讲讲上海故事之－－缅怀吾个外婆张榴妹
题记：上一篇文章吾撰写个是《漫谈上海故事之－－缅怀吾个外公倪根生》，迭篇文章自然就要去写外婆！吾则是迭能样子唻认为个，对于各位长辈们顶顶好个纪念，勿单单是对长辈要常庄性个念念覅忘，还要通过文字去记录、铭记长辈们生命旅途个全过程中，各种过往搭点点滴滴。迭些过往搭点点滴滴，覅管是好还是坏，吾伲总能从长辈个身浪学习到一眼么事个，既可以让吾伲从中多多少少收获一眼眼收益搭好处，还可以让吾伲后辈终身去受益匪浅，更可以让吾伲搭吾伲个后辈们去了解到，吾伲个老祖宗到底是属于哪能个一类人……
实际浪唻讲伐，就勒2016年08月06日礼拜六个下半日个辰光，吾曾经撰写过一篇名字叫做《如风往事之－－漫谈栀子花与白兰花（上海故事）》个文章，文章里向个内容是讲上海人搭外婆侪是邪气欢喜栀子花搭白兰花迭两种花朵个。自从吾1998年7月份开始工作以后，每年只要是看到有人勒叫卖栀子花搭白兰花个辰光，眼扳数会去各买两朵栀子花搭白兰花送拨外婆个，伊每趟只要是看到花朵以后，总归是交关开心勒面孔浪还会乐开花。由于吾从出生一直要到上小学一年级前头，几乎是由外公倪根生外婆张榴妹以及大娘舅倪榴发领养大个，搭迭些人个感情可以讲是邪气深厚个，因此讲，总感觉到《如风往事之－－漫谈栀子花与白兰花（上海故事）》里向所描写外婆方面个内容，既是属于撰写得覅大够个，还属于是有一眼眼个意犹未尽哩，只拨过是撰写一眼眼而已，就决定单独去写一篇搭外婆有关系个文章！
外婆张榴妹，伊是勒2008年2月16日礼拜六弹老三，伊享年91虚岁，勒伊天仔真可以去讲是一个大晴天，天气晴朗艳阳高照。
勿单单是迭能样子唻，吾还记得自家勒2012年03月17日礼拜六个夜晚，还去撰写过一篇名字叫做：《品读百味人生之－－我以为我是可以的》文章，勒文章当中有一段文字是迭能唻描写，曰：当外婆张榴妹驾鹤西去的第三天，【备注：外婆张榴妹于2008年2月16日星期六驾鹤西去。】还当我抬头望着挂在墙上的挂历，既多想让日历和时间永远都停止不动，还更想让时间停留在她辞世的前一天哦！……
就勒《品读百味人生之－－我以为我是可以的》文章中，吾还讲道：从小到大的我，并不是一点都没有哭闹过哩，有时自己不免也是要哭闹、耍无赖一番的，只是不知道什么才叫做“哭”，流眼泪的机会更是少得可怜，可以说是历历可数，还自认为基本上是没有值得令我感动的、值得去流眼泪的各类人事物情。但是，话又要去说回来，就在那一时刻我却情不自禁地流下两行热泪，而且时间还是哭得很长很伤心的，一直哭到临出门前，我知道自从她老人家离开我以后，从此在我的世界里面又缺少一位十分慈祥的、始终疼爱我的亲人。
外婆伊老人家，勒生前个辰光就是属于一个目不识丁，而且还是一个呒没工作个家庭妇女，尽管讲是迭能，因为每个号头要去邮政局帮外公代领工资、报销等各式各样个原因，是交关需要一个自家个图章，外公倪根生曾经就帮助外婆张榴妹去刻过一个木头（制）个图章，外婆伊老人家顶多只认得“张榴妹”迭三个字，而且还是要放勒一道个辰光，伊侪会全部去认得个，要是讲，侬要是拨迭三个字侪是区分拆开唻，一个又一个让伊去辨认，伊可以讲一个字也是不认得个。嘎么，吾又哪能会晓得迭桩事体个呢？！是由伊老人家告诉吾个。
