【幽默】乱噏廿肆12

    英姐系余仔老婆，半年前休完产假调到阿飞商店。当晚就约齐好耐无联系嘅国仔，余仔一家三口到第十甫陶陶居饮夜茶，畅聚别后近况，同各自新工作单位。余仔出狱后怕继续留喺本单位影响英姐，通过关系搞跨单位调动去咗一间建筑构件厂。夜茶买单嘅时候阿飞要揞钱，英姐阻止佢：“阿飞你客咩气啫？我两公婆当你亲细佬咁，你中意可以认我做家姐咖。”搞到阿飞满面飞红。

　随着经济改革继续深化，宜家商店几方面都好大变化。各国营企业基本都卸包袱式打破大锅饭，日用公司各商店实行经济独立核算，自负盈亏。经营讲究效益考核，将原来商店经理老汤调走，调嚟公司里面做生意最有办法嘅陈经理。汤经理将近六十岁，未结过婚，系个党员。阿飞老窦同佢共过事，话佢个人好难相处，事事讲原则唔留情面，公司里背后都叫佢“汤军”。阿飞嚟之前都觉得唔结婚嘅人多少都会有毛病。喺佢领导下工作几年，却觉得汤经理事事亲力亲为，搬仓盘点，跟车提货从不甘落人后，而且并不如传闻咁严厉，总系亲切对待每一位店员，开会谈话总带和蔼微笑由笑语开场，从佢身上阿飞睇到党员真系唔一样。出纳杨姨，商店工会组长刘姨，老店员树伯，武侠小说唔离手嘅光叔，一个刚从山村出嚟顶过身老窦职嘅乡下姑娘群群，一个少块润嘅超龄大青年马佬，经常讲啲九唔搭八失心疯嘢，让大家常常哭笑不得。加上英姐，阿宝，阿飞就系成间商店员工。

　阿飞同英姐当班，两人拍档齐心协力，快手快脚，好快就做成生意打发顾客。无客人嘅时候，英姐都好中意回忆做知青啲快乐时光，青春岁月，沉浸喺过往嘅初恋。有心酸有喜悦，阿飞都俾佢感染嗮，佢最喜欢听年纪大啲人讲旧时，英姐话哩啲事唔能够俾老公知，只能够讲俾阿飞听。英姐仲买嚟零食请阿飞，一边食一边讲。天气渐渐热，阿飞最中意去游水，嗰时无读书夏季就天天泡喺西郊泳池。点知染上当下嘅流行红眼病，英姐日日喺屋企煲桑叶白豆红糖返嚟俾佢饮解热毒清肝肺，帮佢滴眼水，唔使佢做嘢住，上班就赶佢去最后面休息。好翻之后又递嚟雪梨：“食多啲水果，好清热咖。”每逢轮到阿飞值夜班，英姐梗为佢买定苹果香蕉各式水果，阿飞想开口讲多谢即刻就俾佢截住：“唔使多谢啊，我同你之间系无多谢咖。你系我细佬嚟嗝嘛。”阿飞感受到英姐可亲可敬嘅浓浓亲情。英姐大阿飞十岁，鹅蛋面，一对幼细嘅峨眉，一双眼睫毛好长嘅凤眼，白暂嘅肌肤。剪咗发返嚟，左摇右摆拨弄住头发，调皮咁问：“好唔好睇啫？我觉得剪成咁，肉酸死啦。”到下次要飞发，又问：“你话我剪咩发型好睇，你做细佬我听你嘅。”阿飞发觉佢有啲少女般可爱。

　 喺群群面前阿飞成个大哥哥咁，佢份人无机心，唔会睇唔起乡下人，虽然群群实在乡里乡气。一齐当班阿飞都主动同佢倾计，问人乡下边处，有咩名胜古迹，农家特产，乡村野味，虽然群群啲乡下话讲唔清。拍档做粗重嘢阿飞都护住佢当佢小妹妹，虽然群群身体都好粗壮。群群山村出产草席，家家户户都会编织图案斑斓，色彩艳丽，手工精美嘅草席，群群更是个中巧手。每次喺阿飞旁边，佢都系含羞答答，通脸绯红，呼吸紧张。阿飞觉得乡下出嚟女仔大都咁样不足为奇。秋天嚟嘅时候，群群鼓起勇气带咗张好用心为佢编织嘅草席返商店送俾阿飞。阿飞话：“我俾返钱你啦。”群群羞到头昏脑涨，好耐先识讲：“我帮你织咖。”阿飞返到屋企打开张辘架床，铺开张草席，上面用赤红，墨绿，干黄几色水草，编织出四个苍劲有力嘅精美大字“龙马精神”。阿飞知道群群对自己有意思，但佢唔理解哩张草席系一颗女仔嘅心。

　陈经理系个独眼龙。未嚟之前，同佢一辈嘅刘姨，树伯哋就疯传佢因为独眼搵唔到老婆，几年前搞大个回城无几耐嘅女知青个肚，生米煮成熟饭同佢生咗个仔嘅艳闻。嚟到商店当经理，初头几个月果然同客轮公司做成好多单大生意，将商店营业额大幅度提高咗好多，职工都尝到除摞工资外又摞奖金嘅甜头。陈经理开始以救世主自居，俨然似太上皇般，颐指气使店员工作，时不时呼喝，甚至谩骂店员。对阿飞就安抚拉拢，因为要经常指使佢去跟车提货专做粗重工夫。半年之后，佢挪用商店大部分流动资金，从南海大沥梗硬进货三万几文生锈镀锌铁线，轧死嗮喺仓库，根本无法销售出去。商店宜家已经好耐无奖金发过，成间商店笼罩住愁云惨雾，个个心灰意冷，人人私底下传陈经理食回扣嚟入哩批生锈铁线。陈经理却满不在乎，每日照旧上班迟到早退，做嘢呼三喝四：“你有无搞柒错啊，咁鸠样做嘢？九十几样唔掂。”“九十几样唔掂”系佢口头禅。阿飞老窦同佢做过同事，阿飞无因由不便发作，反正又唔针对自己，佢份人欺硬怕软。