讲讲上海故事之－－缅怀吾个外公倪根生
题记：勒2016年8月6日礼拜六，吾撰写过一篇文章《如风往事之－－漫谈栀子花与白兰花》（上海故事），里向所讲个内容就是上海人搭外婆侪是邪气欢喜栀子花白兰花，自从吾1998年开始工作以后，每年只要一到入夏时节，还只要看到有人勒叫卖栀子花搭白兰花个辰光，就去各买两束栀子花搭白兰花送拨外婆，伊每趟仔看到以后总归是交关开心个，面孔上面会乐开花。由于吾从出生一直要到上小学一年级之前，几乎就是由外公倪根生外婆张榴妹以及大娘舅倪榴发领养大个，因此搭伊拉之间个感情是交关深厚个，故而，今早仔就决定去撰写一篇搭外公有关系个文章，以此唻缅怀外公弹老三11年……
吾个忘年交友人顾建芳先生，曾经搭吾嘎讪胡（聊天）个辰光，讲过迭能个一段有关于生死方面个言论，伊对吾唻讲道：“阎罗王要某个人三更半夜走，绝对覅会去拖到五更天。人迭一生必然要走个，只拨过是辰光方面个长搭短而已，其他方面是呒没啥个。还有邪气重要个一条就是－－覅管是处勒何种社会阶层里向个人，第一天唻到迭个世界个辰光，天气是哪能个，一旦要离开迭个世界个辰光，迭一天天气搭唻个辰光是一式势样个，绝对覅是迷信啊，每个人基本浪也侪是迭能样子，要是侬覅大相信吾讲个，可以向周围熟悉个亲朋好友证实一下个，就明白吾讲个迭些闲话，到底是对还是错哦！”……
外公倪根生于2008年08月25日礼拜一弹老三，享年89（虚）岁，伊比外婆晚走六个号头，伊天仔下着大暴雨，雨量是邪气大个。
纵观外公倪根生一生是迭能样子个，伊是滴滴刮刮个宁波人，伊老娘个名字叫做：陆海梅，一共生育有三个尼子，一个囡鱼，囡鱼是屋里向顶顶小个小囡，小囡鱼就勒生育小囡个辰光，因为难产个缘故，同样是老里八早弹老三。外公是屋里向个老大，伊个家庭是生活勒顶底层交关普通个老百姓。就勒民国时期个辰光，由于战争个原因家园拨毁，伊只好搭伊个母亲大人、两个兄弟搭小阿妹从宁波一路逃难到上海迭座城市讨生活，伊拉四个小囡侪是由母亲大人含辛茹苦养育大个，上述迭些内容先由外公告诉家母倪榴珍，再由家母告诉吾。
据吾所晓得个历史情况，当历史个迭列车轮走到中华民国时期个辰光，勒浙江宁波地区就有专门从事如下三种行当（工作）个人，第一种人就是－－属于跑船出海个船夫；第尼种人就是－－属于做各种大小生意个大小宁波老板；第三种人就是－－属于宁波奉化地区个裁缝师傅，就勒最初个辰光侪拨大家称之为“奉帮裁缝”，邪气有可能宁波人“奉”字个读音，搭“红”字个读音是交关相近差覅大多个，到上海迭座城市以后，“奉帮裁缝”迭个词眼，久而久之拨以讹传讹就演变成为“红帮裁缝”，顶正确个叫法就应为“奉帮裁缝”。
吾从小到大就是由外公带领大个缘故，几乎就是从刚出生，一直要领养到吾上小学一年级之前，除忒外公以外，外婆张榴妹搭大娘舅倪榴发也是迭能个，所以讲吾搭迭些长辈个感情是顶顶深厚个。
吾依旧还是通过长期观察以后，就发觉有迭能个一桩事体哩，迭桩事体就是－－仍旧是纵观外公倪根生本人个迭一生，基本浪就是属于一个邪气沉默寡言类型个人，是覅大愿意开口多讲一眼啥个闲话个，伊个人个迭一生顶主要还是以看搭听为主哦，伊个看搭听要远远多于伊本人开口讲各式各样个闲话，伊对人世间个任何人事物情，侪是看得交关透彻明白个，可以讲是像小葱拌豆腐一样－－一清二白（楚），伊只愿深深个埋藏勒心里向，轻易是覅肯开口讲出唻个。除非是那些交关要好个亲朋好友搭邪气熟悉个人，还要是今早仔碰着伊感到交关高兴个辰光，而且还是勒身体良好，可以去讲闲话个辰光，伊侪会讲一眼么事，还即便是迭能个闲话，讲话基本浪就是简明扼要点到为止，侬要是再要伊去多讲一眼，伊绝对覅会再搭侬多讲一眼啥么事。