外婆迭一生拢共生育有八个子女，勒子女当中，有五个囡鱼搭三个尼子，老大到老四侪是囡鱼，老五到老七侪是尼子，老八是家中那末头囡鱼。迭些人个名字分别叫做：老大“倪榴娣”、老尼“倪榴英”、老三“倪金英”、老四“倪榴珍”【备注：伊是吾个老娘。】、老五“倪榴发”、老六“倪林发”搭老七“倪金凤”，侬勒前头覅是有讲过外婆生育有八个子女吗？！哪能只去写有七个人个名字啊？！侪因为勒吾个大娘舅倪榴发上头，外婆曾经还生过一个男小囡，迭个男小囡生下唻个辰光就是有毛病个，覅晓得到底是啥个原因，迭个小囡是碰也覅能去碰个，只要是轻轻较去触碰一下小囡个身体，迭个小囡个身体里向就会冒出好像油脂一类个么事，由于生病外加勒掰搿辰光个医疗技术侪覅是邪气发达个，没过多久，辰光顶多也就勒一年个光景，就此弹老三。像迭桩事体，除忒外公倪根生曾亲口对吾讲过以外，还勒某一趟家庭聚会当中，吾还听外婆对吾个三表姐沈燕也讲过个。
要是拨外公倪根生搭外婆张榴妹，相互之间拿唻做一个对比搭比较，外公就是属于一个覅是邪气讲究穿着打扮方面个人，只要人搭衣裳清清爽爽干干净净，衣裳呒没一丁点个破损之处就好。伊本人是交关喜欢“喫”迭桩事体个，还是属于一个标标准准个老饕客喫货，自家也是晓得并懂得啥个食物对伊唻讲是好喫、可以去喫个，哪能去喫各种时令小菜，对自家个身心健康侪是顶为有利个。除忒吾勒上述所提及个内容以外，外公勒脾气秉性方面，搭外婆相比较而言，基本浪就是属于一个沉默寡言类型个人，只有难板个辰光侪会去讲一两句闲话个，而且还是勒交关熟悉个亲朋好友之间，外公侪会搭迭些人去讲一两句闲话个，伊基本浪就是属于覅哪能啰里八嗦个，要是能覅开口讲闲话就覅会去讲个。外公讲起闲话唻，就是直奔主题简明扼要点到为止，要是覅是交关熟悉个人，伊是轻易覅肯开口去讲闲话个。
外婆搭外公相比较唻讲伐，就是属于判若两人哦，迭两位长辈就是反过唻个，虽然讲外婆个身体搭外公同样是覅大灵光交关推扳个，又加之自家是生有好几种毛病个，勒外婆自家个身体里向，像胆囊等各种器官覅是邪气好，每日还是要搭各种药罐头打交道个，要去喫多种药品哦，诸如就有像“金胆片”之类个药品，从而就会去造成外婆有邪气多个菜肴是覅好去喫个，基本浪讲是呒没一眼眼口福个。
还就算是迭能样子，更即便讲今早大娘舅倪榴发已经去烧好外婆能够去喫个各种菜肴，就算是拨自家屋里向个“盐钵头侪是去打翻忒”，等到外婆品尝过一小口之后，伊本人始终侪会去觉着，今早所烹饪个各种小菜，哪能仍旧是属于“淡滋刮辣个”，【备注：“淡滋刮辣个”是一句沪语方言词眼，伊个意思是讲淡而无味。】一眼眼味道也是呒没个，伊个想法顶好是菜肴个上投再去多撒一大把个盐哦！
