谈谈沪语方言之－－五讲“三字经”词眼（其五）
勒迭个前头，吾已连续撰写过四篇沪语方言“三字经”，继续去讲沪语“三字经”方言，迭是吾写个最后一篇“三字经”方言。
勒上海个各种方言闲话当中，有一种方言闲话，就是数字搭文字个结合体，像沪语方言“3860部队”迭个词眼就是迭能样子个。
对于那些年轻一代个上海人或新上海人，就未必会晓得“3860部队”个含义到底会是啥么事，伊个意思覅仅仅是对那些已经退休个、中老年人个一种谑称，而且还是对维持次序人个一种专有名词。
让吾感到印象顶深刻个一桩事体，到底又会是啥么事？！勒20世纪80年代至90年代初期个辰光，勒上海、勒某些大型公交车终点站，或者讲某些人流量邪气大个公交车站点，就会有一批专门维持公交次序个人员，像迭能一类个人群或个人，侪是由那些退休人员组合而成个，就勒其中，既有男性退休人员，也有女性退休人员，而且迭些退休人员是公交公司个编外人员，迭一类人勒上岗个辰光，还会佩戴一个红袖章，勒红袖章过上头撰写有白颜色个“纠察”迭两个字。
像沪语方言“三翻领”迭个词眼，伊到底又是勒讲一些啥么事？！主要就是指羊毛衫个长领子，上海就是属于湿冷类型个城市，勒老底子上海迭座城市，一到冬天时节以后，就会邪气个寒冷，只为更好个保暖，会穿一件或几件交关厚实个马海毛绒线衫，领子同样也是邪气厚实、交关长个，还需要连续翻三次，更会呈现出三层个厚度。
像沪语方言“笃三三”词眼，伊个意思就是勒讲，某个人看上去就是属于悠闲个样子；覅着忙个样子。勒上海个方言闲话当中，还有一个词眼个意思搭伊是一色似样个，迭个词眼就是“笃悠悠”。
比方讲：爷娘或长辈勒教育读书覅大好个或子女或小辈个辰光，用沪语方言唻讲道：“再过两个礼拜，就是期终考试，侬哪能到今早仔还是笃三三像啥呒介事啦，还只想着白相，功课也覅肯好好较去复习一下，侬读书成绩又覅是顶顶好个，迭能下去哪能唻三啊！”
上段文字意思是讲：侬学习成绩并覅是邪气好，快要到期终考试，侬还只是想着白相，覅肯去复习功课，迭能下去是读覅好书个。
像“勿二勿三”迭个词眼也同样是一句沪语俚语闲话， 勒其中个迭个“勿”则是要拨朗读为“fē”，“勿”字就有“不”个含义勒里向。前头个迭个“二”字则是要朗读成为“ni”，后头个迭个“三”字则是要朗读成为“sai”。像词眼“勿二勿三”，伊个意思到底是勒讲一眼啥么事？！就是勒讲有一类个人或人群，为人处世覅正经；覅正派；流里流气。搭伊相同个同义词有不三不四、搞五搞六……
勒沪语方言当中有一个词眼叫作“勿三勿四”，也可以或写作或读作“不三不四”个，迭两个沪语方言词眼，意思也是一色似样个。像“勿三勿四”迭个词眼搭“勿二勿三”还是有覅大一样个地方个，伊还可以算作是升级个版本，就是讲某一类个人或人群，勒做人做事方面，或多或少是拥有那么一眼眼个迭也覅像那也覅像个，浑身上下侪覅像一个正常人应该有个样子，也是有些不伦不类个，个人个言语搭品格是覅当个，还有眼下作个，覅够正派、覅规范、覅入调。
对于上头个两个沪语方言词眼，让吾感到印象顶为深刻个一桩事体，伊到底又会是啥么事？！迭桩事体就是－－至今为止依旧让吾个记忆始终是记忆犹新个，勒20多年前个辰光，每当吾勒开口讲闲话个辰光，一直侪是存有迭能一种坏习惯，迭个坏习惯就是－－自家勒有些辰光，或勒讲闲话个全过程中，时覅时个就会讲讲沪语方言“册那”迭个词眼，迭也是吾老早个一句口头禅哦！“册那”迭个词眼，伊既是一句沪语方言口头禅，与此同时伊也是属于一句骂人个脏话。
勒某一天，因为吾有讲过迭个词眼以后，就勒辣末生头，吾就拨大吾五岁个亲大哥陆明扇一记耳光，还用沪语方言对吾唻讲道：“吾之所以要吃侬一记耳光，就是要侬魂灵头么生生牢，侬老是欢喜讲迭种勿二勿三勿三勿四个脏话，习惯成自然就是改覅忒个，屋里向人侪是晓得侬个脾气性格个，侬就是属于一个老实本分人，只拨过，侬一旦到勒社会浪去以后，外头人是覅一定会晓得侬脾气性格哦，侬要是一旦勒外头烂讲各种脏话以后，既要拨别人家误会个；还要拨别人家看覅起个；弄勒覅巧还很有可能拨别人家喫一顿生活个；侬与其拨别人家教训一顿，还覅如让吾先来教训侬，让侬去记记牢！”……