或许，当有人看到外公个迭种做法时，就会去认为侬个外公是覅是有一眼自命清高搭自命不凡，所以侪会以迭能个一种态度唻对待人啊？！实则覅是迭能，而是外公经历过交关多个风雨搭起伏，见惯人世间个各种冷暖，勒同辈人当中见识也是属于邪气多个一类人。据外公生前对吾讲道，人迭一生就要少讲多看多想，既可以少去得罪自家周遭个各色人等；还能省忒各式各样个麻烦搭烦恼；更可以让自家远离覅好搭覅利个状态中；迭能个为人处世只有好处呒没坏处个。
外公生前对吾讲过迭能个一段话，伊是迭能唻讲个，自家个一生拢共从事过三种行当，勒其中个一种行当当中还有去做过两趟。
第一种行当就是：伊讲伊曾经勒某家工厂里向做过车床加工工人；勒某一天，伊一边勒做车床加工工作个辰光，一边还勒忧心思虑哪呢侪能去照顾好外婆张榴妹并养育好八个子女，【备注：外婆张榴妹本人是一个呒没工作且是目不识丁个家庭妇女，这一生一共生育有八个子女，其中的一个男小囡，因为生下唻就是属于一个体弱多病个人，覅满一周岁就弹老三勒。】因为自己开小差搭粗心大意个缘故，覅小心就拨大拇指头压断，虽讲医院拨伊个大拇指衔接好，只拨过上海是覅能完完全全恢复健康恢复好个，只有去南方工作以后，侪有可能去恢复好个，所以国家就安排伊去广州打捞局做船员迭个行当，伊对吾讲到以为自家去广州以后，就能治疗好个，等到退休回到上海以后，侪发觉还覅能完全恢复，每当阴雨天时，大拇指多少还会隐隐作痛。
外公从事个第尼种行当，还是搭伊个祖浪也侪是属于从事跑船迭个行当，多多少少是有一定个关系个。伊所从事个第尼种行当主要是去做打捞救援方面个工作。伊还对吾唻讲过，勒工厂做工人之前，自家就是做一名跑船个船夫，曾经还勒黄浦江浪拉过南唻北往个客人。勒中华民国时期个辰光，有趟仔勒黄浦江浪跑船个辰光，因为呒没听懂日本鬼子所讲个闲话搭指令，就拨日本鬼子喫过正反面两记耳光，因此对日本鬼子是顶顶憎恨个，是恨到骨头里向去个那种憎恨。
第三种行当就是：自从小娘舅倪林发顶替外公去广州打捞局工作，外公提前退休以后，勒20世纪80年代初中期个辰光，家庭经济条件可以讲是交关困难、属于并覅是哪能好个。勒掰搿辰光，上海市政府只为帮助一些家庭困难户，允许迭能个一类人群做各式各样个小生意，还会优先审批迭能个一类人颁发个体工商户营业执照。吾还记得就勒20世纪80年代初期到中期个辰光，吾个外公搭外婆就向政府申请批领过一张售卖各类时令水果摊头个营业执照，水果摊个摊头就设置勒家门口个附近，长辈也只好通过售卖各种时令水果唻贴补家用。就勒掰搿辰光，吾同样也是跟着大人们一道去售卖过各式各样个水果！
外公还讲过迭能个一段闲话，讲道：“勒侬大娘舅倪榴发个上头还生过一个男小囡个，迭个小囡生下唻就有毛病个，覅晓得是出于啥个原因，是覅能去触碰到伊个，只要是轻轻较去碰一碰小囡个身浪向，迭个小囡个身体里向就会冒出类似于像油脂一类个么事，由于生病外加掰时个医学科技覅是邪气发达，呒没过多久，辰光顶多也就勒一年左右个光景，伊就弹老三。”……外公为了家庭，勒工厂里向做工人，以及勒船员个辰光，自家也是交关努力个学习、工作，经过自家覅间断个学习搭努力，还勒顶替退休之前，做到家长个级别哦，曾经还拨评为优秀个员工。【备注：外公讲过，广东人侪是欢喜拨“船长”称之为“家长”，只因为“船长”就要像“家长”一样，无微不至个去管理好每一位船员。】个人还去过由国家开办个扫盲班，是一个呒没啥个文凭个半文盲，覅管是繁体字，还是简体字，只要是常用个，伊侪能认得，要是去书写下唻，伊讲就覅唻三，伊只会看是覅会写个。
