑离骨，食落口啖啖肉，啯碗姜蓉葱汁更香口过啲鸡，令人欲罢不能。几日落嚟成班人精神恍惚，疲惫不堪，竟然无人提帮阿庆做礼嘅事。后来仲系阿飞的起心肝，自己攞住钱出嚟去玻璃铺订咗块大水银镜，将成班人啲名刻嗮上去，算做贺礼。
结婚前一晚，大头民，阿飞，阿唐，华仔四个先将大家嘅贺礼送去新屋：一块大水银镜，一串二万头大炮仗，四支金奖白兰地。一共用咗180文，众人分摊。大头民家阵放撇做人，唔要面，唔俾钱。其他人话阿飞偏心，明知大头民无钱仲刻埋佢个名上块镜，宜家又要大家分摊埋佢份。阿飞有口难言，情义所在，实在难做，觉得朋友之间现实多咗情谊少咗。四个人啱摆低贺礼，做兄弟戥穿石嘅其他人陆续到齐，大家即刻开台打麻将欢度前夜。
半夜正点摆新房，阿飞兴高采烈，一副跃跃欲试嘅样。大威偷偷嚟到佢身边讲，阿庆嘅老窦老母怪佢家庭唔全，唔中意佢喺度帮手摆新房。阿飞一下子受到好大打击，心底冰透，好似受到奇耻大辱：“我这不成了祥林嫂？”。好彩佢仲硬铮识得装作若无其事，默默退咗出去。但留喺度摆新房嘅都唔系几好受，阿庆嘅老窦老母指挥住众人，稍有啲反应慢就俾佢两公婆奚落，搞到个个面懵懵，场面好难堪。大家过后都话有咗钱啲暴发户系咁嗝啦，尤其系个种所谓从无到有嘅白手兴家，个个都白鸽眼睇人，心底非常仇视自己嘅过去，所以特别睇人唔起，大家只有苦笑置之。阿庆感到各人唔高兴就同佢父母嘈起上嚟，仲破口大骂，大家只好又转做和事佬。
第二日结婚日子，通宵赌完钱班人去附近嘅茶楼饮茶。新郎哥阿庆吩派各人要做嘅嘢：边个去买炮仗，边几个去街口接婚车，顺便要大家返屋企冲凉换衫，中午11点前返齐新屋。阿飞心情唔好，翻到屋企大觉瞓。辞差，韦明几个无走，留低新房赌钱，将近11点辞差赢咗200文兴高采烈返嚟光明路叫醒阿飞一齐揾埋大威去接婚车。6月中旬正系广州最潮热嘅时候，天气由闷热转炎热之际，汗水不停咁渗出嚟，令人好唔舒服。大家接到花车开去茶楼，陪司机食完饭，开入巷里面新屋楼下，十个兄弟一齐动手布置婚车，糍上彩花，披上彩带。抓相机嘅，扐炮仗嘅，攞利是嘅，一切准备好嗮，花车喇叭一响奔赴女家而去。
新娘子家玲屋企就喺光明路青年路口，佢同阿飞个细佬系同学。全部人第一次做啲咁角色，咩嘢都蒙查查。先一先，大家被挡喺楼下大门口，大头民，大威，几个老成嘅隔门同啲姊妹嘈咗一阵互不相让，对恃咗好耐，艰难上到楼梯口，又俾班姊妹挡喺屋门口，楼梯地方窄小，闷热难耐。哩班姊妹非常刁挑扭拧，伴郎大威啲招数都出尽嗮，新郎哥阿庆差啲就要反面，兄弟们只好妥协俾999文大利是入门，成班人嬲爆爆，木口木面个个想打交咁。
新娘花枝招展唔在讲，只喺觉得个妆浓过头，无平时见佢咁靓。身边班姊妹就唔同嗮，十八年华， 淡妆素雅，个个青春貌美。其中有个系曲艺团嘅茶座歌手，喺宜家好时兴嘅音乐茶座专门唱林姗姗啲歌表演，十分青春可人，不过同时十分嚣张，指冬瓜画葫芦老点啲兄弟，独个嚟评头品足把口唔修。大威，大头民，阿唐，华仔，辞差，阿荣围嗮埋班女仔度，阿飞本来就自命清高，宜家哩啲全部都系细佬啲女同学就更加唔埋去，一边揾茶饮解渴去，惗计炮制啲姊妹。成屋人热闹咗无几耐，司机就上嚟催，咁就簇拥住一对新人落楼，鞭炮齐鸣开路，男男女女纷纷上车而去。喺车上听到有经验嘅司机讲唔系咁接新娘嘅，咁样唔好玩。后嚟听讲啲姊妹都系第一次，大家糊里糊涂令到气氛鬼咁紧张。