上头个一段沪语方言，到底是勒讲啥么事？！意思是讲：侬欢喜讲那些不三不四个脏话，习惯成自然是改覅忒个，家人是晓得侬个脾气秉性个，社会浪个人未必会晓得侬个脾气秉性，一旦讲脏话，既有可能造成误会；还有可能拨外人瞧覅起；更有可能会拨外人教训；侬与其拨外头个人教训，还覅如让做大哥个吾先教侬哪能唻做人。
像沪语方言“看三四”迭个词眼，也可以或写或讲成“看山水”迭个词眼个，侪有相同个意思，伊个意思是讲看别人眼色搭形势。要是讲，有人开口讲某一类个人或人群，是邪气会看三四或看山水个，就是勒形容像迭能一类个人群或个人，勒为人处世之道方面就是属于交关会察言观色个一类人，脑子是邪气活络个，为人交关圆滑。
老一辈个上海人，勒通常情况个下头，会讲迭能个一句沪语闲话哩，曰：“做人嘛，就要会得‘轧苗头’看三四（山水），覅会得轧苗头看大覅出三四（山水）个人，弄到后末来眼扳数要喫苦头！”
上段文字当中个“轧苗头”也是一句沪语方言词眼，伊个意思是讲：察言观色，见机行事，灵活办事，还会无主见个去拍马屁。上头一段文字个意思是讲：凡是呒没眼界个人，必定要去吃大屈个。
像沪语方言“过一过二勿过三”迭个词眼，吾认为伊就是从“事不过三”迭个成语覅断个变化而唻。伊个意思就是讲：同样个事体覅要做三次。广义唻讲同样个事体如果屡屡为之，便会失去新意。
像沪语方言“长三”迭个词眼，伊到底是啥个意思呢？！伊个意思就是勒讲：勒中华民国时期个上海迭座城市，有一种职业就是叫作“高级妓女”，像迭能个一类人，费用也是顶高个，每趟或勒妓院内招待客人时，或出局时，常桩收三块银元个出台费，以此得名。
像沪语方言“三清四绿”迭个词眼，也是可以写作或读作“山青水绿”迭个词眼个，伊个意思就是勒讲：穿衣裳整齐清洁干净。
比方讲：张家爷叔用沪语方言开口讲道：“侬看5号门王家爷叔个尼子，今早仔么穿得唻么三清四绿（山青水绿）！”李家爷叔接下唻讲道：“侬晓得伐，为啥事体王家爷叔个尼子穿得唻是三清四绿（山青水绿），因为今早仔是小王第一趟去拜见丈母娘丈人老头！”
上段文字个意思是讲：张家爷叔搭李家爷叔勒嘎讪胡（聊天），讲王家爷叔个尼子，之所以要拨衣裳穿个干净整齐，侪是因为迭是小王第一趟去拜见女方个爷娘，借此就能拨对方留下一个好个印象。
像沪语方言“颠三倒四”迭个词眼，伊个意思是讲：形容某一类个人或人群，讲闲话搭做事个辰光，有些错乱，呒没条理性个。
比方讲：有人勒嘎讪胡（聊天）用沪语方言唻讲道：“侬晓得伐，为啥事体李家姆妈近抢把讲各种闲话唻，侪是颠三倒四，据吾打听以后侪晓得迭能一桩事体，原唻李家姆妈得勒阿尔兹海默症（老年痴呆症），所以搭大家讲各种闲话个辰光，经常性要颠三倒四！”……迭段文字意思就是勒讲，因为李家姆妈生病，所以讲闲话颠三倒四。
像沪语方言“瞎三话四”[xiā sān huà sì]迭个词眼，伊个意思就是讲：或有某人，或有一些人，所讲个闲话，有“胡言乱语搭说谎”个意思勒其中，还会讲些呒根据个推测搭覅符事实个闲话。
清末民初谴责小说《孽海花·第二回》中迭能唻写到，曰：「聘珠一扭身放了盆子，一屁股就坐下道：『瞎三话四，倪弗懂个。』」
上段文字个意思是讲：侬讲闲话瞎三话四，吾是听覅懂个。
像沪语方言“三不摆四不休”迭个词眼，就是指没完没了。
有人用沪语方言唻搭对方讲道：“侬为啥事体歇歇要就要缠牢缠住我啊？！侬哪能介三不罢四不休来缠牢吾覅肯放手啊！”……
上段文字个意思是讲：侬为啥要没完没了得缠着吾覅放手。
像沪语方言“三脚两步”迭个词眼，伊个意思是讲：某一类人走起路唻是邪气个快，也可以指某人做事体个辰光是交关个迅速。
