如风往事之——閒话“零拷”迭桩事体
当历史呃车轮走到嘞今早仔，恐怕对于出生勒拉上嗰世纪90年代呃一辈人唻讲伐，“零拷”迭嗰词语是一嗰邪气陌生呃词汇嘞，就算吾伲畀迭两嗰词语写畀伊拉看看，还覅一定会晓得是啥呃意思。
迭嗰词语勒拉今早仔，几乎可以畀放进“文字博物馆”当中去嘞，伊所要表达呃意思搭含义就是勒拉讲：迭嗰字眼勒拉沪语方言閒话当中，畀广泛呃运用到嘞搭各种液体、半液体么事（物品）有得关系呃当中去嘞。勒拉国家还身处勒拉计划经济呃年代里向，勒拉掰搿辰光，各种物资侪都覅是交关丰富多彩呃，商品是邪气紧缺呃，勒拉各式各样呃商店里向，就畀各种散装商品，侪都是去按照分量唻售卖呃。就连得各种液体搭半液体，伊也同样是迭恁样子唻操作、唻做呃。
笔者是土身土长呃上海人，勒拉笔者所在呃城市，“零拷”也是有得伊呃计量单位呃，伊最最小呃计量单位就是——“两”字。
打嗰比方唻讲伐：勒拉北方语系词汇当中，如果是大人勒拉吩咐自家呃小囡去买一眼眼酒回唻，就会得对伊去讲道：“今天家里唻嘞一嗰（些）很重要的贵客，你就上酒铺子里面打一斤二锅头回唻噢！”假使讲，勒拉笔者所在呃城市，大人就会得迭恁样子对自家呃小囡唻讲道：“今早仔吾伲屋里厢唻嘞人客，覅用讲眼扳数要留伊拉喫顿把夜饭呃，囡囡乖，豪扫拿好老酒瓶去烟纸店零拷一斤五加皮。”
勒拉掰搿辰光，但凡是搭“零拷”有得关系呃，基本哴向价钿侪覅是顶顶大、顶顶贵呃，侪都是属于“零拷生意”、“小生意”。伴随着辰光呃覅断前进、还伴随着超市搭网络销售呃逐渐流行起唻，老底子“零拷”迭种销售模式，正勒拉逐渐淡出嘞吾伲呃视野嘞。
就勒拉老底子、勒拉俗常生活当中，与此同时国家还身处勒拉计划经济呃年代里向，基本哴向样样么事侪都可以去零拷呃，是有得交关多呃，笔者至今为止还恁够清楚呃去记得，就连得小囡（少年儿童）喫呃各种小零食，也同样可以去“零拷”呃、零售去出卖，是以小包装三角包呃形式出现呃。就勒拉笔者呃少年时期，就购买并喫过“鱼皮花生”、“无花果”、“盐精枣”、“牛肉干”、“拷扁橄榄”……等小零食。迭些小零食，有一些是自家买唻喫呃，还有一些是亲眷买畀嘞笔者喫呃。但畀过，“零拷”最最主要呃还是以零拷各种液体类物（商）品为主。就打嗰比方唻讲伐：“零拷各种烧小菜呃油”、“零拷酱油”、“零拷醋”……是每家每户畀覅可少、覅可或缺呃。
对于覅同呃零拷类么事，所使用呃容器也是覅大一样呃。还比方去讲：去零拷油、醋、酱油类液体，勒拉通常情况下头，侪都是用老酒瓶去零拷得唻呃；要是去零拷“甜面酱”、“花生酱”、“芝麻酱”……之类呃酱料也同样是有得呃，迭呃辰光，覅是用饭碗零拷得唻呃 就是用钢精锅子零拷得唻呃，勒拉掰搿辰光是呒得啥呃塑料桶呃，是覅畀去担心因畀塑化（剂）污染，从而去影响到自家呃身体。
对于某些邪气了解上海滩哴向呃历史搭人事物情呃外省市人唻讲伐，畀伊拉看到嘞“零拷”迭种情形以后，弄嘞覅好就会得畀伊拉唻讥讽去讲道：“上海人做人也太小家罢气嘞，一眼啊覅够大方，买卖么事还要去零拷。”……实际哴向，迭种做派，上海人有得一种称谓叫做“做人家”，就是一种勤俭节约呃好腔调，是会得过日脚、精打细算过日脚呃腔调，搭国家主席提倡勤俭节约、覅要大肆呃去浪费绝对是一脉相承呃，上海人历唻就有得精打细算做人家呃好传统。