吾还记得勒吾个小辰光，就是自家勒就读小学个辰光，也会时覅时个陪外公外婆一道喫饭个。勒有些辰光，喫过一小口菜肴以后，是覅大愿意去品尝第尼口个，为啥事体会迭能？！就是但凡是外婆喫个菜肴，侪是齁咸齁咸个，吾还对外婆讲过，去喫忒咸个菜肴，对于自家个身体健康是呒没丝毫个好处个，还要少喫一眼迭能个菜肴。
勒外婆生前个辰光，曾经对伊个子女以及吾伲小辈亲口讲过迭能个一句闲话，用沪语方言唻讲道：“老头子【备注：外婆称吾个外公为老头子。】伊是属于一个有得喫福个人，伊也会勒喫方面去好好较享受享受，还只要是勒经济条件允许个情况下头，伊欢喜喫就让伊喫好唻，吾本人是一眼眼口福也是呒没个，就有交关多个小菜是覅大好去喫个，既然吾覅能够勒喫个方面去好好较享受一番，吾搭老头子两个人，就只好是黄牛角水牛角大家各归各好唻，关于喫个方面吾本人就覅会得多去考虑一眼啥么事个，吾自家只好勒穿着打扮方面去享受一番，侬又覅是覅晓得，吾本人从年轻辰光开始直到今早仔，一直侪是邪气欢喜穿着打扮，只拨过，勒老早仔，还勒吾本人年轻个辰光，由于家庭经济条件方面是交关推扳个，外加还有七八个子女，是覅允许，也是覅能去考虑穿着打扮个问题哦，今早仔经济条件忒老早仔比较起唻，就要宽裕得交关多，吾就好去考虑穿着打扮个问题！”……
上段沪语方言闲话个意思就是勒讲：外婆因为身体覅是交关好个原因，有勿勿少少个菜肴是覅能够去喫个，故而伊老人家是覅去考虑个，伊从年轻个辰光，就爱穿着打扮，因此会去考虑穿着打扮。
纵观外婆伊老人家个迭一生，伊本人滴滴刮刮就是属于一个邪气欢喜穿着打扮类型个人，只要是勒自家经济条件还允许个情况，还只要是勒自家手里向还有一眼眼个宽裕，伊每过一两年个辰光，就会跑到裁缝店个店铺里向，去定做一套适合伊本人穿个、勒近抢把市面浪邪气流行个各种时髦套装。勿单单是迭能样子唻，外婆一老人家也是属于一个交关爱清爽搭爱干净个老年人哩。勒生前，但凡是所有认得外婆个各位亲朋好友、周遭个邻居以及附近小菜场里向买卖小菜个各位小商小贩们，只要是碰到吾伲时，侪会对吾伲迭能唻讲道：“侬个老娘（外婆）真是一个爱干净、邪气清清爽爽个时髦老太太哦！”……“时髦老太太”就成为伊本人独有个一个标签。覅管勒啥个情况下，就算伊自家今早个身体并覅是交关好个，还就算勒生病时，只要是任何一个人碰到并看到伊时，伊拨大家个一种感觉就是－－迭个老太（太）真是一个整整齐齐清清爽爽干干净净个时髦老人！
还有三条因素同样也是要去讲清爽个，第一条因素就是：覅管外婆是去附近个小菜场买卖各种小菜，还是去屋里家门口倒垃圾，伊本人会勒出门前头，眼扳数要去梳妆打扮一番个，哪怕是顶顶简单、顶顶快速个梳妆打扮，伊也是要去弄一下个，也只有侪是去弄好以后，伊本人觉得心满意足，侪会去买卖小菜、倒垃圾个，要是自家呒没去弄好、呒没去梳妆打扮过，像迭两桩事体是覅肯去做个；第尼条因素就是：覅管勒啥个辰光搭情况个下头，外婆始终是以开心个笑容唻迎接、面对每一位认得伊个人，伊始终侪会去保持着乐观搭开心个笑容，但凡是碰到并看到过伊老人家个人，伊始终是笑嘻嘻个；第三条因素就是：还有覅少个中老年人，一旦像迭类人跨入到中老年人个行列以后，原先一头墨墨黑油光锃亮个头发，就会拨演变成为煞煞白个白头发，外婆搭其他人是覅大一样个，等到伊迈入老年人行列以后，头发依旧是一头墨墨黑油光锃亮个黑头发，只有极少数个白头发，黑头发要远远多于白头发，顶少起码也要有80%到90%是属于黑头发！
