【幽默】乱噏廿肆53
贵都酒店座落喺繁华而杂乱嘅广州火车站正对面嘅人民北路。哩一度经济改革之后人流量剧增，治安情况恶劣。哩间酒店听讲系新加坡资金产业，啱啱开业都未够一年，洗衣房细到你唔信，占地唔够一百平方，设备更系简陋，员工只得十五个人，其中两个男嘅仲系从乡下嚟嘅民工。休息都无地方，贵都酒店仲喺度边营业边建筑之中，到处灰尘滚滚，所有所有一切都好混乱，管理更混乱，员工餐厅就好似士多小卖部，经常煮生饭甚至无饭菜供应。客房部有一男一女两个服务员经常喺无人入住嘅客房幽会，直到女员工怀孕大肚先被发现。最后男嘅开除咗，女嘅生育期间唔开除得，等到生完仔后安排咗入洗衣房里面，十几岁嘅女仔，宜家喺阿飞手下做员工。阿飞嚟到做督导，日日无所事事，比喺大烫机度仲觉无聊，班婆乸用怪怪嘅眼神张望阿飞皮鞋西裤喺办公室摆款，啯间办公室系就系玻璃屋，不过超细，无所遁形。填填每日嘅衣物吞吐量，布草出入表，检查下清洗衣物有无出错，安排好每月员工休息同工作，就无咩嘢做。哩度同中央酒店一样无冷气，狭窄嘅空间更热，酒店匆忙开张唔知入啲乜鬼廉价设备，烫机，水洗机成日坏，时时刻刻要联络工程部落单修理。茹女系阿飞嘅上司，办公室主要佢坐，阿飞就更无聊，好多时唔知做咩，唔知去边，唔知点好。后尾卒之俾佢发现酒店大堂个厕所富丽堂皇卫生干净，冷气劲凉爽，半天无个人入嚟爆渠爆石。阿飞每日就去霸一间，关实门，放低座厕板坐上去瞌眼瞓，差唔多就去巡下啲员工。西装就无办法着啦，扮唔到罗杰皮得，实在太热，宜家又系春夏相交季节，湿焗翳焖难受，阿飞做督导啲神气热情未到盛夏早就无嗮。
干脆，阿飞放低装模作样嘅架子，帮下哩个夹夹衣，帮下啯个叠叠被，同工友一齐做一齐倾，好快又同新工友熟络嗮，有倾有讲。倾落知道啯两个乡下佬一个叫阿东，一个叫阿新，都喺乡下有一大窦化骨龙要养，嚟到广州咩都唔识先至踎嚟酒店洗衣房哩度。阿飞从佢两个身上觉察到将来生活嘅严峻，感到危机四伏，沉睡心底深处一丝将要熄灭嘅开的士欲望又被点燃起嚟。
五一劳动节，咕咕带阿飞去揾佢啲朋友，参观佢哋嘅画室。佢送咗幅佢自己画嘅西洋油画俾阿飞，阿飞收藏有成几千本公仔书，话自己只系中意白描工笔画拒绝咗，阿飞觉得咕咕带自己周围咁去，好似系想话俾所有人知佢有男朋友。当节日收到咕咕寄嚟嘅热情洋溢贺卡，阿飞十分感动，专门上街拣咗个精美嘅贺卡，用心写上拿手嘅小油诗，想表达清楚两人之间只有纯洁嘅友情：
青山小溪绿，满目枫叶红。
随风飘下来，瞬间了无踪。
芳心如动问：寒暑还与共？
“春秋依常在，友情永相同。”
当晚，咕咕嚟到阿飞屋企。愁眉紧锁，长长嘅秀发披满肩头，样子楚楚可怜。
“收到你寄嘅贺卡啦。”佢幽幽咁讲。
“收到啦咩，啲诗写得点啊？”阿飞逼切咁问。咕咕唔出声。
