【幽默】乱噏廿肆42
阿飞开始有好清闲时候，无论工作定系心情，一做完手头自己工夫，见茹女都得闲就过方机组倾计。一日，正倾得热烈，一个娇小玲珑，清丽明眸嘅女仔行埋嚟，圆圆脸，头上束一把直笔笔马尾，活生生成个小鹿纯子，阿飞认得系上次一齐骑单车返屋企个姑娘仔。佢行埋茹女度，两个人咬住耳仔细细声讲女仔悄悄话，阿飞唔好意思仲喺度，正想转身行人，茹女哎住佢：“啱啦，介绍个女仔你识，佢叫‘咕咕’，话有好多忧愁喔，你咁好口才，讲嘢咁多哲理啱嗮你嚟开解佢。”转头又对个女仔讲：“咕咕，佢叫、、、、、、”
“我识佢，佢叫阿飞。”女仔讲，面不红眼不眨，非常之大方。转面又对阿飞讲：“你咪听佢乱讲。”
阿飞知道咕咕真名叫郭小萍。“咕咕”系佢英文名，意思系英文里面白鸽嘅叫声，阿飞鬼知道系咪。干洗同干衣密切相关，干洗出嚟衣物全部由干衣组负责后期蒸烫，压折整齐，最后由组里面啲靓女亲自送上客房俾客人，所以干衣组全部女仔都好靓女。干衣组就喺干洗机隔离，占地几十平方，各种功能蒸汽烫折干衣机十几部，有十个，八个女员工。每次推洗好衣物过去咕咕都叫住阿飞倾计：“啊，你又攞咁大一车嘢过嚟，憎死你嗝啫。”
有女仔叫，阿飞嬉皮笑脸：“我想嗝？我都唔想洗咁多。”
咕咕一边从桶车攞工衣烫，一边叫住阿飞：“你咪走住啦，你最近喺啯边睇咩？睇得咁入神，冬妹行过嚟几次，你都无发现。我咳过几声提醒你啦，怕你俾人开黄单。”
阿飞同佢隔住部蒸汽弥漫嘅折衣机：“啊？睇咩啫，睇情信咯。我听到你咳啊，好似鸡咳咁，我以为你无病呻吟咋。我又唔归冬妹管，佢理得我？阿毛就话啧。”
“你就鸡咳，乱噏。”咕咕招招手叫阿飞行埋啲，哄到埋佢耳边细细声讲：“你睇唔睇得出冬妹同阿毛拍拖啊喇？”
“唔系呱，人哋两个督导交流工作吧，你哋女仔真八卦。”
“佢哋系真咖，你又唔知。18楼有个长包客话可以搞冬妹出国，要冬妹同佢假结婚，出到国几年后攞到居留权再离婚，佢哋两个宜家好烦。”咕咕讲完好似若有所思，个样唔开心咗一阵。
阿飞无在意，想行人。咕咕又讲：“好哋哋，又有啲咁嘅机会，你话系咪时也运也命也？”
阿飞一听哩啲就兴：“时也运也命也系孔老二宿命论嘅荼毒。哩个世界咩都系自己争取啫，唔努力边会有成果？做人点能够无啲进取心，终日醉生梦死，听天由命唔系大丈夫所为，人生在世几大都要喺命运嘅浪涛赌一赌生死荣贱，方显男儿本色。”佢宜家踌躇满志，讲嘢都豪情盖天。
阿飞对人家唔在意，讲咩都顺口开河下巴轻轻，唔经大脑开玩笑。咕咕却十分欣赏，中意听佢讲笑，听佢高谈阔论，仲要佢有时间多啲埋嚟倾。不过就对阿飞手臂上嘅纹身稍微流露出反感，并时不时用哩个嚟攻击佢。阿飞近嚟心情好，讲嘢轻浮，开玩笑妙语连珠，唔同佢小女孩一般见识，费事计较。阿飞同咕咕一齐嘅时候总系心不在焉，多数系口痒无聊，先过去讲啲无离正经。后嚟知道咕咕喺酒店早有个男朋友，仲系酒店里面有名嘅靓仔：工程部钟生。有次同女人头喺员工餐厅撞到一齐食饭，佢指过俾阿飞睇：“嗰个就系工程部钟生，咕咕个男朋友。”个男仔面上架一副金丝眼镜，斯文白净，文质彬彬，有梁朝伟咁靓，似阿飞一般高，同咕咕郎才女貌非常登对。阿飞知道后，就唔再过去，一般只系送衣物嘅时候顺便倾两句。
7月份，西方列强联合制裁我国，外资纷纷撤离。国内经济遭受沉重打击，旅游服务行业首当其冲，花园酒店生意即刻萧条，业绩一落千丈。半岛管理层马上出台应对措施，将酒店员工一半人带底薪休假，每月轮换一批，减少酒店财政开支。阿飞被安排喺8月份休，一下子无咗200文收入，再加上两餐饭要喺屋企食，即系再唔见多一百几十，两头唔见钱。嬲到阿飞猛闹美国纸老虎：“叼你老母死人美国佬，成柒日虾虾霸霸搞事。”
7月底，酒店有员工自愿义务献血名额，酒店补贴200文，休假一个礼拜。阿飞惗住8月份无入息，又贪好奇想尝试新生事物，就报名献血，提前喺7月底放咗假。献完血返嚟感觉仲唔错，同对面华仔讲：“我完全可以同泰臣打返一场。”
