རྐང་སྒྲུང་དང་བརྩེ་བའི་ན་ཟུག

གསང་མདའ/

དོ་དགོང

སྐར་མདའ་རྒྱུ་བཞིན

ཟླ་འོད་རབ་ཏུ་འཚེར་ས་ནས

ཤང་ཤང་དུ་བཞུར་བའི་ཆུ་བོའི་གོམ་འགྲོས་ན

ངས་ཀྱང

རྐང་སྒྲུང་གི་བརྩེ་བ

དུངས་བའི་རྨ་ཁ་ལས་མཆེད་པའི་ཡིག་འབྲུ་དྭངས་མ་དག

དྲན་པའི་ཟིན་ཐོར་བཀོད་ནས

རང་དབང་གི་ལྷ་མོ

སྟོང་བསམ་དང་རེ་སྒུག་གི་བྲང་གཞུང་ནས

བསྐྱར་དུ་བཀླགས

གློ་བུར་དུ

དཔྱིད་རླུང་སིལ་སིལ་ལྡང་ནས

ལྷུག་པར་གྲོལ་བའི་མེ་ཏོག་གི་དྲི་བསུང་འཐུལ་དུས

ངས་ཡང

དྲི་མའི་བརྩེ་བ་ཟེར་བ་ཞིག

སྣ་ནས་སྙིང་ལ་ཕོག་ནས

དགའ་བ དུང་བ དྲན་པ

གང་གིས་ཀྱང་གླེང་མྱོང་བའི

ཆེས་སྤྱིར་བཏང་ཡིན་ལ

ཡང་ན་ཆེས་སྤྱིར་བཏང་མ་ཡིན་པའི

ངག་གི་འགྲོས་དེ་དག་སེམས་ནས་ཡང་ཡང་ཟློ་བ་ལས་ང་ལ་ཅི་ཡང་མེད

དེ་དུས

བརྩེ་བའི་བཅང་གྲོལ་མ་ཐོབ་པའི་རྣམ་ཤེས་ཞིག་དང་གཉིས་སུ་མེད/

ལྷག་བསམ་རྣམ་དག་གི

དགའ་དུང་དེ

རྨ་མེད་ན་ཟུག་གི་བྱེད་པོ་ཡིན་པ་ཞིག་ཡས་ནས་མ་དྲན