༢༠༡༧-༠༦-༠༧
༄༅།། ཀ་རྩོམ་དད་པའི་གདུང་དབྱང་།
ཀ༵་དག་ལྷུན་གྲུབ་ཟུང་འཇུག་རོ་མཉམ་རྣལ་འབྱོར་རྗེ། །
ཁ༵་ཙམ་མིན་པའི་མཁས་གྲུབ་བྱེ་བའི་གཙུག་གི་རྒྱན། །
ག༵་ས་གང་དུ་མཚན་གྱི་སྙན་པ་འབྲུག་ལྟར་གྲགས། །
ང༵་བདག་འཛིན་བྲལ་མཁན༵་ཆེན༵་ཆོས༵་ཀྱི༵་གྲགས༵་པ༵་རྒྱལ། །
ཅ༵་ཅོ་གཞན་གྱི་རྗེས་བརྗོད་མ་ཡིན་མཁྱེན་རབ་ཀྱིས། །
ཆ༵་ཤས་ཙམ་ཡང་འཁྲུལ་མེད་རང་ལུགས་གཙང་མ་བསྐྱངས། །
ཇ༵་ཡུན་ཙམ་ཡང་གཡེང་མེད་བསྟན་དང་འགྲོ་བའི་དོན། །
ཉ༵་རྒྱས་ཟླ་བཞིན་འཛིན་མཛད་ཐུབ༵་བསྟན༵་ཆོས༵་ཀྱི༵་གྲགས༵། །
ཏཱ༵་རེ་ལྷ་མོས་ཞལ་གཟིགས་ལུང་བསྟན་དངོས་གྲུབ་ཐོབ། །
ཐ༵་མལ་རྣམ་རྟོག་ཀུན་ཟད་གདོད་མའི་མགོན་དང་མཉམ། །
ད༵་ལྟར་བསྟན་འགྲོའི་དོན་ཀུན་འབད་མེད་ལྷུན་གྲུབ་ནས། །
ན༵་རོ་པཎ་ཆེན་ཇི་བཞིན་ཆོས༵་ཀྱི༵་གྲགས༵་པ༵ར་འདུད། །
པ༵་གོར་བཱེ་རོ་ཙ་ན་ལྟ་བུས་མདོ་རྒྱུད་ཀུན། །
ཕ༵་རྗེས་བུས་བཟུང་མ་ལུས་ཐུགས་ལ་ལྷག་མེད་མཁྱེན། །
བ༵་གླང་སྤྱོད་སོགས་སྲིད་གསུམ་འགྲོ་བ་སེམས་ཅན་ཀུན། །
མ༵་ཡིས་བུ་ལ་བརྩེ་ལྟར་མཁན༵་ཆེན༵་ཆོས༵་ཀྱི༵་གྲགས༵། །
ཙ༵་རི་མཇལ་སྐོར་སོང་ལྟར་བསྟན་དང་འགྲོ་བའི་དོན། །
ཚ༵་གྲང་དཀའ་སྤྱད་ཇི་བྱུང་མ་ལུས་ཁྱད་དུ་བསད། །
ཛ༵་དྲག་འདྲེ་གདོན་མི་དང་མི་མིན་ཀུན་བཏུལ་ཏེ། །
ཝ༵་ལེར་ཆོས་ཀུན་རྟོགས་པའི་ཀུན༵་མཁྱེན༵་ཆོས༵་ཀྱི༵་གྲགས༵། །
ཞ༵་ལུ་ལོ་ཆེན་བཞིན་དུ་ཤཱཀྱའི་བསྟན་པ་ལ། །
ཟ༵་མ་ཏོག་སོགས་བརྩམས་ལྟར་སྒྲོལ་མ་ཡུམ་ཀ་སོགས། །
འ༵་འུར་སྙན་གྲགས་སྤངས་ནས་མདོ་རྒྱུད་དགོངས་འགྲེལ་མཛད། །
ཡ༵་མཚན་རྨད་བྱུང་གྲུབ་བརྙེས་པཎ༵་ཆེན༵་ཆོས༵་ཀྱི༵་གྲགས༵། །
ར༵་བ་ཁམས་གསུམ་འཁོར་བར་ཆུད་པའི་སེམས་ཅན་ཀུན། །
ལ༵་ལུང་འཁོར་བའི་རྒྱ་མཚོ་བརྒལ་བར་དཀའ་མོད་ཀྱང་། །
ཤ༵་ཟ་བདུད་རིགས་ཡིན་ཡང་མ་ལྟར་བརྩེ་བ་ཡིས། །
ས༵་ལམ་རིམ་བཀོད་དེད༵་དཔོན༵་ཐུབ༵་བསྟན༵་ཆོས༵་ཀྱི༵་གྲགས༵། །
ཧ༵་ཅང་མྱུར་བའི་ལམ་མཆོག་འོད་གསལ་རྫོགས་ཆེན་གྱི། །
ཨ༵་ཏི་རྣལ་འབྱོར་མཆོག་གྱུར་སྲིད༵་པ༵་གསུམ༵་ན་རྒྱལ༵། །
ཧ༵་ཅང་བཀའ་དྲིན་ཆེ་བའི་ཕ་གཅིག་བླ་མ་ལ། །
ཨ༵་ལུ་ང་ཡིས་རྟག་ཏུ་གུས་པས་གསོལ་བ་འདེབ། །
ཅེས་པ་འདིའང་མཁན་ཆེན་དམ་པའི་ཞབས་ཀྱི་པད་མོ་སྤྱི་བོར་ལེན་པའི་རྡོར་བྲག་དགོན་གྱི་གྲྭ་པདྨ་མཆོག་གྲུབ་ཀྱིས་བྲིས་པའི་དགེ་རྩས་འགྲོ་ཀུན་བདེ་ཆེན་ཞིང་དུ་སྐྱེ་བའི་རྒྱུར་གྱུར་ཅིག། དགེའོ། དགེའོ། དགེའོ། སརྦ་མངྒལཾ།