“你喺边度寄嗝，编码都唔系你条街嘅。”
“哦，喺南方大厦啯边寄嗝。”
“怪唔得。”
坐咗一阵，佢要走，阿飞送佢落楼梯。
“睇你，长发飘飘无嚟精神，成个怨女咁，我仲系中意女仔剪短发。”阿飞随口讲。
几日过后，阿飞喺洗衣房办公室填当日嘅吞吐表，19岁嘅单亲妈妈琳达企喺门口叫：“主任，有人揾你。”高高瘦瘦嘅琳达眼神狡黠：“系个好靓嘅女仔。”
阿飞走出通道，见到咕咕企喺从酒店大堂嚟嘅入口，翻领苹果绿T恤，一条洗磨蓝紧身牛仔裤，一头齐耳短发，被大堂嘅微风吹起前额刘海，纷纷扬扬，一脸少女矜持。
“你今日好精神啊。”阿飞赞道。
“可以入去坐吗？”咕咕大胆咁问。
“可以。”阿飞知道佢咁样做系想让洗衣房嘅女仔知道，佢系阿飞女朋友，因为佢曾经问过阿飞洗衣房多唔多女仔。洗衣房班婆乸众目睽睽咁笈实佢哋，阿飞只好扮嗮嘢咁同佢介绍下洗衣房啲设备。
做过五星大酒店嘅咕咕同阿飞一样感觉惊诧：“哗，哩度咁鬼细嘅。”
等到放工，阿飞当然唔能够带佢去啯间成日无饭食嘅饭堂，去更衣室换低恤衫西裤，喺酒店大堂揾到等佢嘅咕咕，问：“我哋去边度好？”
“我请你食饭。”咕咕讲。
“我请你啦，你过到嚟。”阿飞讲。
“我请你，不过要食便宜嘅。”咕咕坚持到。
两个人踩单车去到人民南路饺子馆，咕咕请阿飞食饺子，食完两人就各自返屋企，阿飞从嚟无愿意多同咕咕喺多一分钟嘅意思。
从此之后，咕咕放学就跑入嚟揾阿飞，搞到洗衣房啲人个个以为佢就系阿飞嘅女朋友，七嘴八舌咁问：“主任，你条女几靓啵。”
仲有啲讲：“主任，你衬唔起人家啵。”
听到阿飞心头火起：“我配唔起佢？、、、、、、”
91年5月16号，阿飞到环市路广州车管所办理咗驾驶证由实习牌转成正式驾驶证。转正之后，想去抓的士嘅惗法就更强烈，怕好唔容易考个车牌返嚟唔去开的士以后会后悔一世，酒店行业无论多么安定，做到咩主任，以自己咁蹩脚嘅学历，点都唔会再有咩发展，成日又重新泡返喺女人堆里，迟早屈都屈死。
一天晚上喺屋企。当时喺中央酒店同一批入职嘅男仔阿明嚟揾阿飞，话小燕佢哋约去玩，叫埋阿飞。阿飞个人有种唔平衡自卑变态心理，内心一直都有啲对小燕埋怨：“你如果系中意我嘅你主动啲唔得咩？”做事绝情，过咗去就真系唔想再见，话宜家喺贵都好忙去唔到。哩个时候，咕咕直接上嚟入到房，阿明一见，以为阿飞原来有个咁鬼靓嘅女朋友，本来仲想翳下阿飞去，当下不再强求，起身就想告辞。阿飞见到咕咕就头疼，想留低阿明打听下中央酒店嘅近况。咕咕拉住佢就撒娇：“你要帮我返学校攞成绩啊。”阿明见状就讲：“你哋去啦，我要走啦，唔阻你哋。”告辞而别。
见阿明走咗，阿飞讲：“我部单车爆咗呔啊。”
“我搭你，晚上又无人捉。”咕咕缠住佢。
