ꀋꎺꀋꉆꑠꑍ

ꉢꉙꃀꌧꄮꇫꄉꇁꌊꀃꑍꑟꇬ，ꉢꎺꇬꉠꀉꂿꋋꂷꋍꑍꄷꀋꁧꋍꇅꇯꆐꑬꆏꀋꋻ。

ꀉꂿꎼꈎꆏꇖꊯꎖꈎꀐ，ꄚꉢꏮꀉꂿꈁꑓꉜꇬꀉꂿꃀꌠꐯꃀꌠꀐ。ꇭꀧꂶꈨꐚꌊꉪꏤꑳꉎꀠꆿꈬꐙꁧꌡꃅ，ꈍꄮꆏꃅꆳꁏꐚꉆꌠꌡ。

ꉪꀁꇬꎬꆏꎭꑴꇬ，ꀉꂿꆹꑡꊌꆏꑡꑵꄻꉪꁳꃅ。ꑠꐛꅹ，ꌤꀄꊭꐘꀃꑍꇯꆐꉢꎺꑴꌦ。

ꀊꋨꄮꇬꉢꏃꈓꉆꈓ，ꀉꑳꌺꃅꐛ。ꃅꍵꄮꃀ，ꊿꈀꄸꑌꃄꂿꌐꀐ。

ꉢꎺꇬ，ꊿꑸꑽꀖꈭꐨꆏ，ꑸꑽꋍꂷꋋꂷꀋꎺꃅꉅꌊꀋꁧ，ꉪꆏꋋꈨꇬ

“ꑸꑽꊁꌺ”ꄹ。ꀉꂿꆹꅉꀕꃅꑸꑽꊁꌺꉅꌊꉌꈲꃷꁧꇬꎷ。ꈄꀕꋍꈄꎆꃀꉬꂷꃘꂷꊌ。

  ꋋꄮꇬꉢꉌꈲꁱꂷꀋꌧ，ꈩꃅꈩꇬꎷ。ꋀꌣꈚꀉꑳꉬꇮꄆꌅꈩꀜꏸꌌꈩꌐ，ꉡꑌꋍꂷꈁꏾ。ꄚ，ꎆꃀꐘꀋꈨꀐ。ꑠꐛꅹ，ꉢꈱꀉꂿꇰ：

“ꀉꂿꀋ，ꉪꂘꃀꉉꇬ，ꄆꌅꈩꀜꏸꄷꋍꑵꃶꌊꇁꑲꆐꉌꈲꁱꂷꌧꄷ！ꆏꋍꂷꃶꉢꁳꇬꍑꍓꀋ？”“ꍑ！ꆏꎔꃅꁱꂷꌷꑲꆏꑡꃶꆏꁳꑌꍑ！”ꀉꂿꉪꂯꀋꉪꃅꉢꏭꀱ。

ꊁꆏꉢꄆꌅꈩꀜꏸꊌꀐ。ꄚ，ꀉꂿꇵꂷꈍꑋꅐꀋꐚ。

ꀋꃋꋋꄮ，ꌤꋋꐘꉠꉌꃀꈐꏭꄐ、ꄐꃅꄉꅉꀕꃅꉠꉌꃀꑌꑴꌦ。