སྨོན་ཚིག་གསལ་ལ་མི་གསལ་ཞེས་བྱ་བ།

གཞོན་ལམ།

ང་ཚོའི་བྲང་ཁོག་གསེར་གྱི་གཞོང་བ་ན།།

དགག་སྒྲའི་འཚེ་བ་གཏན་དུ་ཞི་གྱུར་ཅིག།

དགག་སྒྲས་དག་པའི་ཤར་ལྷོ་ནུབ་བྱང་ནས།།

དབུས་ཀྱི་ནམ་མཁའ་ཉིལ་ཉིལ་འབབ་པར་ཤོག།

ང་ཚོའི་སྨོན་འདུན་ཆུ་དྭངས་ཕོར་གང་ལ།།

ཐོག་དང་གློག་དང་སེར་བས་སྲུང་གྱུར་ཅིག།

ཐོག་གློག་སེར་གསུམ་འཐབ་པའི་བར་མཚམས་ནས།།

གནམ་སྟོང་མཚན་མོ་ཁོ་ན་འཆར་བར་ཤོག།

ང་ཚོའི་ལྟ་ཚུལ་ཀུན་དགའ་ར་བ་ན།།

མེ་ཏོག་དཀར་དམར་ལྗང་གསུམ་འཁྲུངས་གྱུར་ཅིག།

མེ་ཏོག་དཀར་དམར་རེ་རེའི་སྣེ་མོ་ནས།།

གཞན་ཕན་དྲི་བསུང་རྟག་ཏུ་འཐུལ་བར་ཤོག།

ང་ཚོའི་འཚོ་བ་སྤྲིན་གྱི་སོ་མཚམས་ན།།

ཚ་གྲང་སྙོམས་གསུམ་རེས་སུ་འཕེལ་གྱུར་ཅིག།

ཚ་གྲང་སྙོམས་པའི་ལམ་ཁ་བརྒྱུད་ཐེངས་རེར།།

ཚུགས་ཐུབ་རུས་པ་སྲ་མོ་ཆགས་པར་ཤོག།

ང་ཚོའི་རིག་གཞུང་མཐའ་མེད་མཚོ་གཏིང་ན།།

རིན་ཆེན་སྣ་དགུ་ཕྱུར་བུར་སྤུངས་གྱུར་ཅིག།

རིན་ཆེན་ཕྱུར་བུར་སྤུངས་པའི་ཉེ་འགྲམ་ན།།

མགར་བ་མཁས་ཆེན་དུ་མ་འཛོམས་པར་ཤོག།

ང་ཚོའི་མཐུན་སྒྲིལ་གནམ་སའི་བར་ཁྱམས་ན།།

དགག་སྒྲུབ་མེ་རླབས་དམར་པོ་ལྡང་གྱུར་ཅིག།

མེ་རླབས་ཕྱི་ནང་མ་འཁྱོག་རླུང་གི་མདས།།

ཀུན་སྙོམས་ཞི་བདེའི་གཟུགས་སུ་འདྲེན་པར་ཤོག།

ང་ཚོའི་མི་ཚེ་རས་དཀར་དྲི་མེད་ལ།།

ཚོན་རིས་སྣ་དགུས་འཇའ་འོད་བྲི་གྱུར་ཅིག།

འཇའ་འོད་ཟིལ་མས་བརླན་པའི་ཕྱི་རབས་པར།།

དྭངས་གསལ་སྐྱིད་ཀྱི་ཕ་གཞིས་འགྲུབ་པར་ཤོག།

ང་ཚོ་བྱེད་པོའི་རྩེད་ཆས་ཡིན་ཡང་རུང་།།

ང་ཚོ་ལས་ཀྱི་འཕངས་འབྲས་ལགས་ཀྱང་བླ།།

ང་ཚོ་འབྱུང་གཞིའི་འཕྲུལ་ཆས་ཟེར་ཡང་ཆོག།

ཕན་ཚུན་བསམ་ཤེས་ནམ་ཡང་མི་སྟོར་ཤོག།

2017-1-1……༢༡༤༣-༡༡-༣ཉིན།