【幽默】乱噏廿肆13

      阿飞87年嘅计划系刻苦健身锻炼一年，练到手瓜唔起蹍都多几斤肉。宜家9月将过，眨眼就要年底，觉得啲日子无聊虚度咗。决定剩低落嚟啲日子要作更加艰苦嘅最后冲刺，全身心投入到每日早晨嘅大汗淋漓之中，练出健美运动员咁嘅发达肌肉。佢写咗个《博杀健身锻炼计划》贴喺墙上，赋诗一首：

                      莫愁更深夜阑静，

                      休理得失小人鸣。

                      寒冬酷暑未惊过，

                      誓要练出龙虎形。

　当晚电视台播水浒连续剧《武松》，一百零八条好汉“马上林冲，地下武松。”武松系最好打最有血性嘅人物，睇到阿飞热血沸腾：做人一定要轰轰烈烈，不能庸庸碌碌虚度年华做废物！

　做武松唔容易，做废物机会就好多。

　闸坡恩平返嚟打麻雀赌钱就未歇息过，成班人你方赌罢佢约场。阿飞成个月系咁输，有时10文，有时2文，最多输过36文，前前后后夹埋输去120文。但阿飞发现自己喺赌钱面前更加顽强，更有斗志，有武松无所畏惧嘅风骨。啱开头连输几场，有啲惊，输下输下发觉越输越有生命力，逼使你去深究探索输嘅原因，然后每次都燃起好有必胜嘅信心，好有一剑封喉嘅博杀欲念，然后都系惨败收场。然后每次阿飞就会惗：“可能冥冥中有神灵保佑要自己唔好沉迷打麻雀，要自己完成个健身计划唔好半途而废。如果唔系无理由输咁惨嗝，假假哋我阿飞都算得上高手啊。”

　阿飞决定集中精神健身唔去打麻雀，或者尽量减少。但当大威，辞差，阿荣哋过到嚟，人才济济群英会，阿飞又身不能由己，心不能由衷。荷包蛋嘅五金铺头基本就系赌场，每晚灯火辉煌，鏖战连场。上半夜打麻雀下半夜锄大弟，晚晚要么赌到三更半夜，要么干脆通宵达旦。

      哩晚又系一场世纪大战役嘅厮杀。阿飞开头打麻雀未能止住最近连输势头，不单止如此，成晚居然未食过糊，一口气大败亏输咗140文，睇怕翻身无望，血本无归。八圈未打完心情低落，人困马乏想返家瞓了。荷包蛋见佢无嗮瘾，但自己未够喉，打完个西风提议改玩锄大弟。赌钱如人生，哩个系阿飞输钱输出嚟嘅深切体会：“赌钱要么不赌，要赌就永不能认输。”要似韩信咁置于死地而后生，认输意味住真正输。所以做咩事都要坚持坚持再坚持。凡事骄兵必败，哀兵必胜。机会唔会来自希望，成功肯定来自恐慌。锄大弟阿飞手风大顺，有如赌神附体，煞星上身杀到个个裤裆清空，咸鱼翻身银纸返翻嗮嚟，黎明发白之际倒赢200几文有多。其他人都要上班鸡咁脚赶住走，阿飞喺档口打电话返商店请假半天，请荷包蛋，华仔两个老板去白天鹅宾馆饮早茶，打的士来回。啲嘢贵到离谱，八笼点心，三个人只系食得半饱，就用去24文。但能够喺两大个体户面前找数阿飞心情大悦，返到屋企上床心宽体胖好瞓：“健身？年头坚持到宜家差唔多可以啦吧。”