勒老底子个辰光，勒计划经济个年代里，国家只为人人侪有生活做，覅允许有一个下岗工人、有人没工作做，曾颁发过一个关于顶替退休个文件。讲只要是勒工作个爷娘，达到一定年龄，要是子女呒没工作做，子女可以顶替爷娘去工作，爷娘可以提前退休。小娘舅倪林发就顶替外公工作，也去广州打捞局工作，因此外公提前退休。
外公勒售卖时令水果个辰光，尽管勒掰搿辰光个吾，只有虚岁七八岁左右，也是帮过忙照看过摊头个。还尽管讲勒掰搿辰光，有四到五家水果摊头，同时勒竞争争夺客户资源，吾伲摊头生意做得是顶好个，究竟是啥个原因呢？！只因为外公摆水果摊所采用个方式方法就是－－薄利多销，只要勒能够保本个基础浪，每卖出一斤时令水果，只加价一角洋钿，覅像其他个摊头心蛮黑个，起码要去加价块把洋钿，还要短斤缺两以次充好。即便是迭能样子，还覅能保证水果小摊头能赚到铜钿，也会有亏本个辰光。记得有一趟勒售卖新橙西瓜个辰光，重量达到36斤，依照长期售卖水果摸索出唻个经验，以为是一只好西瓜，稍微能赚一眼眼个铜钿，没想到西瓜开出唻以后，侪是起沙倒醸坏忒，心里覅要提有得多少个肉麻心痛啊，只好掼到垃圾箱里。
外公勒摆水果摊头个辰光，所居住个房子是向私人借住个平房，还搭建过一个二层木楼板房，水果摊头就摆放勒老屋里向个弄堂口。由于勒20世纪80年代中期市政动迁个缘故，一些老房子纷纷拨拆迁忒，就搬迁进层高为六层楼一楼四户人家个新工房，自从搬迁到新工房以后，摆水果摊头个地方就覅复存在，从此覅再摆水果摊头。
实际浪，像外公倪根生个身体素质是交关推扳个，主要由两个原因造成伊个身体素质是邪气推扳个。第一个原因就是：搭家庭遗传基因个因素是有关系个，伊搭伊个两个兄弟迈入老年以后，侪是有老慢支支气管炎毛病，据讲是由伊个祖辈遗传拨伊拉个，伊个祖辈也同样有老慢支支气管炎个；第尼个原因就是：伊勒年轻个辰光，外公交关欢喜喫香烟喫老酒，一天起码要喫忒一两包左右个香烟，而且所喫个香烟品质是邪气推扳个，价钿也是顶顶便宜个，由于自家经济条件交关有限、邪气少个，只能去喫一些诸如劳动牌、大生产牌之类个香烟，喫酒个辰光也只好去喫一眼顶推扳个土烧，迭种老酒个酒精含量是邪气高个，香烟几乎是从没去间断过，日积月累日长时久久而久之，从而造成伊个身体覅是交关好，老慢支支气管炎越唻越严重，每日还要覅定时个去使用缓解老慢支支气管炎个喷雾剂，勒发病顶厉害个辰光还要到附近医院去就医看毛病，当有毛病，毛病严重以后，开始滴酒覅沾，香烟一根也覅会触碰。也就是勒搬迁到新工房以后，还勒后首唻廿多年个日脚里向，伊基本浪也只能躺勒眠床，以眠床为伴。
要是讲外公一直躺勒眠床个上头，伊本人多多少少也是觉得有眼厌气个辰光，外公只为防止厌气搭无聊，基本浪也就只能搭电视机相伴勒一道哦，伊所要看个电视节目，还是以各类时事新闻为主，其他类别个电视节目，伊几乎是覅会去看个。勒难板个辰光，也会去看戏曲频道，由于伊长时期勒广州工作个原因，顶顶欢喜看个戏曲节目就是－－各类广东戏曲搭各类广东民乐，每趟仔只要是看（听）到各类广东戏曲搭各类广东民乐以后，伊总是眉开眼笑个乐开花。要是讲今早，伊感觉到有一眼眼吃力撒度以后，就会得关忒电视机小睡一会儿，等到睏觉睏醒以后，仍旧还会去开电视机看看各类时事新闻个。
