【幽默】乱噏廿肆38
过完年，阿鸡又带队女同学拜访光明路，去到老懵间老旧木屋相聚。今次商定去郊外旅游，初步决定坐船去西樵山。啱换到千几文喺手，又系坐游船出外玩，阿飞今次极力赞成。按约定一个礼拜后，同学们集中去阿飞屋企夹钱确定人数，大队长带埋个有前有后唔要罢就嘅女朋友嚟，连4个女同学共12个人。阿飞老窦攞自己屋企炸嘅过年煎堆招呼同学们，个个都话好食非常，食嗮阿飞准备食到清明嘅一大米缸油角煎堆。
大队长个名系学校组织去青年电影院睇《黄河少年》，因为同戏里面个伪军大队长相似而嚟。阿飞喺学校太过百厌嚣张，班主任老师将佢张戏票俾咗自己个老公睇，阿飞所以至今都唔知伪军大队长同明兴里小学大队长到底有几相似。大队长住喺阿飞右边，相隔连元里，喜居里两个巷口，同对面马路阿庆屋企门口对门口。大队长系一家西关大地主，大老婆哩房嘅子女，屋企单家独院挨住光明路一栋高楼边，连地下三层都系佢屋企，地下铺面因为划咗资本家成分，被房管站经租做咗雪铺，夏天好多三轮车嚟运雪块。佢系独仔，全家都系女，家姐又多又泼辣，家姐男朋友亦多，喺光明路无人敢虾佢，即使佢唔出街同大头民，阿庆哋玩。佢一家人睇唔起农村嚟嘅卜佬，即使阿庆就住喺对面屋咁近，大队长有佢想去嘅地方。
大队长香港亲戚多，身上着亲都系亲戚带返嚟法国名牌无敌娇，话系真丝所制，烟火不侵。阿飞唔食烟，自己又无香港亲戚俾佢着过，一直未试到此话真假。同学们上到佢屋企，佢会攞好多香港亲戚偷带入嚟嘅《老爷车》、《南风窗》、《龙虎豹》黄色画报出嚟俾大家欣赏，里面全部啲放浪形骸大家都系第一次见，心跳到好似裸露嘅唔系画报里面嘅女郎，而系自己嘅思想，感觉将身心嘅肮脏暴露嗮被人知，佢啲家姐细妹就坏坏咁喺一旁偷笑。可能屋企女人多，大队长比较早就懂人事，读初中就识去屐场沟女。
大队长有一对炯炯有神大眼睛，声如洪钟，身材同阿飞，钩鼻佬3个一样咁高咁大。佢同钩鼻佬尤其死党，读书时候就形影不离，打交一样勇。唔使讲，钩鼻佬出人意表学踩雪屐，大队长绝对系一个诱因。啯锅喺屐场撩女仔俾人哋班仔群殴，佢两死党以寡敌众，并肩奋战，两个打人家十个居然毫发无损全身而退。
哩晚大队长个女朋友燕秋带咗几个女仔出嚟玩，佢哋相互扶住喺场边学踩屐，其中有个黄蜂腰甴曱肚，身材好似熟透嘅苹果，叫姣婆猪，佢已经可以依住围栏兜圈，单独一个人踩。有几个男仔喺场内追逐，溜喺前面嗰个去到落斜坡急沉快起，突然一个趔趄稳唔住，同喺栏边嘅姣婆猪撞成一堆。钩鼻佬飞身滑埋去拉开佢哋，见个男仔身材高大，浓眉大眼，头发淡淡哋发黄，一脸英气。佢见钩鼻佬嚟拉佢，好恶咁大喝一声：“未郁手啊！”钩鼻佬正想发作，大队长赶嚟一睇，原来系自己条女燕秋带河路嘅街坊，兼小学同班同学。燕秋亦一路跑嚟一叠声叫：“识得咖，识得咖。”
个男仔叫“鬼佬”，神情举止放肆，个个都睇唔在眼，一副全场佢打嗮咁款，唯独对姣婆猪生滋猫入眼：“求先唔好意思，无整亲你吖嘛？我带你踩。”讲完一手拖起一脸娇羞嘅姣婆猪，脚下一踩就滑入场中：“你叫咩名？”
姣婆猪对鬼佬大有相见恨晚感觉：高大靓仔，英气勃勃，性格豪爽单刀直接。踩屐技艺娴熟，令人惊心动魄，令你窒息刺激，系从未有过咁好玩，佢握实自己只手好有力好有力。
姣婆猪好快同鬼佬玩到烂熟，经常跟佢返屋企。鬼佬个老窦早好多年前去咗卖咸鸭蛋，个老母理佢唔掂，鬼佬力大如牛，仲识几下散打话系咏春拳，喺长寿路，带河路一带好响砣。
燕秋同姣婆猪系同学，大队长同鬼佬臭味相投，成咗老友。少年情侣都好奇男女之间嘅奥秘，而少男少女无畏嘅无知更令佢哋毫不犹豫去探索异性诱人嘅器官。早熟嘅果实一经尝试便一发不可收拾，姣婆猪虽然读紧中学但发育得非常早非常好，身体丰满，好似一个滚圆嘅肉球。佢闻住鬼佬身上嘅汗臭，触摸住佢坚硬有力嘅肢体，情不自禁用两只手指骨钳住鬼佬手臂上啲肉，出力拧啊拧，鬼佬已经精疲力尽正昏昏入睡。热切嘅欲念令佢干脆将鬼佬只食指放入口用牙啃咬，通常动物越感到疼痛就越容易激发起兽性，鬼佬终于又再兽性大发，将青春用激情燃烧，两个依偎相拥无休止无节制，不知疲倦咁觉得新鲜好玩。
一段时间之后，姣婆猪屙尿开始出血，但身体唔觉有咩唔舒服。鬼佬忍咗两日实在忍唔住，又见女朋友无咩大碍，两个人鱼水大欢一场，鬼佬汗水未干，姣婆猪又爬咗上佢身、、、、、、 当晚鬼佬突然感到全身骨肉有酸痛感，人显得特别疲倦懒堕，表现似外感风热症状。随后即出现面黄唇黑，掌心无血，指甲发青。送到医院医生都束手无策，病情一直恶化，最后心肺肝肾衰竭半夜不治身亡。
过后听闻哩种病叫“甲色”，系喺女性月事期间行房而嚟，无得救的。大队长同女友亦沉迷被翻红浪，帐摆流苏，搞到燕秋中学时都做咗锅人流。佢初中之后亦毫无例外入咗老窦单位广州电池厂做工人，当时哩种可能系毕业生对口归位政策，由父母单位负责仔女就业。
经济改革，房地产业始有迹象，西关老城区家家砖木结构，破败残旧，都望能拆迁到自己屋企，几年后回迁就可以住上新屋，补少少钱就烂屋换新屋系当时所有人嘅梦想。大队长屋企唔好彩美梦成真，唔知被街道居委联合边几位博懵家组成嘅拆迁办公司，将喜居里至金公仔巷一片，包括大队长屋企在内拆嗮，要开发新楼盘，预计3年内回迁，大队长一家目前搬离咗光明路，住喺开发商安排嘅郊区城中村。