8月份被动失业，本来想瞓响屋企沙滩椅听餐饱谭咏麟，张国荣啲歌，点知部分体魔星录音机，唔知系咪兴奋过度烧坏咗，宜家失业在家阿飞唔想使钱维修。激气嘅系，谭校长，张天王无理你听到唔听到，好歌新碟趁暑假源源不断推出。8月份广州电力紧张到极点，政府规定一个礼拜有6日停半天电。整个8月休假阿飞喺屋企困兽犹斗，苦不堪言。又闹：“叼柒你政府，酷暑烈日电都无？”
成个月无所事事，唯有专心玩健身，去西郊泳场游水，得闲就埋头狂睇小说。睇咗本细佬摆喺屋企嘅书板《盖世枭雄》，系部西方畅销小说，读后颇感震撼，同时对自己一直努力嘅追求感到失望。书里面个主角搞女人十分无耻，搵钱手段十分市侩，同自己嘅人生观，价值观，世界观完全唔一样。但人哋就系咁赤裸裸追求想要嘅金钱同女人，而自己现在所做嘅一切无非都系想搵钱然后娶老婆啫，自己就迂回曲折虚伪得多，对方就不择手段得光明正大。以后，阿飞开始留意专注睇西方小说，越发觉东西方文化，思维方式截然不同。
由于睇得多古典演义小说，受其糟粕影响。阿飞一直觉得自己有天生慧根，坚信系佛根正果。睇“西游记”人人都喜欢孙悟空，佢最中意唐僧，虽然目前为止未遇见过神迹，但感觉自己终有日可能因与佛有缘会皈依佛门。佢唔系厌世，喺咁纷繁复杂嘅社会，一惗起哩啲个心总会好宁静，万事皆空，一尘不见。佢感悟出：一了爱恨，百了红尘，无欲无求，得失莫计。但现实生活中无欲无求，你仲要唔要食饭？得失唔计，有时候人会踩到你上心口！渐渐发觉人同社会系矛盾嘅，而且人本身就系矛盾体，由矛盾构造，首先头同心惗嘅嘢就经常唔同，而且系两个独立嘅中枢系统。发现人之所以烦恼抑郁，情绪波动就源于两个系统唔协调，所以惗好嘅嘢经常做唔到，做出嚟嘅事往往系违心。更慢慢发现自己有好严重嘅双重性格，特别清楚知道自己脑袋有条刺，容易钻牛角尖嘅刺——会无缘无故忧愁。
月底假期将尽，中秋节将近，想起要买啲月饼水果去探下自己个婆婆。自从老母过身，老窦就同大舅父唔啱，已经久不往来，都系阿飞充当维系两家感情嘅桥梁，逢年过节去看望。婆婆已经非常老迈聋踵，驼背特别一年比一年厉害，阿飞又一阵唔开心。
8月份都有开心事嗝，阿飞三仔爷夹钱买咗部短土阔封单门冰箱，虽然每日停电半天，里面可乐，果汁，啤酒都仲系冰冻冰冻，可以一解酷暑闷热。成个月唔使做，食得美，瞓得好，健身游水越嚟越有史泰龙辛力加啲缩影，日日对住屋企墙壁上张《第一滴血》电影海报里面肌肉袒露，捧住火箭筒嘅兰博比对，然后打大赤膊落街。对面切纸铺华仔，街坊傻耀忠见到：“哗，飞头，肥咗好多啵，无玩健身咩？”
六甫水脚阿肥真系越嚟越肥，知道阿飞中意运动，喽佢朝早去沙面跑步。阿飞即刻应承，觉得健身运动太剧烈唔适宜日日多练，同跑步运动结合却正好互相调节。晚上，路嘅另一头永红五金商店，荷包蛋对狗男女草草去个街市买菜就当拍完拖，知道阿飞喺屋企，阿庆老婆得闲，辞差烂赌，吹响集结号又晚晚叫开台逐鹿中原。华仔照列人齐就坚决要轮一份，辞差唔过嚟三缺一就坚决唔玩。激到阿庆老婆，荷包蛋女友两个巾帼英雄无限量爆粗。一个月里面打麻雀，阿飞打10场输9场，执返嚟嗰200文美金千几文港纸干净利落全部输清光。有时大威带女友过嚟，仲俾一丈青，孙二娘，顾大嫂嚟个三娘教仔围殴。从此，佢又感悟到赌钱原来系有鬼嘅，麻雀有麻雀鬼，大弟有大弟鬼。麻雀鬼唔上身，任你点样执位食烟掟柜筒都无符。明白咗就更加输得自然，输得舒服，输到惯嗮，输到得益良多：“无閪嗱嗱搞咩闹事？唔搞事我咪唔使输咁多咯，扑你街阖家铲。”正是：
乜嘢事情睇唔通，
搞到个样怒冲冲，
无端白事心火盛，
系咪想做化骨龙。
又曰：
有死当学谭嗣同，
热血喷洒去从容。
为要沉睡雄狮醒，
甘把头颅唤民众。
