【幽默】乱噏廿肆50
6月份嘅8号，阿飞放工返到屋企，今晚喺4年一度嘅世界杯足球赛开幕。为咗哩场盛事， 老窦同细佬夹份买咗部二手旧日立彩色电视机。 虽然做咗成个月仲未出粮，但一家人睇波，阿飞仲系好开心，佢宜家真系周身无蚊，不鸣一文，如果仲系失业真系唔敢想象，阿飞先真正明白钱财几咁重要，以前成日赌钱饮酒真系荒唐得可以。
咕咕合同期满离开咗花园酒店，宜家晚上返夜校读大学，日头去跟老师业余学油画。有晚上嚟搵阿飞，约埋几个干衣组女仔，到细惠男朋友屋企聚餐，细惠同咕咕系好姊妹，两个人同期一批入花园酒店，开张做到宜家。成班女仔买嚟啤酒汽水，卤水鸭脚翼，仲有烧鹅，白切鸡大批美食，荔枝，西瓜，水蜜桃等丰富水果 。女仔顾住倾计唔食得多，细惠个男朋友同阿飞有福啦，两个开怀吃喝，大快朵颐。期间听佢哋讲，被酒店炒咗嘅雄仔，大象，高佬健几个带人返嚟喺员工通道门口伏击督导阿毛同肥佬放工，将佢两个都打得唔轻，阿飞听到有啲难过，毕竟工友一场，佢叫细惠上班代为问候阿毛。咕咕准备考入画院深造，喺艺术方面发展，阿飞继续捱佢嘅洗衣房。
世界杯过后，细佬又买咗部放像机返嚟，将部二手彩电卖咗，重新买部国产乐华二十吋彩色电视机，晚晚扐新录像带返嚟同老窦睇，屋企晚晚枪炮连天，烽烟四起，一片盎然生机。细佬知道老窦烂戏瘾，故意想氹佢开心的，老窦成日霸住部新电视，搞到接住嚟嘅北京亚运会阿飞都无睇到多少。
一晚落班，阿飞同阿华一同行去单车棚攞车放工。阿华突然冲一个女仔背后大声哎，个女仔回过头嚟，正系阿华想追嗰个客房服务员。佢同阿华点咗一下头，算系礼貌上打个招呼，阿飞唔知咩原因鬼使神差吹咗一声口哨，女仔狠狠掘佢一眼，跟大家一齐踩车上路。女仔飞车越过阿飞喺前面骑咗一段路，不时咁拧转头寻找，阿飞估个女仔可能系搵自己，心中偷笑，有意紧跟喺佢身后，始终保持一定距离。令到个女仔频频扭转头望下佢，正跟得过瘾，阿飞自己一脚踏空，部单车甩咗链，阿飞又激气又翳气，不觉对个女仔产生咗好奇。
第二晚落班嘅时候，正踩喺半路上，后面传嚟清脆嘅女仔声音：“你好，落班啊。”一日嘅工作阿飞辛苦到都唔识惗嘢，拧头见到一个娇小嘅黄衣少女正对住佢微笑，系昨晚个女仔，阿飞无惗到路上有女仔相叫， 好狼狈咁 应咗声 ：“系啊。”仲未识讲第二句，少女轻盈咁骑住单车 ， 飘身向住同佢相反既方向而去。 嗰一刹那，阿飞个心突然感到从未有过嘅一种悸动，急促，不安，但系有讲唔出嘅舒服。阿飞一见倾心，留意起人哋：个样瓜子咁细细尖尖，唔讲得上好靓 ，但系一对小眼睛好有神，充满灵气。 一头齐耳短发， 望落去精神利索， 率直泼辣。阿飞傻更更咁越睇越入神，天天望住洗衣房门口希望见到佢推布草入嚟， 佢留意到个女仔上下班时间同自己系一样嘅。 渐渐更知道咗佢嘅作息规律，注意到佢几时休息，咩时间会喺酒店咩地方出现，比如人哋几点食饭，几点放工。阿飞仲喺落班嘅时候离远吊住佢尾睇佢喺保安室打完卡，上前攞佢个考勤卡嚟睇：哈哈，陈小燕。
过咗几晚，阿飞落班碰到佢，阿飞上去同返佢打招呼：“你好啊，落班啦？”
女仔话：“我哋一齐踩咯。”
路上，阿飞唔知点继续开口。女仔话：“你个人都几口花嗰啵？吓！”
阿飞面红上嚟：“我好少咁撩女仔，嗰日唔觉意唔知发咩神经。”骑咗一段路，到到盘福路口两个唔同路就分别而行。
