讲讲上海方言閒话之——“三字经”（其三）
勒拉迭嗰前头，已连续写嘞两篇搭“三”字搭界呃文章嘞，还有覅少呃“三字经”方言閒话，就继续去讲上海閒话“三字经”。
“噶老三”迭嗰词语呃含义搭意思就是勒拉讲：某嗰人做人忒骄傲、忒自以为是嘞，认为自家啥么事侪都是懂得呃，呒得啥呃是自家覅晓得呃各类人事物情噢，可以讲上知天文下知地理，本人就是“一嗰万宝全书”，㑚勒拉俗常生活当中，覅管是碰着嘞啥呃问题搭难题，吾侪都恁帮忙唻解决呃，呒得吾搞不定呃各类事体唻，还会得去认为自家所讲呃閒话、所去做呃每一桩事体 僎覅大可恁去弄错忒呃。
打嗰比方唻讲伐：有得俩嗰大人閒唻无事待勒拉一道嘎讪胡谈山海经，其中有一嗰人就先开口去讲道：“老黄伊拉呃孙子年纪么覅大，讲起閒话唻么，覅要忒噶老三老嘎嘎噢，而且迭嗰小囡讲出唻呃閒话，覅要看伊只有四五岁往里，讲出唻呃各种閒话，就像老年纪呃大人一色似样呃！”另外一嗰人就随声附和去讲道：“有一句老古閒话讲得邪气好啊，叫做龙生龙唻么凤生凤，老虫呃伲子搭囡鱼侪会得去打洞，还有一句閒话就叫做有种像种，老黄伊啊是一嗰噶老三，吾伲搭伊是有得几十年交情呃老朋友嘞，伊又覅是从今早仔开始噶呃咯，伊从年轻呃辰光噶到嘞今早仔，伊呃孙子同样也是迭恁样子呃！”……
“十三点”伊呃意思搭含义就是勒拉讲：某些人做起各种事体唻、讲起各种閒话唻呃辰光，覅是正正经经搭正正规规呃，就欢喜去歪做歪讲，迭种人勒拉行为处事呃辰光，多多少少是有得一眼眼痴头怪脑呃，是邪气覅符合常理呃，弄嘞覅巧还有得“戆憨憨”呃咪道。
如果吾伲畀“十三点”迭嗰三嗰词语调一调，去忒一嗰“点”字，勒拉“十”字前头去添加一嗰“老”字”，就演变成为嘞“老十三”，伊呃意思搭含义就是勒拉讲：某些人是老覅正经呃，或者讲，某些一把年纪嘞、上嘞年纪呃各类中老年人，畀任何一嗰人看到嘞以后，始终有得迭恁一种感觉，伊覅是一嗰邪气正经呃人，贼忒兮兮呃。
基本哴向，勒拉上海方言俚语閒话当中，“十三点”搭“老十三”迭两嗰词语，侪都是带有贬义色彩呃，侪都是勒拉指某些邪气覅好、覅（大）正经呃人，但畀过，也有得例外呃情形，会得勒拉交关亲密呃亲朋好友之间去使用迭两嗰词语，唻表示彼此间关系要好呃。
继续打比方讲下去：比方讲，全国人民侪都晓得上海女人是“嗲唻西呃”，伊拉对自家呃先生邪气欢喜、“喫得伊死忒呃辰光”、还勒拉外头人面前或表扬或赞扬呃辰光就覅管覅顾嘞，会得开口去讲道：“阿拉屋里厢呃十三点（老十三）近抢把有眼老覅正经、老变死嘞，讲啥呃要学洋派，过精致呃日脚，还讲每趟进出屋里厢呃门，勒拉出门呃前头、进门以后，相互之间一定要去相一记面孔、打一嗰kiss，否则覅是迭恁样子去做呃閒话，其他事体僎都覅去做嘞！”……
反之，男人假使讲也同样是邪气欢喜自家呃太太、“喫得伊死忒呃辰光”，还勒拉外头人面前或表扬或赞扬呃辰光，也一色似样会得覅管覅顾呃，会得开口闭口呃去讲道：“近抢把阿拉屋里厢只十三点女人也有得一眼眼覅大对头嘞，老底子是随便哪恁覅允许吾一顿去喫一瓶老酒呃，只好去喫三分之一，讲啥么事，现在经济条件好嘞，一顿去喫一瓶老酒覅是啥呃大问题，要是覅够还好去添加！”……