　有日喺商店当班，有个过街小贩挑担入嚟叫卖小饰物，阿飞中意一只做工精巧古铜小龟钥匙扣。自从买咗之后“锄大弟”场场赢，已经连赢三几百，就叫做金钱龟，挂喺个裤头度，赌亲钱都攞出嚟摇。阿荣输得厉害亦去街边搵到只嚟买，赌钱嘅时候亮喺枱上，大声叫嚣：“哩只系我嘅满载而龟。”真系人算不如运损，当场就大败亏输300有多，一气之下将只小铜龟掟出马路，辞差仲想冲出去执，一部面包车驾驶过都唔知去边，大家笑到肚疼。阿飞惗：“宜家个个都赌到癫嗮，越玩越大，赢嚟赢去都系大家嘅钱。最后总会有人无以为继，长期落去可能更加不择手段，仲系好自为之少玩为妙。”

　英姐个仔发高烧，阿飞即刻自告奋勇将自己休息日俾咗佢休，又应承帮佢送报表去公司，因为系英姐负责。阿飞总希望能帮佢做多啲，对佢有一种好亲近嘅感情，好似对屋企人咁嘅感觉，好想听到佢叫自己做嘢。觉得佢对自己实在太好，而自己能帮嘅实在太少。

　几日后两个人当班，将新返嘅货品搬入后边仓库，洗完手。英姐突然提起群群，问阿飞有咩睇法，阿飞唔知佢想讲咩，英姐讲：“我唔中意你两个一齐，你系我细佬，我唔准你同佢行。第啲唔讲啦，农村好穷咖，农村人姊妹又多，以后就够你受。佢把口好厉害，哩种人第日都好巴辣。如果你真系同佢结婚，我事先声明我唔会去饮，你点惗都好，我真系妒忌。不过我会一样咁中意你，我自己同自己讲，我宁愿让我爱你，都唔情愿等佢爱你。”

　阿飞大吃一惊，一下都唔知点好回答，暗暗沉沉细声应：“无，无，无咁事。”

　英姐讲：“我知佢好喜欢你，佢中意你你千其唔好觉得系你自己错啊，你小心啲女仔好会使计咖。听唔听到我做家姐嘅话先？”英姐口气有啲严厉。阿飞即刻一连串：“我无惗住同佢结婚啊，佢个人系有啲铁嘴鸡。”佢唔知道群群为咩咁让英姐讨厌，唔通曾经拒绝过帮英姐要佢织枕席件事？英姐好似话里有话，并唔单止针对群群，好似借题发挥想表达啲咩。阿飞警惕起嚟：“佢做咩嫉妒喜欢我啲女仔？”英姐随即却讲：“你放心，我对你无嘢，当你系我细佬啫。”阿飞怀疑英姐只系嗰种感情丰富，容易对人热情嘅女性，或者只想满足一种自我缺失嘅情感。渐渐觉得两人之间嘅情谊简单明白得嚟，又带点朦胧敏感。佢唔想咁样，佢老公同自己系老友。

　隔几晚两人当夜班，九点半拉门收铺。阿飞鼓咗好耐勇气，先讲得出一直忍咗好耐都想讲嘅说话：“你以后唔好买咁多水果小食俾我，留翻你扐返屋企，我过意唔去、、、、、、”阿飞口疾疾，都唔敢抬起头。未等佢讲完，英姐即刻口齿伶俐就打断佢:“你唔好咁多心，人仔细细，我一直当你系我亲细佬，我就系中意对你好，你可以当我喺傻嘅，我又无抱住咩嘢不纯动机，有好食俾我个仔，就有你份，你唔使过意唔去，你唔中意咩，我都系要咁做咖啦。”阿飞唔识出声，好耐先识讲：“我无话你傻，无唔中意～～～”、、、、、、

　9月底，阿飞接到咗去一德路总公司脱产上课二个月嘅通知。系公司开办嘅一个中级技术人才培训课程，主要针对目前公司年轻店员像阿飞哋普遍学历较低，为公司未来经济改革培养人才。对于阿飞真系个好消息，可以暂时离开工作烦恼嘅商店，面目可憎嘅经理，同时避开同英姐尴尬嘅相处，避开佢火热嘅关怀，佢感到自己顶唔住。