ཕ་བླ་མ་དམ་པ།
དེ་རིང་ནི་ནམ་རྒྱུན་ང་ཚོའི་ཆོས་གྲྭ་ནས་རླུང་ལྟར་གྲགས་བཞིན་པའི་འཇམ་དབྱངས་མི་ཡི་གར་དུ་རོལ་བ་ལུང་དང་རིགས་པའི་དབང་ཕྱུག་བླ་མ་རྗེ་བཙུན་ཆོས་ཀྱི་རྒྱལ་མཚན་མཆོག་གི་དགོངས་པ་ཆོས་དབྱིངས་སུ་འཐིམས་པའི་ཉིན་མོ་ལགས་ན། ཁོང་གི་ཡིག་ཆའི་རྗེས་འབྲང་དག་གིས་ཡིད་སེམས་དད་སྟོབས་ཀྱིས་རྣམ་པར་གཡོས་ཏེ་ཁོང་ལ་རྗེས་དྲན་བྱེད་བཞིན་འདུག ཁོ་བོར་མཚོན་ན་ཡང་ནང་བསྟན་རིག་པའི་ཟབ་ཀྱང་རྒྱ་ཆེ་བའི་གཞུང་ལུགས་རྒྱ་མཚོ་ལྟ་བུར་འཇུག་པའི་གྲུ་གཟིངས་ཐོག་མ་ནི་བླ་མ་ཁོང་གི་གསུང་རབས་ཁག་ཡིན་འདུག་ན་བཀའ་དྲིན་བསམ་གྱིས་མི་ཁྱབ་ལ། བརྗོད་ཀྱིས་ག་ལ་ལངས་། ལྷག་པར་ཁོང་གི་ཕར་ཕྱིན་སྤྱི་མཐའ་དཔྱོད་གཉིས་ནི། ཁོ་བོ་གཞུང་ཆེན་ཁག་ལ་འཇུག་བྱེད་ཀྱི་དབྲལ་བའི་མིག་དང་དཔྱོད་པའི་བློ་མིག་རང་ཡང་ཆགས་ཡོད་སྟབས། ནམ་རྒྱུན་རང་ལ་ཆེས་ཁ་ཐག་ཉེ་ཞིང་འགྲོས་འདྲིས་ཆེ་བ་ཡང་ཁོང་གི་སྤྱི་མཐའ་དཔྱོད་དག་ལས་གཞན་ཅི་ཞིག་ཡོད། ཁོང་གི་སྤྱི་མཐའ་དཔྱོད་ཀྱི་གཟི་བྱིན་འོག་ནས་རང་གི་ཉམ་ཆུང་བའི་རིག་པར་འོད་མདངས་རྒྱས་འགོ་ཚུགས་ཤིང་མ་འོངས་པར་གཞུང་དོན་རྟོགས་པའི་ཤེས་རབ་ཀྱི་འདམ་མ་ལྷུག་ཀར་གྲོལ་དགོས་ནའང་ཁོང་གི་གསུང་རབས་ལ་བསྟེན་དགོས་པ་ཡང་སྨོས་མེད་དོ།། དེ་བས་ཁོང་གི་རང་གི་མེ་ཏོག་ཕོག་པའི་ལྷ་སྐལ་ཡིན་ལ། ཁོང་གསུང་རྩོམ་ཁག་ཀྱང་རང་གི་མི་ཚེའི་ལམ་ཆེན་བགྲོད་པའི་རྒྱགས་ཕྱེ་དང་ཚེ་ནོམ་ཉིད་དོ།།