喺酒店里面，个女仔回避唔同佢打招呼，阿飞亦无胆打破哩道隔膜。
阿肥系广州相机厂工人，工厂喺市郊夏茅上边，入面有个标准嘅绿草茵茵足球场，有一支能征善战嘅足球队，曾经夺得过水准好高嘅广州北郊地区足球赛冠军。阿肥系厂足球队一员，司职后卫。队里面个前卫，无论身材相貌球技都好似容志行，曾经入过广东预备队，喺佢带领下同阿飞日用品荔湾分公司足球队打过一次友谊赛，赢8比0，阿飞当时系公司足球队右边锋。喺厂里面阿肥除咗眷恋队球队，贪恋每日放工后喺球场驰聘之外，觉得工厂无咩前途，喺老窦手下做学徒俩仔爷相处更烦人，唔想以后跟老窦一样一世开机床，见阿飞学完车都无车开，佢又唔敢行举妄动。
老道想将部菠萝弹的士买半个位做车主，咁收入会多好多，拍档墨鱼精同意俾佢一边开一边供，不过要计翻利息，佢宜家准备开始供车。华仔同女朋友一个礼拜见二面，未行到热恋，晚上好清闲。阿飞有中国人民几千年嘅优良传统，有份工，有份粮基本就系实现咗共产主义，革命成功，每晚呼朋唤友去街附近一带士多饮啤酒吹水庆功，最近踎向阳路荣华酒楼对面肥姨间士多。宜家流行饮干啤，好容易上头，宜家流行周星驰，佢仲无厘头。一打一打干啤酒，一碟一碟香辣炒田螺，万里望咸干花生，热浪薯片，阿肥，尤榄，华仔，老道一班饮得之人，天时暑热，打大赤膊，胡须勒突，心口凹凸，个个持住喉咙有核，晚晚讲到口谐脷倔。
入夜饮醉，尤榄让大家猜世界上最好系乜嘢歌？阿肥，阿飞系谭咏麟歌迷，华仔中意许冠杰，争执不休。尤榄话系伟哥，个个就无嗮声出。尤榄又嚟问世界上最好饮系咩奶？班咸湿佬即刻异口同声话肯定系人奶啦，尤榄话系二奶。 大家又俾佢激到气咳，阿肥最唔服佢，嬲啦，发脾气： “再嚟”。尤榄问世界上最贵系咩房？阿飞脑瓜反应快，识得发散思维，同时知道尤榄只咸虫无咩正经嘢出：“乳房！”
阿飞仲系唔忿：“到我嚟。”佢问边个系世界上最美嘅人，大家知道佢唔简单，无人敢乱答，阿飞得意话梗系情人啦，大家不能异议。见大家口哑哑， 阿飞跟住问： “世界上咩书最多人中意？今晚有人估到再嚟一打干啤我埋单，无人估到你哋请我去前面食啫啫黄鳝煲。”
大家唔叼佢，个个松人。阿飞得鸠戚啦，追住成班人后面叫：“你班死蠢，系秘书啊，咁柒易估都估唔到。”
7，8月份系广州全年里面最酷热嘅时候，亦系台风季节。台风迟迟唔嚟，35度嘅高温就静止喺城市，非常难受，路边嘅士多好似蒸笼咁，令人坐立不安，佢哋转入五羊城酒楼饮夜茶叹空调，每个礼拜竟然有四至五晚之多。荷包蛋都过嚟，仲晚晚包起张单，咁就嚟得人多啦。西关地碰埋都系街坊，饮夜茶隔离三几张台都系识嘅，热闹非凡，声威势壮，楼面经理，部长，服务员统统不敢怠慢。其中有个服务员风骚野火，心口爆棚，去得多大家同佢非常熟络，知道佢叫阿琼，以后就专门搵佢攞位。尤榄每晚喺针织厂落班，冲完凉踩单车返屋企，天时暑热换过成套香港姑妈带返嚟嘅西装，梳正个大包头，左手指一只灿眼金算子，右手腕一只金光闪闪精工表，着埋皮鞋先过酒楼饮茶。荷包蛋系老细，但为人低调，你喺佢身上搵唔到名牌金器，着衫灰头土面。其他人如阿飞之流就更加系牛记笠记，塑胶棍仔鞋一度，佢哋围台通常都俾人误认尤榄系大老板，带啲马仔嚟打趸。