渐成油腻中年的我

10年博客伴我成长

早几个月前，就收到博客要折埋嘅消息，当时听到呢个消息嘅我百感交集，诚然今年我都好少up date 个blog，多多少少都係有点懒啦，而且生活趋于平淡，着实冇咩好纪念要写博客，自从2008年就开通博客，至今都有10年时间了，10年对于一个人嚟讲真係好长，10年前觉得10年后好遥远，时至今日觉得10年前恍惚就係一眨眼嘅事情，写博客之前我都係用QQ空间写日志的，宜家翻看当年空间嘅日志，真係尴尬的一批，写嘅内容幼稚不堪，不过呢个都係一个好正常嘅现象啦，边个都有成长嘅过程，你同我都唔例外。不过有点搞笑就係，我到宜家博客总浏览量才4W几，以前职中一个靓D嘅女同学，一个月就有我呢个数目了，所以网红始终都係网红，而我只不过係一个普通人，日渐平庸...

朋友圈每日都在变

微信成为生活嘅一部分，朋友圈自自然又会跟住时代嘅步伐日新月异，谂起几年前睇嘅朋友圈，都係朋友分享边度玩，边度食，边度蹦迪，当然鸡汤，微商都充斥唔少，到最近我猛然发现，我嘅朋友圈开始唔同咗了，鸡汤文化已经消失得七七八八，微商广告依旧坚挺，但喺蹦迪越来越少人分享，反而各种出国旅游晒坐标越来越多，呢D都唔係最重要，最重要就係各种晒证晒婚讯晒孕照，唔少朋友个细路仔都越来越大，老实讲见到个个做晒老豆老母，自己都有点虚，无法想象如果我有咗小朋友我嘅生活会係点，曾经探讨过各种问题，小朋友如果一出世就唔健康，咁点算呢？如果一出世就係傻嘅咁点算呢？生咗出来如果发烧烧坏脑咁点算呢？如果凑到佢四五岁係超级商场被拐子佬拐走点算呢？谂到呢度都唔敢谂青春期会遇到嘅问题，各种负面嘅讯息更加令我走向丁克一族，结婚唔生仔，养只狗仲好过！

后阿虎开西时代嘅我

係人生最黄金嘅几年，奉献给一个充满争议嘅事业，时至今日我认为我係失败嘅，佢浪费咗好几年係某个事业上升嘅时间，从而令到我身边个人对我会有一定嘅睇法，都不可否认嘅係，我从中学识好多嘢，对于自己心态嘅锻炼，与人相处嘅技巧，说话嘅艺术，呢D都係喺今后嘅工作当中学以致用；就係前两日公园前，巧遇jo姐，jo姐冇点变，依旧热情，健谈，爱笑，一抡嘴讲佢冇做阿虎开西之后嘅经历，偶尔也会约泰星，泰星同彬哥捞得好好啊，听泰星讲成成仲成功出道，有咗自己嘅MV，果然係人才去到边都会发光，至于团队其他人就真係冇点联络了；而我稳到一份稳定安逸嘅工作，再唔会好似以前咁博，咁出位，周围撩人，反而呢种生活更加适合我自己，再都唔使带有目的性去认识朋友，展现自己，搵到自己嘅定位，係一家公司里面，做自己该做嘅嘢，是非唔去讲，八卦唔去听，能够低调就尽量去低调，能够被人遗忘其实都不失为一件好事；

变老的不止是自己，还有身边亲近的人

宜家再都唔会去追逐潮流呢样野，以前翻工，出街都会好注重自己嘅形象，发型更加唔使讲啦，为咗好睇，成日去拉直发，后来，太麻烦啦，干脆卷就卷啦，咪唔好留咁长囖，圆寸，短发，头都唔使礁就出街，着衫着鞋唔求好睇，但求舒服，天气冻要温度，唔要风度，包到成只裹蒸棕咁最稳阵，26岁嘅我，身体都越来越多问题，以前冇嘅，宜家越来多（哎，钱以前都冇，点解唔会越来越多）就係几个月做咗嘅痔疮手术，痛咗半个月，辣嘅热气嘅唔敢再食了，菊花承受不了，然后鼻炎，呢个鼻炎时有时冇，有果阵真係停不下来，仲有就係食海鲜一定会濑嘢，出晒红疹，真係乜都唔食得，难怪好多同学朋友在变肥，而我继续稳定瘦，因为食乜都要戒口，点会肥呢？而身边嘅亲戚，老嘅老，走嘅走，姑婆宜家都係靠轮椅代步了，想起当年仲经常带我去荔湾湖公园玩呢，三姨公，五姨公先后离开，而且貌美如花嘅表姨面上嘅法令纹越来越深，毕竟佢都係两个仔女嘅妈妈了，以前一围台都係长辈，宜家一围台都係表妹表弟，嘻嘻哈哈一样咁热闹，只不过最近爷爷的眼睛中风，右眼一片漆黑，听到呢个消息嘅我当堂吓到唔出声，虽然我知道老人家年纪大机器坏係好正常嘅事，但事情一发生嘅时候，多多少少都有点难以接受；

当年同我打波嘅人，可能以后都冇机会同佢地打波了

打篮球，係好多后生仔嘅课后活动，而每个男仔都总会有一两个固定搭档，好庆幸我遇到炉子同邝永轩，一个我师兄，一个我隔离位，佢地每次打波都会嘈交，佢话佢独食，佢话佢浪投，但喺即使再受不了对方都好，都係照样约对方出来打波，不过最近邝永轩搵我聊微信，才得知佢视网膜脱离，以后都唔可以打球了，佢话兄弟我不关心他，讲真我宜家刷朋友圈嘅次数都少了，以前收工，训教，起床都会刷，宜家真係唔点睇朋友圈了，而炉子，自从去咗黄埔工作之后，再都冇见过佢，最近一次见佢都发福唔少，一句得闲出来打波，如今已经变成绝句了...更讽刺嘅係，当年一起打波嘅荔湾路IC，宜家都折埋，人去楼空，格外冷清。

油腻中年嘅我，从不被理解嘅一代变成不理解嘅一代

上周末，同reason路经北京路，见一妙龄女仔穿鞋方式非常特别，就係着鞋唔着袜，然后将鞋脚踩住，好似吴亦凡果种，我下意识讲咗句，乜宜家D人兴咁样着鞋？reason回答，你觉唔觉我哋都开始变成油腻中年了？以前我地係比7080后话，唔理解我哋嘅行为，我哋嘅衣着，如今到我哋唔理解00后嘅穿着了，听到呢句话嘅，就好似有个炸弹係脑海中爆炸，係啊，以前我地睇电视睇嘅MTV，首首都咁好听，宜家嘅MTV，唔係电音就係rap，宜家嘅明星唔係小鲜肉就係娘炮，唔使演技唔使唱功就可以红到爆炸，作为90后嘅我地，当然唔理解佢地点解咁多人钟意，就好似当年7080后一样唔理解我地一样，我虽然唔可以代表90后，但至少我感觉自己除咗身体，心态都日渐变老。

仲有一个月，博客就要bye bye啦，有时间我都会多写博客，珍惜最后博客带俾我嘅回忆！