གཞན་བསྟེན་སློབ་གཉེར་ལས་ཐར་བར་གྱུ

ད་བར་སྔར་དང་བསྡུར་ན་དཔེ་ཀློག་ལས་བློ་སྐྱེད་མང་བོ་རག་ཐུབ་ཅིང་གཞུང་དོན་གྱི་གོ་བ་ཅུང་ཙམ་ལོན་གྱིན་ཡོད་པའི་སྣང་བ་ཤར། སྔོན་ཆད་རྩིང་རགས་ཆེ་ཞིང་ཞིབ་ཚགས་མིན་པ། བསམ་བློ་ནར་མ་སོན་པ་སོགས་ཀྱིས་རྐྱེན་བྱས་ཏེ། གནད་ལ་ཕོག་པའི་དཔྱད་པ་ཅི་ཡང་གཏོང་མི་ཤེས། སྔོན་ཆད་གཞུང་ཚིག་བློ་ནས་སྐྱོར་ཁུལ་བྱས་ཀྱང་་རུང་། གཞུང་དོན་མང་བོ་རྩོད་པའི་རིགས་ལམ་ལ་བརྒྱུས་ཏེ་ནུས་ཚོད་ཀྱིས་གནམ་ལྡིང་ས་ལྡིང་གི་ལས་ལ་འབད་ཀྱང་བླ། མཐར་མར་རང་ཡིད་ཚིམ་པའི་ཡར་སྐྱེད་ཅི་ཡང་མི་འབྱུང་ལ་གཞུང་དོན་གང་ལ་ཡང་དོན་དངོས་ཀྱི་གོ་བ་རྣལ་མ་ཞིག་ལོན་མི་སྲིད་པའི་ཚོད་དོ།། ཕྱིར་འདང་རེ་བརྒྱབ་ན་འདས་པའི་དུས་ཀྱི་རང་གི་སློབ་གཉེར་གྱི་བརྒྱུད་རིམ་ནི། ཡར་རྒྱས་ཀྱི་གོ་རིམ་ཞིག་དང་བསམ་བློ་ནར་སོན་པའི་བརྒྱུད་རིམ་ཞིག་གཏན་ནས་མ་ཡིན་པར་ལས་ཟློས་དང་གཞན་ངོ་འཚོལ་བའི་བྱ་བྱེད་ཙམ་མོ།། གཞན་ངོ་འཚོས་ཞེས་པ་ཡང་གཞན་གྱི་རང་ལ་དགའ་བསུ་དང་ཁས་ལེན་རེ་ཐོབ་ཆེད་དུ་སློབ་སྦྱོང་བྱས་པ་ཙམ་ལས། སེམས་བསམ་པའི་གཏིང་ནས་རང་ཉིད་ཀྱི་མི་ཚེར་འགྱུར་ལྡོག་གཏོང་འདོད་ཀྱི་རང་རྟོག་དྲག་པོ་ཞིག་གིས་བསྐུལ་ཏེ་སློབ་གཉེར་ལ་ཕྱོགས་པ་ལར་ནས་མ་ཡིན་པ་དེའོ། གཞན་བསྟེན་ཁོ་ནའི་སློབ་གཉེར་བཅོས་མ་དེའི་ངང་ནས་མི་ལོ་ཉི་ཤུ་ལྷག་འདས་ཚར་བའི་ད་ཚོད་གཞི་ནས་སྔར་གྱི་སློབ་གཉེར་ཡོད་ཚད་ཕྱི་ཚུལ་ཙམ་དང་རང་མགོ་རང་གཡོག་གི་ལས་འབའ་ཞིག་ཏུ་སོང་བ་ངོ་འཕྲོད་ཡོང་བས། འགྱོད་སེམས་དང་བཅས་ཡིད་སེམས་ལ་གྲང་ཤུར་ཤུར་གྱི་སྐྱོ་སྡུག་གི་རླུང་དམར་ཞིག་བར་མཚམས་མེད་པར་ལྡིང་ཡོང་ངོ་།། མ་འོངས་པར་གཞན་ངོ་འཚོལ་བའི་སློབ་གཉེར་དང་ལད་ཟློས་ཀྱི་རང་བཞིན་ལས་ཐར་ཏེ། རང་རྟོག་གིས་གཞི་རྩ་བྱས་པའི་རང་སྟོབས་རང་སྤེལ་གྱི་སློབ་གཉེར་གཤའ་མའི་ལམ་སྣ་དེ་ཅིས་ཀྱང་ཟིན་དགོས་པ་ཡིན་ནོ།།