阿琼每见到大家嚟都好开心，帮手加凳，加位，即刻滚茶热水送上，仲去搵经理帮佢哋班熟客免茶位费。尤榄每次嚟到就问佢攞大揸牙签，抓嗮喺手，逐支攞嚟放一端入口上颚，用下牙做平台，将手指按住另一端轻轻一摁弹人，射完阿飞射华仔，弹个无停，核突恶心，但大波琼就哈哈大笑睇得好开心。大家关心阿飞同咕咕近况，又打听佢饮醉酒漏口风中央酒店有个秀枝装，阿飞极力否认。尤榄话：“阿飞把口就得，沟女得个卵！沟女要跟我学嘢啦。”尤榄无人睇得佢在眼，激起阿飞把几火：“你又沟咗条咩女咁巴鸠闭啊。”尤榄得意洋洋，话自己已经将大波琼沟到手，大家知佢乱叼嘢无人信，一轮牙签空袭回应过去，尤榄一手拨落飞嚟嘅航空导弹，一边话：“唔信我，赌餐饭啊，我约到佢出嚟你哋请。”大家又好奇又想睇嘢，约定听日喺五羊城酒楼对面臭冲口饭店开定位等佢，睇下尤榄系咪带到大波琼出嚟。
第日傍晚，老道，阿飞，阿肥，华仔去饭店开好位，就见到尤榄西装革履拖住风情万种嘅大波琼施施然而嚟，含羞答答坐埋每日相对嘅熟客之中，可能已经知道其中嘅约定，替男朋友赢咗餐饭，佢好开心同大伙儿打招呼：“嗨，你哋好。”大家激到张口结舌，食完餐饭死死哋气夹份埋咗张单。
咕咕嚟过好多次都无见到阿飞，阿飞屋企宜家搬咗去五羊城酒楼，阿飞去搵佢，佢又返咗夜学，好难撞见一面。咕咕通过阿飞老窦转告，佢有关系可以帮手提早将驾驶证转成红牌，好使阿飞早日实现开的士嘅梦想。阿飞宜家做得安乐，日子过得快活，唔想搞咁多嘢。实情呢系怕欠咕咕人情。
哩晚屋企炎热，傍晚食完饭，阿飞落楼过对面切纸铺搵华仔出嚟，两个喺树脚透凉讲人闲话：“边个份人无带契又无威胁。”论街坊是非：“啯个嘢生又累人死又累街坊。”咕咕骑住单车，离远见到阿飞，欢快咁直冲撞过嚟，咕咕离开咗酒店一改往日愁眉不展，忧郁病态，显得活泼开朗，热情奔放。阿飞正八卦得高兴，冷不防咕咕出现，见华仔喺旁边反而唔好意思，喺阿飞心目中一直惊俾人见到佢同“人哋”嘅女朋友喺埋一齐。咕咕有个好姊妹喺荔湾交警大队工作，今晚嚟就系想同阿飞过去搵佢，咕咕拉住阿飞唔理会佢一再唔愿意，就直接去搵好姊妹。
好姊妹女交警完全唔同咕咕类型，无咁纤细秀丽，线条粗糙唔特止，仲要面目可憎。阿飞唔知咕咕点同佢做成好姊妹，见面就亲热过不停。仲唔知咕咕同个女警察讲过咩关于自己悄悄话，女交警成晚恶死能瞪倔住阿飞。阿飞同咕咕一齐就更觉心虚，唔知人哋系憎佢手臂上嘅纹身，定系憎佢同人哋个女朋友。晚上送咕咕返屋企嘅时候，咕咕讲女交警仲未有男朋友。男朋友？阿飞大把。
第晚饮夜茶同大家一讲，个个都话将来少不免要求到交警，一致认同女人头最适合攞嚟送羊入虎口。大家同女人头先将女交警扬长避短介绍一遍，除咗阿飞无人见过女交警，但大家都讲得出感情专一，心地善良，贤良淑德一大揸唔知女交警是否具备嘅性格，熟悉到好似喺文化大革命期间同佢乱搞过男女关系咁。大家都惗：“或者臭猪头遇啱萌鼻菩萨佳偶天成呢。”因为咕咕返学，野外写生都好忙，好唔容易约齐到一次双方出嚟食饭，女人头当场就话肠胃不适，要求紧急送院。女人头叼死大家啦：“你班嘢，开头讲到我以为同咕咕一样咁靓嘅好姊妹，整件钟无艳过嚟，你要我点啃啊？”老道，阿飞，阿肥一直做佢思想工作一直到佢结咗婚以后，劝佢牺牲小我完成大我。
