讲讲上海方言閒话之——“三字经”（其二）
上一篇《三字经》文章笔者去讲了“唻三”、“瘪三”搭“赖三”迭三个上海方言俚语词语，总觉着意犹未尽，今早仔么继续再讲下去，再去讲讲上海方言俚语词语当中，搭“三”字有关呃俚语词语。
“昂三”迭嗰词语也好去写作“盎三”搭“肮三”，实际哴向勒拉上海方言俚语閒话中，有得覅少呃词语是从英语等各类外语当中音译过唻呃，迭嗰词语就从英语“on sale”迭嗰词语音译过唻呃，迭嗰词语男女侪都可以去讲、去使用呃。伊所要表达呃意思跟含义就是勒拉讲：勒拉俗常生活当中，有得一种类型呃人，是邪气“阴险”、“狡诈”、“刁钻”、“甴曱”呃，而且为人处世也是交关难弄呃人。除忒上述讲法以外，还可以指某种商品呃质量是邪气推扳差劲呃！
比方讲：有得俩嗰人勒拉一道谈山海经对话，其中有一嗰人就开口去讲道：“老底子吾一直认为隔壁头X老头子人是交关好呃，伊拉屋里厢每趟仔只要是烧了一眼好小菜，眼扳数会得去分畀隔壁邻舍尝尝咪道喫喫唻，呒想到伊迭嗰人覅要忒昂三噢，标标准准就是一嗰昂三货，覅是吾勒拉瞎讲八讲点啥噢，就勒拉前天仔，吾只畀过拿了一样坏忒呃家什暂时放勒拉过道里向，而且跟周围呃邻舍隔壁侪都去讲好仔，顶顶多也就过忒三五分钟辰光，马上就要拿了去处理忒呃，而且根本就呒去影响到任何一家人家噢，畀伊看到了以后，乃么就交关覅开心了、覅窝心了，马上就哴里哴声呃开始骂山门了，还去讲了一些邪气难听呃閒话唻，讲啥么事，既占用了过道，又影响到伊老人家走路了，伊好去占用过道，从明朝仔吾一样也要去占用过道，大家僎一道唻占领过道好了，从今后让大家侪覅要去走路好了，凡是做迭种缺德事体呃人家，侪都通通呒好下场呃，僎要绝子绝孙！”……
“刮三”迭嗰词语也是属于音译词语，是从英语“grocery”迭嗰词语翻译过唻呃。还原本迭嗰词语应该读（写）成为“刮老三”，上海人嫌隙读起唻覅流利便当，干脆就乃伊省略忒了，读（写）成为了“刮三”。勒拉老底子呃上海滩哴向，各式各样呃杂货侪都是放勒拉光天化日之下呃，所以讲“刮三”呃原本意思就是指唻自迭种没遮没拦呃杂货铺当中呃。到了后末唻，上海人干脆就畀迭种露天摆摊头呃语言情景，转换运用到了生活呃其他方面去了，比方讲：嗰人呃私密畀曝光了，做了覅好事体畀别人家发觉了……侪都会得去讲“刮三”迭嗰词语了，意思无异于是勒拉讲像摆露天杂货铺一样，让人们侪都去晓得了自家某些见覅得光、见覅得人呃么事。对于某些守覅牢秘密呃人，吾伲就会幽默呃称伊拉为“刮三模子”。当迭嗰词语发展到了最最后头呃辰光，就连得一些覅大好看呃各类人事物情，侪都畀叫做了“刮三”，比方讲：某嗰人就针对某位女人开口去讲道：“伊呃迭张面孔看上去哪恁始终侪是交关刮三啦？！”实际哴向是等于勒拉讲迭嗰女人呃面孔就好像一只恐龙，暴露勒拉街面上头有碍市容。
“阿三”也是上海人邪气欢喜去讲呃一句方言閒话，迭嗰词语也同样是从英语当中翻译英译过唻呃，迭嗰词语就是唻自于“十里洋场”时期呃吴语上海閒话当中，迭嗰词语是一嗰贬义词语噢，今早仔恐怕已经呒得啥呃人会得去讲迭嗰词语了，估计有覅覅少少呃年轻一辈上海人，还覅一定会晓得迭嗰方言俚语词语哩。迭嗰词语是从“I say”搭“阿Sir”音译过唻呃，有得俩嗰原因，原因之一就是：只因为迭俩嗰英语呃发音，跟上海方言閒话当中呃“吾讲”迭嗰词语又是邪气接近呃，所以就畀音译成为了“阿三”迭嗰词语；第尼就是：勒拉英国体系呃公务人员（尤其是警察）长久以来都习惯畀称呼为Sir。另外，上海人一向习惯于勒拉单音节呃单字前头去添加一嗰“阿”字。