“弹老三”又畀叫做嘞“抬老三”搭“翘老三”, 是对“死忒呃人”呃一种邪气覅庄重或交关嘲谑呃一种说法搭讲法。虽然讲迭嗰词语也是属于沪语方言閒话俚语，但畀过，迭嗰词语倒是滴滴刮刮是一嗰外来呃地方词语，上海滩是一座移民城市，伊勒拉发展呃全过程当中，就吸收嘞覅少呃其他地区呃方言，伊呃出处搭源头是从苏州地方引进到上海呃，辰光一长久而久之就成为嘞上海方言閒话俚语。
勒拉老底子呃传统文化当中，按照“天地人”呃讲法，“老三”就是指“人”，“弹”字可以去理解解释成为：交关“稀薄”呃、“时隐时现”呃、“飘忽覅定“呃，几乎可以去讲是呒得啥呃实体呃。对于老一辈苏州人讲起唻，“弹老三”勒拉苏州方言閒话当中，是等同于“徐大老爷”搭“拆老（赤佬）魑佬”呃。噶末，“徐大老爷”又是哪恁桩事体呢？！本地方言僎晓得“老爷”是有得另外一种意思搭含义呃，凡是庙里向供奉呃菩萨，侪都畀叫做嘞“老爷头”。关帝庙里向供奉呃是“关老爷”，城隍庙里向供奉呃是“城隍老爷”，过年要送灶，送呃是“灶君老爷”。“魑佬”呃“魑”字伊就是指“鬼属”搭“魑魅”，人面兽身四足，借此就好唻迷惑众人。所以讲，勒拉某一种程度上去讲，“弹老三”是属于另一嗰世界里向呃“人”。
“三只手”：上海人凡是对于有得小偷小摸、欢喜偷人家各种么事呃一类人（群），侪都是称伊拉是“三只手”。近抢把看到嘞迭恁一则新闻报道，小偷畀警察叔叔捉牢嘞，而且伊还是一嗰上嘞年纪、年纪一大把呃中老年小偷搭惯偷，当警察去审问伊呃辰光，伊就全部坦白嘞，还去讲道：“迭嗰是吾最后一趟做三只手嘞，等到放出唻嘞以后，从今往后吾再也覅愿意去做三只手嘞，只因为吾伲小偷顶顶欢喜偷铜钿银子呃，还因为今早仔呃人，自从去使用嘞智能手机以后，侪都是覅带啥呃铜钿银子出门嘞，铜钿银子么偷覅着嘞，只好是下岗歇业嘞，一些喫价钿呃手机也同样是覅敢去偷唻调换铜钿银子啊，里向是有得定位系统呃，关机嘞也呒得啥呃用场啊，覅管手机勒拉啥呃地方，照样是可以去畀定位锁牢呃，还邪气容易畀捉牢唻！”……
“三脚猫”：伊呃意思搭含义是勒拉讲，某一种人或某一类人看上去，像啥呃各类事体搭各种么事，伊侪都恁懂得一眼眼呃，侬要是讲伊是邪气精通伐，又好像是覅大唻三呃，属于猪头肉三覅精。
比方讲：有俩嗰人勒拉嘎讪胡谈山海经，其中一嗰人先开口去讲道：“小张迭嗰人是有得一眼眼小花露水呃，自家是会得制作家什呃！”另外一嗰人就接下去讲道：“伊家什么是会得去做做呃，也是做得覅错呃，但畀过，侬要是让伊去做细巧一眼眼、带有一眼眼花纹呃家什么，伊亲口对吾讲过是覅肯做呃，讲细巧家什是做大覅唻呃！”
“三夹板”：勒拉沪语方言閒话当中，“三夹板”呃意思搭含义，并非就是勒拉指建筑方面呃用材，而是勒拉讲，夹嘞当中去受两头气呃人。对于夫妻外加上阿婆唻讲伐，伊拉三者之间呃关系，要是媳妇搭阿婆之间呃关系，覅是邪气融洽、处理覅好关系呃，还要是小吵天天有，大吵三六九，噶末，迭嗰辰光呃伲子就是属于“三夹板”嘞，会得好像是风箱里向呃老虫，两头僎会得去受气，太太搭姆妈俩嗰人侪都覅恁去得罪，得罪嘞马上就畀伊颜色看看，只好是俩头去劝劝，去讲讲对方好呃方面……迭嗰辰光呃男人真是轧扁头唻睏扁头！
