【幽默】乱噏廿肆32
70年代革命风潮极盛，系个非黑即白嘅年代，人们从细基本恪守男女授受不亲清规戒律，男同学绝对唔同女同学玩，每张男女同桌嘅书台上都刻画住界限分明嘅三八线。
明兴里小学毕业到宜家刚好过去10个年头。哩晚，几个住光明路嘅女同学相聚，谈起过往，说到现在。
“我哋嗰个年代真傻，唔同男同学玩。”
“系啊，女仔是非又多，好难玩得埋。”
“男仔佢哋就无咁多事，宜家有时仲见到佢哋成群结队玩埋一大班人。”
“阿边个边个佢哋仲住喺光明路啊。”突然毫无先兆咁心血来潮，“够唔够胆今晚逐个去男同学屋企坐啊喇？”
“好啊，去咪去，去傻一晚。”女同学忘记唔到被时代压抑咗，藏喺心底嘅情感。女仔情谊长，无男仔咁无心肝，容易抽离得到。
就系咁傻，当晚哩班小学女同学一家家去串联10年前从无来往嘅男同学屋企。第一个搵到女人头，可能系佢读书时最乖，最淋善，亦可能神高神大只衰仔当年入错女厕所，女同学见到无出声，抓到佢鸡脚，宜家记返起佢臭事，容易埋手。跟住哩晚，几个女同学由女人头出卖横扫光明路，六甫水脚一带男同学屋企。老道，老懵，阿飞，阿肥，尤榄相继沦陷，家家被光顾。当女同学们嘻哈大笑上到全班最调皮捣蛋阿飞屋企，阿飞感觉真系有如细佬突然起头——出鸠旗。大家都话惗唔到有哩一日，革命年代同窗6年未讲过说话，未打过招呼。
女同学上到老道屋企时，茹女都喺度。老道一家，人口多生活艰难，佢阿妈长年从单位接啲纸盒返嚟粘，动员全家做，帮补生活，茹女拍拖以嚟亦自动加入粘纸盒大军。女同学上到嚟，老道同阿飞一样惊讶，其中仲有个小学就喺佢度学习小组嘅淑珊，两个讲起曾偷咗佢屋企嘅工业品薄搞到老道老窦铁线钉都买唔到嘅趣事，开心到不得了。茹女心里面唔系滋味，觉得今晚男朋友特别高兴。
旧同学重逢比初相识容易熟络，毕竟同学关系系一种好特别嘅缘分，茹女心中不快仲未缓过神。隔两晚，女人头又带女同学入村，哩次女同学人数仲多几个，上到老道屋企搵位落座都无地方，要坐到去隔离同屋住昌叔个厅度。原来系有个女同学个妹生日开舞会，时下社会开放，年轻人都好时髦跳舞，邀请全班男同学参加，借意嚟个小学同学大聚会，要老道负责通知其他男同学。
对于男女同学聚会，阿飞唔多感兴趣，觉得自己从未离开过班同学，佢哋十几个男同学随时随地都经常相聚。女同学以前授受不亲，宜家打破隔阂都几好，就无好特别感觉。老道就热衷得多，唔知系咪临近结婚心情压抑或者性格使然，可能淑珊勾起佢过去许多美好回忆。女同学走后即刻抛低茹女陪屋企人粘纸盒，同女人头落街通知隔离老懵，斜对面阿飞，安排佢通知阿唐，佢两个系结拜兄弟。接住到六甫水脚搵阿肥，啱好同街嘅尤榄听到同楼住个女同学通知，事先已经知道，出嚟搵大家。大家不约而同就话不如我哋男同学先聚一聚，去西河冲口人民路食狗肉宵夜，仲叫埋大家都识嘅华仔，当晚一班人饮酒食狗肉直到凌晨3点。华仔酒后吐真言，透露大头民个大妈介绍咗个好女仔俾佢，已经拍紧拖。老道交带尤榄负责通知大队长，尤榄连煲里面啲狗汁都饮光先肯走，仲要大家跟埋饮，话好补肾：“我心口上啲毛就系补返嚟嘅。”个个酩酊大醉。
哩晚太夜，茹女唔敢返自己屋企，留喺老道阁楼过夜，成晚惊住男朋友个弱智大佬，无办法瞓得着，因为大佬目不转睛望咗佢一整晚。
青年路街道文化站，明兴里小学男女同学齐聚，参加女同学个妹生日舞会。老道，老懵，女人头，尤榄，阿飞，阿肥，阿唐，大队长，阿鸡，人强马壮。女同学都嚟咗唔少，男同学人一多马上就原形毕露，回复返嗮10年前啲调皮捣蛋，口无遮拦。女同学就唔见嗮大串联嗰晚嘅轻狂，又变返腼腆害羞。茹女哩晚都跟男朋友嚟，一见阿飞就抱怨投诉：有日佢喺老道屋企粘纸盒，有个人贼眉贼眼上楼嚟哎老道落街，喺门口大树脚吱吱囎囎。过后老道话系阿飞啲老友。“边个啊？”阿飞好惊奇。
“大头民咯！失惊无神走上嚟问我借100文。”老道讲。
“咁你有无借俾佢？”
“我边有咁多钱借，你快柒脆啲搞掂你个结拜大佬。”
阿肥旁边听度，亦抢住嚟讲：“嗰日喺六甫水脚公厕疴紧屎，见到大头民，又系埋嚟问借钱。”
茹女话：“哩个系咩人嚟嗝？阿飞你识埋啲咩大佬啊。”从口气中听得出佢当时几担心自己男朋友识咗坏人。阿飞，阿唐两个对望一眼，会意咁摇摇头，大头民骚扰佢哋啲同学两个正契弟都无嗮符。
阿飞搵到嘢做之后，屋企好似枯木逢春咁焕发新气象。细佬离开银行去咗一家文化出版社，即刻就被派往南京出差，仲要系坐飞机去，令阿飞好生羡慕，又替细佬高兴。两个仔都搵到新工作，老窦心情大好，经常呼朋唤友返屋企开大食会，老窦嘅厨艺喺佢哋大家族好有名气，堂大佬结婚酒宴都系佢一手主理。细佬份工系推销出版社嘅书，好处系好多书版带返嚟，使到嗜书如命嘅阿飞免费收藏并阅读到大量各类书籍，众多中外名著，甚至接触到《易经》哩类文化瑰宝，大受裨益。