外婆伊为啥事体要迭能样子唻做呢？！伊曾经是迭能唻对吾讲个，伊讲道：“一个人出门勒外头，伊勿单单是代表伊本人，伊还代表伊个家庭，从伊个身浪向搭穿着打扮方面去看一看以后，就可以拨别人家晓得，伊拉屋里向到底是哪能样子个。既覅管伊是长得交关好看个人，还是长得交关难看推扳个人；也覅管伊是搛铜钿经济条件邪气好个人家，还是经济条件邪气推扳个人家；穿着打扮起唻干干净净清清爽爽，是顶顶基本个，总归是可以去做到个，迭也是顶顶起码个一个小小要求，假使讲某个人每天拨别人家看上去，始终侪是属于一个邋里邋遢交关腻心个人，是会拨别人家看大覅起个，就算人家当面覅会得去讲啥么事个，勒背后头眼扳数要拨别人去讲忒一顿个！还要去讲个就是，一个人假使伊每天侪能保持着干净搭清爽，伊个精神面貌搭状态眼扳数是交关良好个，有良好个精神面貌搭状态以后，整个人随之而唻就会变得越唻越开心，一个每日（始终）侪能保持着开心乐观个人，就会变得身心健康，人只要身心健康就能活得长寿一眼眼，健康长寿、寿命活得长一眼眼，迭个又有得啥个覅好呢？！”……
上段沪语方言个意思就是讲：但凡是始终保持着干净清爽个人，还但凡是活得邪气乐观开朗个人，人也会随之变得交关长寿个。
自从外婆搭外公双双侪弹老三以后，老房子就由大娘舅倪榴发居住着，就勒迭一两年个辰光里，每趟搭家母倪榴珍去探望大娘舅，周围个邻居就会对家母唻讲道：“侬个老娘走得也是忒早，要是能够长命百岁，再去多活几十年就好，吾伲从唻覅看到过，像侬老娘介么介要干净清爽，又是一个邪气‘时髦个老太太’，伊自从拆迁搬迁到此地块以后，伊几十年唻，从唻就呒没搭周遭个邻居吵过一趟相骂、打过相打，也呒没搭周围邻居讲过一句粗鲁个闲话，还要是碰着落雨个天气里向，看到有邻居衣裳晾晒勒外头，就会得去通知一下邻居，落雨要收衣裳，要是邻居覅勒屋里向个辰光，伊还会得帮忙收一下衣裳，等到邻居回到屋里向以后，再去拨伊拉，实在是忒好勒！”……
同样是勒迭个辰光个里向，难板搭家母去外婆生前常庄去买小菜个菜市场买卖小菜，每当有摊贩晓得外婆弹老三仔以后，侪异口同声地讲：“吾伲僎晓得老太身体一直是覅大好，还以为老太近抢把身体又覅大灵光，只好待勒屋里向静养，就覅好出唻买卖小菜，呒没想到伊介早就走忒啦，未免也太可惜，要是伊能再去多活几十年就好勒。覅是吹侬牛逼、吹捧侬老娘，侬个老娘绝对是一个邪气干净清爽个时髦老太，而且伊对待任何人侪是邪气客气个，伊只要是询问好菜价钿，买起小菜是交关爽气个，吾伲侪愿意拨小菜卖拨侬个老娘。