吾刚开始拥有手机个辰光是勒1999年，勒掰搿辰光，手机侪是普通手机，还覅是智能手机，虽讲是迭能，但是能下载保存短辰光个唻电铃声，下载过一个辰光勒一分四十秒个广东民乐“彩云追月”，每趟去外公个屋里，会得反反复复播放拨伊听，记得有一趟大约连续放25分钟，伊从头到尾开心得覅得了，脸上也洋溢着开心个笑容。
医生对外公也讲过，一直躺勒眠床不动，对身体是覅大好个，能动个还是要去动一动个。尽管伊个身体覅是邪气好，还尽管伊个动作、动手搭走路，因为自家身体覅是顶好个原因，要比正常人缓慢交关多，拨过，只要是觉得身体还可以，还允许去动一动，像大小便、刷牙齿、擦面孔、洗脚搭汏浴，还是自家去做个，基本浪是覅愿意让外婆搭子女帮忙个，只有勒哮喘发得交关严重个辰光，侪肯让子女去帮一下忙，尽管勒掰时，屋里已经配备洗衣机，要是伊自家觉着身体还是可以个，还要是只有一两件外衣，就覅用洗衣机，会自家动手去汏衣裳。
总个唻讲，外公好喫而覅好穿，对于自家勒穿着打扮方面覅是邪气讲究个，只要衣裳呒没破损个地方，会穿好多年个，还记得伊有一件蓝颜色中山装，虽讲呒没破损个地方，但是衣裳已经拨汏成蓝白颜色，领口稍微有点起毛，伊就是覅舍得替换，仍旧是穿勒身浪。尽管是迭能，但凡是看到过伊个任何人，伊拨任何人个感觉侪是－－迭位老爷叔始终是干净清爽个，始终看覅到伊有邋里邋遢个地方。对于各类喫个菜肴倒是蛮讲究个，伊绝对是一个老饕客，小菜到底是好还是坏，只要是让伊品尝一小口就会晓得。伊还对吾讲过，勒力所能及个范围内，喫菜肴绝对覅能去马马虎虎，能喫眼好个菜肴，绝对覅会去喫推扳个菜肴，只有喫好个菜肴，身体侪够健康，拥有健康个身体，既能活得长寿一眼眼，还能减少并减轻子女麻烦，少让子女照顾自家，与此同时还是全家个福气。比方讲：伊喜欢喫黄鳝，还认为喫黄鳝就要喫野生个，家养个就覅要喫，觉得覅好喫，大娘舅倪榴发每间隔一两个礼拜买黄鳝拨伊喫。刚开始去买黄鳝，覅懂野生搭家养之间个区别，买回唻烧好以后，外公仅是喫一小口，就再也覅愿意去喫，还对大娘舅讲覅会去买黄鳝、覅正宗个，正宗黄鳝应该哪能去买……
吾是迭能唻理解、认得并去认为个，覅管是身处勒何种社会阶层里向个人，每户人家个经济条件，是属于交关好个，还是属于邪气一般个，一年到头每户人家个家庭聚会搭聚餐自然是覅会少个哦！
勒老底子个辰光，勒计划经济个年代里向，即便是国家刚跨入到市场经济时代个里向，对于绝大多数个上海市民唻讲伐，聚餐喫饭大多数情况侪是待勒自家屋里，去动手买汏烧烧唻喫个，只有碰到邪气重要个事体以后，侪会得去好一眼、有品牌个饭店去聚餐。只要是外公外婆个屋里向有家庭大聚餐会，基本浪就是勒屋里自家去动手买汏烧个，出于对外公搭外婆个尊敬，每趟聚餐侪让外公坐勒圆台面上头喫。拨过，两位老人始终覅肯上圆台面喫。外公要小辈另外去盛几盆小菜摆勒靠窗口个两只“夜壶箱”上头独自一个人喫。【备注：“夜壶箱”，是江浙一带家中放夜壶（晚上小便用个便壶）个矮柜子。】
后首唻上海人还有迭能一种讲法，会拨那些搭此外形相近个左右两只床头柜，也同样叫做“夜壶箱”，拨过放夜壶个功能从此就呒没。“夜壶箱”也就逐渐逐步个拨“痰盂罐”搭“马桶”所代替哦！
