ཅིའི་ཕྱིར་སློབ་གཉེར་ལ་འབད་དགོས།
དཔེ་ཁྲིད་རྒན་ཞིག་གིས་སློབ་སྦྱོང་ཡག་པོ་བྱ་དགོས་པ་དེ་ལས་སླ་བོར་བཤད་ན་རང་ཉིད་འགྲོ་ཤེས་པ་དང་འདུག་ཤེས་པའི་མི་ཞིག་འཁྱོངས་པའི་ཆེད་ཡིན། གལ་སྲིད་སློབ་སྦྱོང་གི་གོ་སྐབས་སྣང་མེད་དུ་དོར་ཞིང་མི་ཚེ་རྣམ་གཡེང་ལ་བསྟིམས་ཏེ། རང་རང་ལ་ཤ་ཚ་མ་ཤེས་ཤིང་རང་འགན་མ་ཐེག་པར་འཚོ་བའི་དོན་སྙིང་ཡོངས་སུ་བོར་ཚར་ན། ཕུགས་རྒྱང་རིང་བའི་ལས་བྱ་གང་གི་ཕྱོགས་སུ་ཡང་གོམ་པ་སྤོ་མི་ནུས་ལ། སྤོ་བྱེད་ཀྱི་རིག་གནས་དང་། དཔའ་གདེང་། ཡིད་ཆེས་སོགས་མེད་པས་མདུན་སྐྱོད་ཀྱི་རྐང་བ་ཡང་མེད་པ་ཆགས་ངེས་པ་རེད། སྐབས་དེར་འཇིག་རྟེན་འདི་ནས་མི་བུ་ཤེས་འཇོན་ལྡན་པ་གཞན་དང་འདྲ་བར་འགྲོ་མ་ཤེས་པ་ཡིན། དེའི་ཚད་དུ་སླེབས་ན་འདུག་བསམ་ཡང་མི་གྲལ་ནས་རང་བཞིན་གྱིས་གཡུགས་ཡོང་བས་མཐོང་ཆུང་དང་། ཟུར་ཟ། དམའ་འབེབས་ཀྱིས་གང་བའི་སྐྱ་ཐིང་ཐིང་གི་འཚོ་བ་ཞིག་མི་རོལ་ཀ་མེད་དུ་གྱུར་འགྲོ། དེ་དུས་རང་གི་སུག་མགོར་རང་ཉིད་ལངས་ཏེ། རང་མགོ་ཐོན་པའི་འཚོ་བའམ་གཞན་ལ་རེ་མི་དགོས་པའི་འཚོ་བ་མངར་མོ་དེ་རོལ་བའི་སྐལ་བ་ཡེ་ནས་མ་ལྡན་པས་དོན་ལ་སྐྱིད་པོ་ཞིག་འདུག་ཀྱང་མ་ཤེས་པར་བརྗོད། དེ་བཞིན་དུ་ཐ་ན་སློབ་སྦྱོང་མེད་ན་ལྟོ་གོས་འཛོམས་པ་ཞིག་དང་སྡོད་གནས་བཟང་བོ་ཞིག་ཀྱང་རག་ཐབས་མེད་པས། མི་ཚེ་དོན་ལྡན་ཡོང་བར་སློབ་སྦྱོང་དགོས་པ་བཤད་ཅི་དགོས་ཏེ། གཞན་དང་འདྲ་བར་འཚོ་བ་མངར་མོ་ཞིག་རོལ་བར་ཡང་སློབ་གཉེར་མེད་ན། ས་པན་གྱིས་གསུངས་པ་ལྟར“་ས་བོན་མེ་ཡིས་ཚིགགས་པ་ན། མྱུ་གུ་སྔོན་པོའི་དཔེ་བཞིན་ནོ།། གསུངས་པས་གོ་སླ་བའི་ངག་གི་ལེགས་བཤད་འདིའི་རིགས་ནི་ང་དང་འདྲ་བ་ཚོར་ཤིན་ཏུ་མཁོ་བར་སྙམ།