要晓得，除忒笔者上述去讲道过呃各种液体类物（商）品搭喫呃各种小零食可以去零拷以外，勒拉掰搿辰光，就连得勒拉俗常生活呃方方面面，侪都可以去触及到“零拷”、侪都搭“零拷”是有得关系呃，绝对可以去讲是应有尽有。再继续去打比方：大到室内装潢所使用呃涂料、油漆、胶水等等，也同样是有得零拷呃，小到雪花膏、生发油、发蜡、汏头膏……也是一色似样是迭恁样子好去零拷呃。勒拉文化用品方面：各种墨水、黏贴用呃浆糊……也同样是可以去零拷噢！今早仔呃人很有可能是呒得办法、覅可去想象呃，呒想到老底子呃人，伊拉勒拉掰搿辰光去过日脚，覅管啥呃么事侪都可以去零拷呃。
笔者始终会得去觉着，各种大呃生意是一种生意，虽然“零拷”也是一种生意，极有可恁是一种邪气覅起眼呃小生意、微不足道呃，也是一嗰时期里面或某嗰时代独有呃物品搭商品销售特征，也是有得伊呃优点呃，伊呃优点那就是——可以去减少包装、按需求与按照份数去购买，大大呃去减少嘞对于各种物剩呃浪费程度，相比较而言，伊呃价钿又好去便宜一眼眼，绝对是值得大力去推广呃，更可以讲是利国利民利己呃好事情，真呃可谓是一举多得、好处多多哩！顺大便去请问一下，像迭种介么好呃一桩事体，为啥何乐而不为之？！
笔者仍旧恁够清楚呃去记得，勒拉自家读小学呃辰光，国家还身处勒拉计划经济呃年代里向，父亲是勒拉县城上班呃，伊一嗰礼拜只好回唻一趟，平常一到五呃日脚里向，侪都是由姆妈唻烧夜饭呃，一旦各种烧小菜呃调料使用得覅大多、只剩下唻一眼眼嘞，就会得搭姆妈一道去烟纸店零拷各种调料回唻。去零拷过醋、酱油、烧小菜呃菜籽油、烧小菜用呃料酒……吾还恁够去记得，经常去零拷呃迭爿烟纸店，里向侪都是上嘞年纪呃女性营业员（服务员），是呒得啥男性营业员（服务员）呃，就勒拉其中还有得吾呃小学同学王巍呃奶奶。
勒拉零拷各种液体调味料呃辰光，伊拉一只手拿着老酒瓶，再勒拉老酒瓶呃上头还套着一只漏斗，记得勒拉最初呃辰光，漏斗是竹制呃，后末唻就改为塑料呃，另外一只手就拿着同样是竹制呃量勺伸进或陶器呃大甏里面、或大呃铁铅桶里向，【备注：勒拉掰搿辰光，各式各样呃液体调料多数侪都是放勒拉大呃陶器甏里向呃。】然后飞快地去提起唻，通过漏斗倒入到老酒瓶当中，基本哴向僎是用覅着再去称啥呃分量嘞，只因为称量各种液体呃勺子，侪都是特制、定做、事先就去设计好嘞伊呃分量搭大小嘞，是绝对覅会得产生啥呃差错呃。营业员（服务员）只要依照顾客拷液体调料呃需求搭分量，伊就晓得嘞，吾到底要勒拉甏里向，舀几趟、几勺子，而且速度是邪气快呃！
还记得，勒拉掰搿辰光里向，大家基本哴向侪都是交关老实本分呃，凡是偷鸡摸狗以次充好坑蒙拐骗一类事体，“绝对是”覅大会得去做呃，一旦去做嘞事体败露嘞以后，勿单单是坍遭水呒面子呃一桩事体，而且勒拉掰搿辰光还是熟人社会，人与人之间几乎侪都是认得呃，还会得畀别人家勒拉背后头去指指点点一番，某些邪气搭伊要好呃亲朋好友们，晓得嘞迭桩事体后，尽可恁去做到少接触、少往唻，要是路哴向远远较看到伊，就会得像躲瘟神一样压压较避避开。
