食肉唔食菜，遲吓重肥呀！

自從絕育之後，奧利奧小姐嘅體重伴隨住胃口天天向上，發展到今日已經超越同場選手屎霸，達到「肚腩大過胸」嘅水平。連獸醫都吩咐「餵少啲啦」，唯有謹遵醫囑，每餐以餵雀噉嘅分量，少食多餐，希望奧利奧小姐早日瘦身成功。

餓到眼坦坦

可惜事與願違，cut分量之後，大食妹餐餐都唔飽，隔兩三個鐘頭就餓到追住我奪命狂呼，或者lead住我一路向佢個貓碗出發。但係……我選擇企硬。

自助餐？食吓食吓就漲㗎啦

人類想減肥有好多方法，行多兩步路，食多兩條菜，但係貓科係自然界最強肉食性嘅一科，而貓作為最純粹嘅肉食性動物之一，食肉唔食菜係天性，想控制體脂均衡唔係餵少兩餐肉食返兩條菜咁簡單。So……對唔住，今晚冇宵夜食。