阿飞无嗮借口。落到楼下，到底仲系男人大丈夫，无道理真系要女仔搭佢，阿飞骑上单车搭住咕咕去到文德路嘅学校，咕咕入咗去一阵，捧住一卷毕业作品出嚟，展开嚟睇，系幅山村油画，阿飞觉得油画死死实实，不过亦知道西方好流行。咕咕成日叫佢评画，因为阿飞睇好多公仔书经常自认品味高，但对于佢嘅作品就不置可否。
“宜家去边度？”咕咕搭上单车尾。
“无地方去。”
“我想去玩。”
“我唔知边度好玩。”
“你想去边就去边，我唔想咁早返屋企。”咕咕好硬颈。
哩个时候啱啱踩到市一宫电影院，阿飞就讲：“玩无咩好玩嗝啦，不如睇电影啦。”
“好啊。”佢“卜”一声跳落车，捧住啲画卷就去买票。
电影系刘晓庆主演嘅《无情的情人》，阿飞虽然系电影迷，但哩次却乜都睇唔入眼，记唔入脑，影院大厅全部一黑落嚟无耐，咕咕就将可爱嘅小脸贴埋阿飞度斯磨，阿飞伸出左手搂住佢，右手握住佢嘅手，同佢脸贴住脸，诚惶诚恐，迷迷糊糊咁睇完咗出《无情的情人》。散场，咕咕拖住阿飞嘅手出嚟，阿飞系喺屋企匆匆忙忙比佢拉出嚟嘅，着住件旧恤衫，牛头短裤，成个街头散仔咁，仲着住对拖鞋添，拖住身穿淡黄碎花连衣裙，娇小秀丽嘅咕咕难堪到不得了。两个人都默不出声，静静地骑上单车，咕咕双手从后面箍住阿飞，好耐，好耐，温柔咁问：“去边度啊？”
“我唔知，你话去边就去边。”阿飞六神无主，佢接受唔到咁突然而嚟嘅变化，26岁嘅阿飞未拍过拖，唔知何为恋爱，宜家应该点反应？
“揾个地方食啲嘢咯。”咕咕讲。
喺惠福路好多宵夜档嘅地方，佢哋喺榕树底搵到张台仔，叫嘅嘢食唔多：生滚粥，炒河粉，一碟蒜蓉潺菜，一支珠江啤酒。阿飞一啲胃口都无，心跳耳热，由影院到哩度块面都喺火辣辣发紧烧，脑袋凝固，手足无措攞起杯啤酒饮，啲酒停喺喉咙都吞唔落去。
“你真系中意我？”咕咕望住佢，美丽嘅眼睛充满柔情，充满勇气。
佢哋打对角坐，阿飞唔敢面对咕咕，心下发狠：“讲啦，趁宜家讲清楚，你把口平时咁鸠叻。”
“中意。”
阿飞憎到自己死，接落嚟佢唔知要对佢讲啲咩，亦唔知应该点讲，无心，你要佢点讲？
送咕咕返到屋企时，佢突然转身紧紧咁抱住阿飞，揽到实一实。
第二日嘅天气好潮热。晚上阿飞早早爬上天棚，搭起竹床瞓觉。一阵咁耐，被人喺沉沉嘅睡梦中摇醒，佢一扎起身，系老窦。
“啯个女仔嚟揾你啊。”
落到二楼房里面，咕咕坐喺杠床度，又系以往咁一脸愁容。
“咩事啊，咁夜嘅？”阿飞睇下衣车台个闹钟：11点。
“我想去沙面行下，你陪我去。”
阿飞只好陪佢落街行去沙面，一路上咕咕粒声唔响，阿飞又唔识得讲咩。
夜幕下嘅沙面堤岸，华灯闪闪，情侣双双，珠江水轻拍住堤岸，寂静里面，只有遥远如迷梦中嘅船呜鸣，对岸不停跳动变换色彩嘅霓虹。