其他老人根本就覅好搭侬个老娘唻比个，覅像有一些老头老太，年纪看上去搭侬个老娘是差大覅多个，但拨过，就勒其中个一部分人，人是交关邋里邋遢个，伊拉拨人个一种感觉一直（始终）是属于邋里邋遢个人，而且伊拉买起小菜唻门槛精到九十六，看上去，既好像是要买小菜个，又好像是覅要买小菜个，勿单单要讨价还价搞七廿三，有些辰光还要欢喜乌搞百叶结，覅是讲这些小菜是覅大好个，就是讲伊些小菜是覅大灵光个，根本就覅值迭个菜价钿哦，搞仔老半日、等到仔半半六十日以后，就开口讲，今早仔个小菜实在是邪气推扳个，吾就覅买侬个小菜，像迭能样子个人，吾伲就覅愿意拨小菜卖拨伊拉！”……
上段沪语方言个意思是讲：菜市场里向个各位商贩侪讲外婆是一个干净清爽个时髦老太太，买卖各种小菜也交关爽气个，覅像有些老年人是属于邋里邋遢类型个人，买卖各种小菜也是抠抠搜搜个。
外婆搭外公勒年轻个辰光，绝对是一对标标准准个俊男靓女哦，等到吾看到两位长辈年轻辰光所拍摄个老照片，【备注：据家母对吾讲，迭两张老照片拍摄个辰光，大约摸就是勒两位长辈50岁个光景。】像迭两位长辈个相貌，要是讲拨放置到今早仔时，绝对可以讲是属于“网红”一类个人，还可以让交关多个人眼睛也为之一亮。实际浪唻讲伐，外婆伊本人是邪气欢喜拍摄各类照片个，由于伊勒年轻个辰光，受制于屋里向个经济条件，是覅能够常庄去拍摄各类照片个，也只好等到有重要个事体以后，侪会得难板去拍照片，可以说是千年难板。
后首唻，由于国家逐步个开始搞改革开放，屋里向个经济条件因此也就一天要比一天好得邪气多个，还由于家父陆吉良勒年轻个辰光，就是交关爱好摄影迭桩事体个缘故，伊勒最初个辰光，则是向别人借照相机拍摄各种照片个，等到吾屋里向也能够拥有一台照相机以后，最先拥有个就是一台傻瓜类型个照相机，覅管是勒爷爷奶奶个屋里，还是勒外公外婆个屋里，还只要是爷爷奶奶外公外婆个屋里有过年过节有大聚餐会个辰光，就会帮双方老人拍摄好几张照片个。尤其是每趟勒拍照片个辰光，镜头里向个外婆，总是开心得合覅拢嘴个。
吾以及搭大吾五岁个亲大哥陆明，曾经侪有偷偷摸摸个拨自家个外婆有去偷拍过照片个，只拨过，外婆伊老人家搭伊个一双眼睛就好像是贼骨头一样个，每一趟侪是会拨伊察觉到，也侪是以失败而告终个。既覅管勒啥个辰光个里向；也覅管外婆个年龄到底有多少；伊反应始终是交关灵敏个，坚决覅允许吾伲去偷拍伊，伊讲勒拍摄照片个前头，事先就要拨伊自家个衣裳搭头发弄整齐干净以后，侪可以去拍摄照片个，实际浪外婆始终是一个邪气爱干净爱清爽个人，就勒拍摄照片个前头，伊绝对是覅再需要去梳妆打扮眼啥个，可是伊本人每一趟勒拍摄照片个辰光，始终侪是覅哪能放心个，总归还要去弄得更好，会勒镜子前头照一照，一直要等到伊自家感觉到交关满意为止。
要是去谈论脾气秉性方面，相比之下而言，外婆就要比外公外向得许多哦，伊老人家只要是勒身体良好个状态之下，更愿意去搭大家多讲一眼眼个闲话，外婆更愿意搭任何一个认得伊个人，去谈谈山海经（聊天）。只拨过，每趟勒搭大家谈论个辰光，伊始终侪会有迭能个一条做人原则搭言行准则个，伊曾告诉吾讲，谈论归谈论，伊既永远覅会去谈论某些个人或某户人家里向个某些家长里短，也覅会去讲某某人覅哪能好、覅大灵光个地方，总归去讲人家好个地方、自家所晓得个各类人事物情……伊曾经还对吾唻讲道：“任何一个人，多多少少侪有错误搭缺点个，覅要老是盯牢人家错误搭缺点个地方覅放，去讲人家错误搭缺点的地方，迭能个一种做法，既是覅好个，也是覅对个，要多去看看人家好个地方，多去讲讲人家好个地方！”……