外公对大家是迭能唻讲个，曰：“吾之所以要迭恁样子去做，就是因为吾本人是一个有各种毛病，生毛病个生病人，要是搭大家待勒拉一道吃饭，勿单单就会影响到大家吃饭个食欲，还极有可能要拨覅好个毛病传染拨大家个，迭恁样子去做覅是邪气好个嘛！”……
勒吾个记忆当中，像迭个两只夜壶箱，除忒是拨外公当做餐桌去使用以外，勒里向伊还放置外公搭外婆每日必定要喫个各类药瓶（品），外加两三本工作记事本本子，【备注：像记事本迭件物品，也是要等到外公弹老三了以后，侪让吾发觉并晓得个。】迭些记事本到底是拿唻派啥个用场啊？！里向顶主要所记录个内容就是：几几年几月几号礼拜几，有啥个人唻看过外公搭外婆，所唻个客人又拨过两位老人有多少个铜钿搭么事，而且还是要等到客人回家去以后，伊侪会去记录勒记事本上头个，并且还只有是拨过铜钿搭各种么事以后，伊侪会去记录在案。【备注：两位老人勒生前始终有迭能个一种观念，即便是自家个子女，以及子女屋里个小辈，两位老人也侪认为是亲眷+客人。】
等到曾经唻看过两位老人个客人，屋里向有邪气重要个事体以后，迭两位老人还要想方设法个去还情还掉，外公搭外婆始终侪是迭能样子唻认为个，还拨自家个认为搭认知告诉拨吾听哦。讲到凡是拨过两位老人铜钿搭各种么事，既覅管是有多少，也覅管是拨得交关多，还是拨得邪气少，迭些侪是对吾伲两位老年人个“尊敬、尊重+客气”，只拨过，做人始终侪是要拥有自知之明个，自家勒做人方面千万覅能拨对两位老年人个“尊敬、尊重+客气”，去理解成是理所应当个一桩事体，去权当做是自家一辈子个福气……勿单单是迭能样子哦，迭两位老年人还会去认为，拨老年人铜钿搭各种么事，并覅是属于应当应分个。即使有客人（亲眷）空手唻看吾伲老年人，没拨过铜钿搭各种么事，也是交关开心个，也覅会去斤斤计较唻人没拨过铜钿搭么事，还会常庄性对唻个人讲道：“侬唻看看吾伲两位老年人，让吾伲交关开心哦，覅拨铜钿搭么事无所谓个，下趟仔想着要唻看吾伲，空手唻就好，赚一眼眼铜钿银子是覅大容易个，就覅要去破费！”……
记得就勒2018年08月05日礼拜天个夜里，吾曾经去撰写过一段有关于“教养”方面个短文，全文内容则是迭能样子个，吾撰写道：“教养”和高学历之间，未必存在必然的联系，学历高的人，未必表示其人有很好的教养，往往那些学历不怎么高的人，反而会体现出很好的教养。但凡缺少教养的人，是不会存有谦卑、谦让之心的，对待别人的态度，多多少少也是有一些目中无人目空一切的，不单单是这样，其人也是自视甚高的，总认为周遭的人都远不如他或她……
虽然对于外公搭外婆个一生唻讲伐，迭两位老人是呒没啥个学历搭文凭可以去言说一番个，外婆几乎可以讲就是属于一个目不识丁个家庭妇女，外公也只是属于一个初通文字个半文盲，勒迭两位老年人个身浪向，勿单单有着交关丰富个生活阅历搭各式各样个见识，就勒俗常生活当中，还有着邪气好个品行搭教养，总归是润物细无声个做给吾伲小辈看看，两位老人个一言一行侪教育滋润着吾伲！……
谨以此文，唻纪念缅怀已弹老三11年之久个外公倪根生……
【备注：①：文章为作者原创；②：第一张图片是作者自己编辑的；③：各种外公外婆以及大娘舅图片是作者自己翻拍的；④：各类水果图图片均来源于网络上；⑤：万分感谢原创图片。】
杜老倌侠客居（陆伟）写于2019年08月20日星期二晚上