但畀过，也同样是有得例外呃人、发生例外呃情况呃，就是勒拉掰搿辰光，吾伲经常去光顾呃迭爿烟纸店，勒拉其中有得一位上嘞年纪呃中老年营业员（服务员），【备注：勒拉掰搿辰光是做一休一，伊是一嗰退休返聘人员。】凡是只要是伊当班呃日脚里向，就做起嘞以次充好坑蒙拐骗呃勾当。之所以要迭恁样子去做，搭掰搿辰光提出嘞多劳多得、多多呃去售卖出各种么事搭商品，就好多拿工资奖金，多多少少还是有得一定呃关系呃。为嘞让迭爿烟纸店恁够去多赚一眼眼铜钿，就勒拉各种液体调料当中，去大量呃添加嘞烧开呃、凉透呃白开水，因为勒拉掰搿辰光，白开水呃价钿好好较要比各种液体调料唻得便宜，多多呃去添加凉白开水，就好赚取差价、多赚一眼铜钿。
伊还自以为是呃去认为，天知地知吾知以外，绝对是覅会得有第三嗰人晓得迭桩事体呃，呒曾料想到呃就是——西洋景畀戳穿忒嘞，事体败露畀别人家举报嘞伊，讲伊勒拉做以次充好坑蒙拐骗呃事体，买回去呃各种液体调料咪道侪是覅对头呃。经过上级部门认真仔细呃调查以后，事体的确是迭恁样子呃，本人还坦白唻讲道，刚刚开始呃辰光，还是有一眼眼心虚吓势势呃，辰光一长久而久之，并呒畀别人家去发觉，胆子就变得越唻越大嘞，上级领导就畀伊开除忒嘞！
勒拉掰搿辰光、勒拉覅同呃季节里向，“零拷”也有得覅同呃风景线，一到天气炎热呃热天季节里向，真呃可以去讲是“热煞脱嘞”，就勒拉迭嗰辰光，“零拷散装啤酒”就运营而生嘞。每天到嘞夜快头，辰光么大约摸是勒拉夜快头五六点钟往里，四周围呃居民，脚哴向趿拉着木拖板、海绵拖鞋，上身穿着背心、老头衫，手里向拎着空呃老酒瓶或热水瓶，去“零拷啤酒”，大多数人家是拎着热水瓶，某些邪气欢喜喫喫小老酒呃人家，拎一只热水瓶恐怕是覅够呃，弄嘞覅好就要去拎两三只热水瓶唻，队伍排得老老长，长长呃队伍弯弯曲曲蜿蜒曲折，假使讲，排队呃队伍当中，前后头是邪气熟悉呃邻居搭朋友，伊拉会得一边排队零拷啤酒，一边嘎嘎讪胡谈谈山海经，讲讲近抢把自家所晓得呃各种趣闻轶事，是市民夏天生活中呃一道风景线！
各位看官们，千万覅要去小看嘞零拷啤酒噢，那些散装呃啤酒通过量勺慢慢较灌入到老酒瓶、热水瓶当中，泡沫相对而言就会唻得稀少一眼眼，咪道也会变得清淡苦涩，买啤酒呃顾客，还会得忒惠关照一下营业员（服务员），灌啤酒呃辰光，请侬动作稍微做得慢一眼眼，覅要去做得忒快，就好去减少一眼眼啤酒呃泡沫，凡是那些拎得清呃营业员（服务员），覅用多讲点啥呃，动作侪是慢呃，零拷啤酒呃价钿也仅仅只有一角洋钿，迭嗰价钿吾哪恁会得晓得介么较清爽呃呢？！侪都是由屋里厢那些邪气欢喜喫喫老酒呃亲眷告诉畀嘞笔者呃。
同样也有得经过呃路人，要是今早仔伊觉着天气交关热，可以讲是“热煞忒嘞”，勒拉烈日下头走得口干舌燥嘴巴有一眼眼干嘞，也会得去“零拷一杯啤酒”，倚靠勒拉排门板上头，喫啤酒解暑。
……
今早仔，虽然“零拷”已经是“不复存在嘞”，但是还是真心呃去希望“零拷”又恁恢复起唻，因为“零拷”勿单单是相对而言价钿便宜经济实惠，而且还邪气环保唻，更用覅着担心因么事太多喫覅忒，而去浪费忒，总而言之可以讲是一举多得好处多多，“零拷”搭今早仔呃国家提倡节约型呃社会，是一脉相承呃，何乐而不为之？！
【备注：①文章为作者原创；②各种和文章有关的图片均来源于网络上；③感谢原创图片。】
杜老倌侠客居（陆伟）写于2020年11月03日星期三晚上