当辰光走到今早仔，吾侪刚刚发觉并去意识到，外婆尽管是一个目不识丁呒没啥个工作个家庭妇女，伊要么覅去开口讲各种闲话，一旦伊要是开口、讲起各种闲话唻个辰光，绝对是一套又一套个，吾伲还覅一定能讲得过伊个，伊可以讲得侬呒没一眼办法好去反驳伊，就勒所讲个闲话当中，就有覅少个闲话，还包含着邪气丰富个哲理性个。每当外婆交关开心个辰光，伊还会去找人寻开心，还会搭对方去开一些邪气高级个玩笑，去讲一些笑话拨每个人听，一些低级无趣味个闲话，从唻呒没听伊去说过一句，伊就“好像是一个幽默大师”。
就让吾列举一两个例子，唻加以说明外婆“像幽默大师”。
第一个例子就是：当吾个亲侄子陆昊年龄勒一岁半到两岁左右个辰光，侄子就会开始讲一眼简单个短语搭短句。每趟仔家母带上吾以及吾个侄子去探望外婆个辰光，外婆看到陆昊以后就会变得交关开心，还会去寻伊开心个，一边笑着一边问侄子：“喂喂喂，小朋友侬唻啦，欢迎侬唻堂头白相相哦！喂喂喂侬是几号啊，侬是六号（陆昊）哦，侬一定要记记牢啊，覅管啥人唻问问侬，侬只要去回答伊拉，吾是六号（陆昊）就好，千万覅要去忘记忒啊！”……只因为侄子个名字“陆昊”，勒沪语方言闲话当中，搭“六号”个读音是一式势样个，几乎是呒没啥个区别个，所以外婆侪会寻侄子开心、“戏耍”侄子。
第尼个例子就是：就自从掰搿辰光开始起，还勒相当长个一段辰光里向，只要是吾每个号头独自一个人去探望外公搭外婆个辰光，伊老人家“眼扳数要唻寻吾个开心”个，伊只要是一看到本人以后，就会率先开口用沪语方言唻讲迭能个闲话，曰：“哦呦喂，‘高桥爷叔’侬唻白相啦、‘高桥爷叔’侬今早仔又唻堂头白相相啦！”……
勒起先头个辰光，当吾听到外婆勒讲迭句闲话个辰光，由于自家就是属于有一眼眼愚笨个缘故，还因为吾搭同辈个亲眷做比较，就是顶覅聪明个一个人，总会去觉得外婆所讲个闲话是覅大好个，心里向还有一眼眼个覅大开心哩，等到外婆询问吾并加以解释说明以后，此时个吾就侪是释然覅再去介怀。伊就询问道：“侬老底子是居住勒啥个地方啊？！”吾就对外婆回答道：“吾老底子是居住勒高桥古镇浪个。”伊又继续唻询问道：“侬侄子要叫侬一声啥个呢？！”吾接下去回答道：“伊自然要叫吾一声爷叔咯！”外婆就解释道：“因为侬本人老底子是居住勒古镇高桥上头个，侬侄子要喊侬一声爷叔，所以吾就要叫侬一声‘高桥爷叔’嘛，吾之所以要迭能样子去做，既呒没去讲错忒，也呒没做错，侬讲吾讲得到底是对覅对啊？！”……
上段沪语方言个意思就是讲：因为吾顶早是居住勒浦东最东面高桥古镇浪个，吾个侄子要叫吾一声“爷叔”，【备注：上海人一律拨那些叔叔一辈个人叫做“爷叔”。】所以外婆就叫吾一声高桥爷叔。