缤纷嘅彩车经青年路，宝华路，大同路，过人民桥从同福路返去。新居门前红联高挂，金字红纸：幸有香车迎淑女，愧无美酒献佳人。门额双喜，礼炮轰鸣。新娘被阿庆家人迎咗上楼，之后就系饮茶行礼，各人相互影相，哩个时候大头民哋注意到阿庆嘅兄弟姐妹相继离去唔受茶礼。
留低伴郎大威等阵同新人回门，成班兄弟去“刀豆树”楼上阿飞屋企玩啤牌赌钱，差唔多够钟就去到上九路口嘅穗康酒楼八楼饮喜酒。婚礼酒席筵开20围，客人迟迟而到，除咗伴郎大威，对伴娘十分在意嘅辞差陪新郎新娘喺酒楼门口迎宾外，个个都瘫软喺大堂嘅沙发度，议论大头民失恋，对啲姊妹起嗮痰，唔俾阿飞佢哋掟啲炮仗落姊妹度出返啖怨气，又同啲姊妹讲大家计划伤害佢哋大献殷勤，搬弄是非。
慢慢大家发现一啲反常嘅现象：唔见阿庆老窦老母喺度迎宾，无影无踪。阿庆最细嘅弟弟，偷咗几张枱上嘅香烟未开席就离开。个妹妹接住又嚟攞烟，未开席仲擅自叫酒水同佢自己班朋友劈酒，好彩阿庆老窦及时赶嚟阻止。阿庆啲亲朋戚友嚟到无人招呼。好在荷包蛋，华仔，阿唐一班兄弟仲识得下做。阿庆个亲家姐，姐夫干坐喺一旁，自顾自斟自饮谈天说地，根本毫不理嘢。其实早几日问佢个细佬阿庆摆几围，佢就发脾气话乜都唔知，仲恶毒到咒个细佬无仔生，
好唔容易酒宴开席，新郎新娘开始敬酒，一班兄弟相陪跟随。到度阿庆个妹阿琼围台，佢放枝筷子落个啤酒樽里面要个新大嫂饮，阿庆唔睬佢，佢个妹恶意刁难，几经纠缠差啲出手打起嚟。荷包蛋，大威慌忙拉开先无事，点知佢个妹仲一啲面都唔俾，对班兄弟讲啲难听嘅嘢：“边个边个好眉好貌生沙虱，成块閪咁。嗰个哩个担屎都唔识偷食，成碌七咁。”，阿飞当场话不如干脆先打返场交吧。
一部分人见到咁，未饮心抱茶就走了，有一围完全走清光，搞到啯婚礼场面好难睇。阿庆个表弟韦明，哩个最适合做和事佬嘅人唔知做咩成晚都缩埋一，二角唔见人。到得上糖水点心面食嘅时候，成个婚宴绝大部分人都走光嗮，急到阿庆老窦大叫大骂，四围截人拦人成个小丑咁。酒席上好多食物郁都未郁过，哩场豪华婚礼真系难睇又难堪。
大家兄弟同新郎新娘约咗过后再见，齐齐去五羊城酒楼饮茶，八卦今晚婚礼上啲怪事。好似话系自从屋企有咗钱买屋之后，对阿庆两公婆住喺一家人辛苦买返嚟嘅新屋唔高兴，成班细佬妹对仲住翻喺光明路间旧屋有意见。佢个妹好蹿，最近喺街见到，身边总有三几个呤仔傍住。阿庆个老窦认钱唔认人，宜家阿庆开厂揾大钱，就偏向个仔，家庭矛盾越发激烈，今晚就借机全面爆发。大家讲咁嘅形势，早应该唔摆酒，旅行结婚算了，返嚟同大家食餐饭，免咗今晚哩场闹剧。大威讲：“好难嘅，屋企好多嘢阿庆话唔到事嗝。”
第一个嘅结婚就喺一出家庭六国大封相中落幕。阿飞就好替新娘子家玲惋惜担忧，以后仲唔知要点面对老公嘅家庭，嫁个有钱老公都有许多要付出，有好多值得深思熟虑。
未会逢门依罗香，
拟托良媒亦自伤。
不识风流高格调，
共怜时势俭梳妆。
敢把十指夸手巧，
没将眼眉斗画长。
可恨年年压金线，
为他人作嫁衣裳。