“猪头三”：实际哴向最最正确呃写法应该写作“猪头三姓”，上海人就畀最后一嗰“姓”字省略忒嘞，勒拉中国呃远古时代开始算起，一直要算到嘞今早仔，上至国家下到庶民老百姓，历唻就有得祭祀迭嗰习俗呃，“猪头三姓”就是祭祀呃辰光，所使用呃祭品或贡品，除忒“猪”迭嗰动物祭品或贡品以外，还有得另外两种动物祭品或贡品，伊拉分别就是“牛”搭“羊”。辰光一长久而久之，勿单单是去省略忒嘞一嗰字，进入到上海，就演变成一句骂人呃閒话嘞！
上海人欢喜畀“猪”叫做“猪猡”，印象最最深刻呃、轰动全中国呃就是——中国足球还身处勒拉甲A时代呃辰光，只要是上海申花比赛，还只要是申花队输球嘞，主场呃蓝魔球迷就覅理智开始沪骂起唻嘞，所谓呃“沪骂”就是采用上海方言閒话唻骂人，曰：“裁判员是只猪猡、裁判员是只猪头三，吾伲要畀裁判员做忒伊！”……
“三七开”：勒拉通常情况下头，迭嗰词语用勒拉生意场上呃情况是交关多呃，一旦生意兴隆做成功嘞，就要开始分账嘞，而且勒拉迭嗰前头，眼扳数是事先签过或口头方面或法律方面呃协议呃，一旦赚到嘞铜钿，去按照出资呃比例、贡献呃大搭小……唻分账。比方讲：俩嗰人做生意成功并赚到铜钿嘞，其中一嗰人要是综合方面呃恁力搭贡献侪都是最大呃人，就好去分到“七”，要是另外一嗰人，伊总体上唻讲伐，嗰人贡献搭恁力是最小呃人，只恁去分到“三”嘞。
“三七开”还可以用勒拉剃头方面，有得一段辰光里向，男性剃头，交关流行“三七开”，一边保留七分，另外一边保留三分。
“三朝四日”：迭嗰词语是一嗰形容词，伊呃含义搭意思主要就是勒拉形容辰光搭、日脚搭天数侪是邪气少呃。勒拉通常情况下头，一般去采用贬义呃说法搭讲法唻得交关多，正面是覅大讲呃。
比方讲：某某人做生活覅是邪气卖力呃，勿单单是出工覅肯去出力，今早仔伊要是覅高兴嘞，就覅肯唻上班嘞。领导就对伊批评道：“侬做起生活唻，覅肯卖力也就算嘞，哪恁老是欢喜三朝四日，歇歇么覅肯唻上班嘞，今早仔是吾最后一趟警告侬，向侬发出最后呃通牒，侬如果还是迭恁样子屡教覅肯改，吾马上就要开除忒侬！”……
“三头六面”：迭嗰词语是勒拉讲，凡是搭某一桩事体有得关系、搭界呃人，哪怕只有得一眼眼关系呃人，侪都可以成为作证人。
比方讲：有得俩嗰人勒拉争争吵吵，张三讲欠李四一万块洋钿，上嗰号头已全部畀还清爽嘞，李四却讲张三只还嘞九千洋钿，还有得一千洋钿还呒还清爽。张三发急嘞去讲道：“迭桩事体三头六面是要去讲讲清爽、弄弄清爽呃，还铜钿银子呃辰光，王五搭赵六也是勒拉现场呃，等到伊拉俩嗰人有空嘞以后，就好叫唻作证明人呃！”
“三日两头”：伊呃意思是讲经常性会得迭恁样子唻做呃。
比方讲：长辈们勒拉外头人面前，夸奖自家屋里厢小辈呃辰光，就会得去讲道：“吾最最小呃孙子三日两头会得唻探望吾呃，陪吾么嘎嘎讪胡谈谈山海经，还要买吾欢喜喫呃么事畀吾唻喫喫呃！”
“卖样三千”：所谓呃“卖样三千”，就是普通閒话当中所讲呃，嗰人搭某些人群，伊拉侪都是邪气“欢喜出风头、爱显摆”呃。
比方讲：有人今早仔穿嘞一件今年仔世界哴向邪气流行呃时髦套装，伊要是碰着嘞熟人，就会得对伊拉夸奖自家身哴向呃迭套衣裳是哪恁哪恁好，讲啥呃是花忒嘞伊本人三四嗰号头呃工资去买回唻呃，还要去问伊拉到底好覅好、穿嘞伊身哴向灵光覅灵光、挺刮伐？！……某一些看覅惯呃人，就会得开口对伊去讲道：“侬迭嗰么真呃叫做嘞猢狲覅搛宝嘛，卖样点啥啦，千万覅要再去卖样三千嘞！”……