起先头吾听到“高桥爷叔”迭组词眼，之所以心里向会覅大开心，只因吾晓得迭组词眼个唻历。虽讲“高桥爷叔”迭组词眼是由中华民国时期上海滩个大亨杜月笙叫出名个，闻名上海个。只拨过，勒杜月笙未曾出生前，勒最初个辰光，迭组词眼，只流行于原唻个川沙县地区，高桥镇原唻是属于川沙县个管辖，而且勒最初个辰光，迭组词眼个含义是邪气覅好个。据讲勒老里八早个高桥古镇，辰光顶顶起码也要勒杜月笙出生前头，勒高桥镇上有一些专门从事“坑蒙拐骗”行当个人，大家对于从事迭种行当个人，勿单单是恨之入骨，还对迭一类人起一个覅好个外号就是叫“高桥爷叔”，只要是大家听到有人叫某个人是“高桥爷叔”，自然就会让周遭人群变得警惕起唻！……
当文章撰写到迭个辰光，已经是快要接近文末哦，吾勒末脚还要再去列举一个有关于外婆方面个例子，唻讲讲外婆是哪能个人。
勒辣末，吾还要去讲讲迭能个一桩事体，迭桩事体就是－－关于外婆搭外公迭两位老人家奉献爱心个故事，尽管讲外婆搭外公个经济条件并覅是属于交关好、邪气宽裕个，还尽管讲像迭能个一桩小事体，对于其他人看唻，根本就是属于微不足道不值一提个小事体，侬拿出唻讲伊做啥事体？！只是吾却覅是迭能唻认为个，吾却认为绝对是值得吾伲小一辈好好较唻学习学习个，绝对是言传身教个好教材！
吾个外公搭外婆就是属于邪气拥有爱心个人，比方讲：就勒两位老人家所居住个小区里向，就有一户人家祖孙三代共处一室，原先迭户人家是居住勒二室一厅个房子里向，迭户人家也是属于交关普通个一户人家，因此讲迭户人家个经济条件并覅是邪气好，因为孙子检查身体得血癌，只为能让自家个孙子去看好迭个毛病，就拨原先个房子置换成一室一厅，还是居住勒同一个小区里向，就算是迭能样子吧，既觉得铜钿还是覅够用，还觉得呒没铜钿以后，就难以治好孙子个病。小区里向个邻居晓得迭桩事体以后，大家互帮互助纷纷慷慨解囊捐款，尽管讲外公搭外婆自家个经济条件也覅是属于邪气好，也同样是属于一户普通个人家，但是等到迭两位老人家晓得迭桩事体以后，也从自家个牙缝当中省下人民币50块，捐款拨迭户人家，而且还是由外婆亲自送到迭户人家屋里向去个。覅仅迭能，像迭户人家也同样是晓得外婆是一个呒没啥个经济收入个家庭妇女，依靠个就是外公个退休金过日脚个，一边流泪，一边覅肯接受，要还拨外婆，外婆坚决覅同意，讲无论如何也要收下50块，迭是代表吾伲屋里向个一眼小心意，还开玩笑个对迭户人家唻讲，侬是覅是嫌隙吾伲铜钿拨得邪气少个缘故，所以覅肯去接受啊！……迭户人家呒没办法，只好接受50块……
覅管用多少文字去记录外婆，覅免会有挂一漏万个地方，尽管是迭能样子，吾还是要以顶平淡搭朴素个文字，去描绘吾所晓得个外婆，同样也是谨以此文，唻缅怀已弹老三11年之久个外婆张榴妹！
【备注：①：文章为作者原创；②：所有个外公外婆搭大娘舅图片侪是作者自家翻拍个；③：各种水果类图片侪是来唻源于网络上头：④：万分感谢原创图片。】
杜老倌侠客居（陆伟）写于2019年09月04日礼拜三夜里向