但畀过，勒拉掰搿辰光，上海人勒拉讲“阿三”呃辰光，更加欢喜勒拉“阿三”前头去添加“红头”迭嗰词语，就演变成为了“红头阿三”，迭嗰称谓就是指“印度人”，勒拉掰搿辰光呃上海滩哴向，英租界中经常会得有从印度调过唻呃“公务员”，伊拉专门去负责一些杂事，迭些印度人侪是英国人呃忠实“看门狗”，勿单单是整天警棍乱舞，还要去欺负上海人，上海人对伊拉恨之入骨、恨得透顶了，因此就蔑称印度人为“阿三”，之所以还去要叫印度人为“红头阿三”，原因大致有得迭嗰三种讲法，第一种讲法就是勒拉讲：凡是印籍巡捕，头哴向眼扳数要缠着一块红巾或红布头，【备注：实际哴向，还是有覅同呃区分呃，印捕充任交通警、巡逻警，头哴向是用红巾或红布头缠头呃，假使是任看守警则改为了黄巾或黄布头缠头呃。】第尼讲法就是勒拉讲：印度人是亡国奴，勒拉上海人呃眼睛里向，地位要远远呃低于西捕搭华捕，去排名次呃閒话，只好去排勒拉第三位噢；第三种讲法就是勒拉讲：勒拉掰搿辰光，当地人称印度警察为“阿三”。还有呃就是“印度阿三”迭嗰词是由“红头阿三”演变过唻呃。
“老牛三”迭嗰词语呃意思跟含义就是勒拉指：某嗰人邪气欢喜吹牛逼，而且还是牛逼连天谎话连篇，吹牛逼吹得辰光长了、还有得了一定呃经验搭门槛，还要经常性迭恁样子去做，就勒拉“牛三”前头去添加一嗰“老”字。根本覅是迭恁样子呃各类人事物情，会得畀迭种类型呃人吹得唻是天花乱坠，明明自家根本就呒去做过呃、覅是伊去做呃各类人事物情，讲通通僎是由伊本人去做、操作呃，还会得讲勒拉迭嗰世界哴向，呒得啥呃伊本人做覅唻、搞大覅定呃各类人事物情噢。只要是伊本人亲自出马了，各种事体马上好去解决忒。
比方讲，有人勒拉谈山海经：“侬晓得伐，阿四头迭嗰赤佬模子真呃覅是一嗰好户头噢，伊跟吾讲好仔呃，还吹起了牛逼，只要吾畀伊呃孙囡转到重点中学去读书，伊就请吾上饭店喫饭，晓得吾欢喜喫老酒呃，讲还要请吾喫两瓶茅台酒唻，乃么今早仔事体么总算是去办好了，伊就送吾一条软壳中华迭桩事体就算结束了，根本就覅提上饭店喫饭跟茅台酒呃事体，认得伊算吾路道粗眼睛瞎忒呃！”……
“老巨三”也是一句上海方言俚语閒话，伊呃含义跟意思就是指某个人，伊本人勒拉某一方面有着独有呃本事，或者说拥有某项顶级呃专业技能，绝对可以去秒杀一大帮子人唻，而且绝大多数呃人侪都覅好与之比拟，跟迭嗰人覅勒拉一嗰档次上头噢！上海人勒拉讲迭句方言俚语閒话呃辰光，还会得去讲一句与之相关呃閒话，尤其是出了某桩事体以后，去教育某一嗰人呃辰光，有些人开口就会得去讲：“老巨覅脱手脱手覅老巨，凡是交关容易去脱手呃人，伊就覅好算是一嗰老巨人了，因为侬覅是嗰老巨人，所以就畀上当受骗了！”……
【备注：①文章为作者原创；②各种老上海风情画作图片均来源于网络上；③感谢原创图片。】
杜老倌侠客居（陆伟）写于2020年07月30日星期四晚上