“三光码子”：伊呃意思就是今早仔所讲呃“月光一族”。
比方讲：像迭种类型呃人，伊拉勒拉过日脚呃辰光，所采用呃方式方法就是——“三光政策”，即：“喫光”、“用光”搭“当光”，很有可恁伊一嗰号头赚得唻呃工资，就恁勒拉半嗰号头之内侪都畀伊去用光。勒拉上海方言閒话当中，有得另外一嗰词语叫做嘞“脱底棺材”，伊呃意思搭含义，实际哴向是搭“三光码子”是一色似样呃，意思就是勒拉讲某些覅会得过日脚呃人，今朝有酒今朝醉，喫光用光么拉倒算数，勒拉老底子有一种讲法叫做“脱底棺材么倒头光”！……迭嗰两组上海方言閒话词语，伊可以讲是有得异曲同工之妙唻！
“三岁看到老”：伊呃意思搭含义就是勒拉讲，等到嘞小囡长大成年嘞以后，到底会得变成功哪恁样子呃一嗰人，伊本人是变得好嘞呢？！还是变得坏嘞？！勒拉伊本人三岁呃辰光就恁去看出唻嘞，伊勒拉三岁呃辰光，脾气秉性基本哴向就恁去定型嘞，三岁是哪恁样子呃，到嘞成年以后，是侪大覅多、呒得啥呃区别呃！
“三钿勿作两钿”：伊呃意思搭含义就是指覅值铜钿嘞！
比方讲：廿年前头买嘞一套音响设备，是先锋牌呃，勒拉掰搿辰光，买回唻呃价钿是人民币三万块洋钿，今早仔已经是呒得啥呃人再去使用音响设备嘞，而且还邪气挤占世界，就想请回收旧货呃人，唻收收忒么就拉倒嘞，呒想到收旧货呃人就讲道：“迭嗰老巨三今早仔已经是三钿勿作两钿覅值铜钿嘞，吾最多只恁出到五十块洋钿回收，肯呃閒话就成交，覅肯就只好拉倒算数嘞！”……
“三只手节头捏田螺”：比喻做各种事体是十拿九稳呃！
比方讲：王五伊迭嗰人，做任何一桩事体，僎都是认真、把细得覅得了嘞，閒话么又要去讲回唻嘞，伊勿单单是吾伲单位里向工作嘞几十年、是有得几十年经验呃老员工，而且每年到嘞年末评选优秀员工呃辰光，基本哴向伊每年侪都是畀推荐并评选成为优秀员工，有得事体就叫伊去办好嘞，肯定是三只手节头捏田螺呃！
“三分本事，七分家生”：迭嗰词语伊呃意思搭含义就是勒拉讲，就算某嗰人勒拉做某种工作方面有得嘞天大呃本事，要是呒得与之相配呃工具，也是做覅好事体呃，说明嘞工具呃重要性！
最后末，要去讲讲“烂污三鲜”搭“烂污三鲜汤”嘞，迭两嗰词语，原先是指小菜，到后末唻并覅是指喫呃小菜，而是演变成为嘞一句骂人呃閒话，伊拉呃含义搭意思侪都是相同呃、侪都是勒拉讲，某一种人，或者讲某一类人，勒拉做人方面，是邪气“下作”、“肮脏”、“下流”、“呒得啥呃底线呃”，伊本人为嘞达到自家呃目的，可以无所覅用其极，样样啥呃事体侪都会得去做出唻呃，面孔也可以覅要呃。多嘞一嗰“汤”字，语气方面就加重嘞！
比方讲：有得俩嗰老太勒拉一道嘎讪胡谈山海经，其中一嗰老太先开口去讲道：“侬晓得嘞伐，三号门客堂间某某人家，畀别人家上门寻仇打开嘞头！”……另外一嗰老太接下去讲道：“为啥是迭恁样子侬晓得伐，迭家人家呃囡鱼就是嗰烂污三鲜汤噢，搭覅同呃男人轧朋友，周旋勒拉覅同呃男人之间，还要去骗男人呃铜钿，辰光一长久而久之么畀发觉嘞，所以么就畀寻上嘞门！”……
【备注：①文章为作者原创；②所选择的图片基本上全都是海派艺术家李守白先生的作品，图片均来源于网络上；③感谢原创图片。】
杜老倌侠客居（陆伟）写于2020年11月06日星期五晚上