喺堤坝嘅石椅凳上，咕咕拥抱住阿飞，喺佢面上亲吻，阿飞从未同人接过吻，唔识得有咩技巧，只感到咕咕嘅舌尖舔过佢嘅脸，佢嘅嘴，佢嘅五官。两人只系亲吻，未嚟得有机会深入讲下嘢，沙面保安员就过嚟清场，因为，已经深夜。
走出沙面，行到寂静嘅十三巷，咕咕又紧紧拥抱住阿飞，面上明亮嘅双眸泪水莹莹，阿飞温柔咁问：“你有咩唔开心啊？”
咕咕无答，将下巴搁喺阿飞嘅肩膀上，良久，耐久、、、、、、小街远处有人行过嚟，佢先好似回过神咁，沙喊咗一声，用手背抹干眼泪：“你几时休息啊？”
“星期五。”
“你休息等我，我嚟揾你。”然后拖住阿飞嘅手，两个人手勾住手往回走。
咕咕讲过听日开始去外地写生三几日。过二日系端午节，荷包蛋，大威，辞差，阿荣，华仔，阿唐，尤榄，阿飞终于约齐到去近郊金沙围度假村游水，烧烤，打麻雀，锄大弟玩餐饱。傍晚时分，天色早早就灰沉沉，端午前每日都落场大雨。佢哋嚟到西场増埗码头坐红星渡轮，大家走上船顶层吹风，江风扑面，乱卷人人头上青丝。轮船喺雨中开去石门方向，哩度宽敞嘅江面水流急速，涛涛浊浪一望无际，比起市区珠江河段辽阔宽广好多，两岸漂泊住晚归停航嘅船只，轮船喺微风细雨里顺水而行，大家都话坐船游河真系过瘾。
一阵间咁耐，红星渡轮“咩”一声长鸣，泊埋咗灯火闪烁嘅度假村。今次嚟玩阿飞本来想邀请埋咕咕去，正式让朋友们认识咕咕，宜家两人各有各，阿飞就放松嗮嚟玩，玩到癫嗮，竟连回程嘅船都错过咗，其他人带上行李上齐船，阿飞仲同辞差两个喺离码头百米左右嘅江面踩水影，翻筋斗。可能系因为节日缘故，有大批游客等坐船过渡，只渡轮船喺码头转咗个圈，长鸣一声就匆匆开走。吓到阿飞，辞差两个喺水中大声叫救命，好在阿唐识得抛个背囊喺码头地面。先至令到佢两个唔使流落喺金沙围，可以有衫着，有钱搭下班渡轮返屋企。
星期五。屋企好静，人人去嗮返工。
阿飞坐卧不安喺房乱惗，唔知咕咕嚟到会点摆布？啯晚喺沙面阿飞生理已经好强烈，佢一次都未摸过女仔，惗起啯晚被吻，真系唔识得反应，点都唔敢点咕咕。等阵上到嚟屋企，阿飞再无籍口亦再无地方可逃避。阿飞决定，咕咕上到嚟以后就喺埋一齐，唔再三心二意。
咕咕无嚟到，以后嘅以后都无再嚟。阿飞亦都无面去揾佢。
离开中央酒店啯晚，唱完《大地》返到屋企，阿飞个心好痛，一种从未有过嘅失落，佢知道系失去爱嘅痛。今次唔识得痛，佢唔得闲去痛，接落嚟好多嘢要去忙，好多嘢要去惗。阿飞要开的士，要揾大钱，要成就自己嘅梦想。
直到好耐好耐好耐以后，耐到阿飞差啲就真系要全部忘记，先惗返起曾经有个女仔为自己剪过秀发，亲吻过自己，佢非常内疚，感到对唔住咕咕，到今时今日佢依然认为自己配唔上咕咕嘅吻。佢从无对人讲起过，因为俾女仔强吻都好令自己掉架，又有损人哋名声。觉得心安理得嘅系无做出对唔住佢嘅事，好高兴自己曾经咁纯真对过一个咁靓嘅女仔，令佢一直怀念，一直怀有对人生美好嘅向往。