勒吾个印象当中，家中所有个长辈，走路顶快个还是要数吾个外婆张榴妹哦，伊勒生前个辰光，走起路唻真可谓是三脚两步个，别人走一步路，伊能走三步路，也只有吾迭个外甥可以去赶上伊个。
像沪语方言“勿领盆”迭个词眼，伊个沪语读音为：“fhaklinbhen”，伊个意思就是勒讲：覅买账；对压力、强势、暴力、威胁等就是覅服搭覅怕个。而“三勿领盆”个意思就是讲：某一类个人或人群，为人处世之道，一贯是迭能个，啥个侪是覅害怕个。
像沪语方言“三缺一伤阴骘（节）”词眼，其实就是一个俗语，迭个词眼是搓麻将时个专用词眼，上海人欢喜拨“打麻将”讲“搓麻将”，伊个意思是讲麻将就是属于需要四人一道白相个游戏，只唻三个人缺一个仍白相覅成，拨约个人呒唻，三人白等，有伤阴德。
像沪语方言“搞七捻三（廿三）”迭个词眼，伊个意思是讲：或某人，或有一些人，为人处世就是胡闹、纠缠覅清、会讲昏话。
像沪语方言“老三老四”迭个词眼，伊个读音为：“lǎo sān lǎosì”迭个词眼，覅仅是属于沪语方言，也是属于吴语地区个吴方言，伊个意思就是自以为是、摆老资格个神态唻。勒沪语方言当中，也是拥有一个近义词个，迭个近义词就是“老嘎”（老：lo第三声 嘎：ga 第四声 短音）形容一个人做事仿佛是邪气有经验个样子哦！
为啥事体勒讲方言个辰光，覅去用“老一老二”唻表示自以为是呢？！侪是因为勒中国个古代搭民间，是有邪气多个讲法个，顶主要个一种讲法是讲，要是采用一搭二个闲话，朗读起唻就变得覅大通顺。古代一家有七八个小孩子，老三老四也确实是属于交关结棍个。
像沪语方言“狠三狠四”迭个词眼，就是讲有人勒发一股狠劲。像迭个词眼还是一句形容词，用唻形容某人或某事，邪气凶恶、残忍，或者控制感情，下定决心，或者坚决，或者严厉，或者厉害哦！
有人就用沪语方言唻搭对方讲道：“侬迭只赤佬模子，覅晓得一天到夜狠三狠四点啥么事啊，侬也只拨过是一只洞里老虎而已，蹲拉屋里向么，也只会得欺负老婆搭尼子，到勒外头也只会得欺负三等叫花子，一旦碰着比侬更加狠个人，顿时立刻人就好像是一只煨灶猫一样覅声覅响，像侬迭种男人就是属于一个呒没出息个人！”……
上段文字个意思是讲：真个覅晓得像侬迭种类型个人，一天到夜去发啥个一股狠劲啊，侬勒屋里向，顶多也只会欺负妻子搭尼子，勒外头个闲话，顶多也只会欺负覅如自家个人，要是碰着比自家还要结棍个角色，就覅敢响、覅敢发啥个声音个，就是呒没出息个人。
沪语方言“丢三落四”迭个词眼，伊个读音为：“diū sān là sì”，伊个意思就是形容某些人因为记忆力覅好或粗心而忘事。
像“丢三落四”迭个词眼，伊顶早个出处就是唻源于吾伲国家清朝时期曹雪芹写个《红楼梦》一书中，勒第六十七回就撰写有迭能个一句话语，曰：“俗话说的：‘夯雀儿先飞’；省的临时丢三落四不齐全。”勒上海地区，有覅少个沪语方言闲话，就是唻源于吾伲国家古代个各种文学作品当中个，像“丢三落四”就是迭能样子个。
比方讲：有人勒教育自家家中个或子女，或小辈个辰光，用沪语方言唻讲道：“侬做人搭做事体嘛，千万覅好投五投六粗心大意丢三落四个。做事体搭做人侪是要认真细心一眼眼啊，覅要投五投六丢三落四个，拨大家看上去就好像一只落毛凤一样，还有个就是，侬要是一旦做覅好事体以后，自然而然就要拨人家看笑话，老戆个。”
上面一段文字，伊到底又是勒讲一眼啥么事？！伊个意思就是勒讲：个人勒做人搭做事方面，要是始终侪是急躁、冒失、莽撞而缺乏条理，覅靠谱，还有粗心大意个坏习惯，就要被众人看覅起个。
像沪语方言“小猫三，四只四”迭个词眼，伊个意思就是勒讲：勒人数方面是属于交关稀少搭稀落个，这里拢共就呒没几个人。
像沪语方言“乌勿三，白勿四”迭个词眼，伊个读音为：“wū bù sān bái bù sì”，迭个词眼是拥有多种意思勒里向个。伊个第一层意思就是勒讲：色彩紊乱，是属于覅哪呢分明清爽个。伊个第尼层意思就是讲：形容某一类个人或人群，就是属于肮脏搭邋遢个。
像上头个一个沪语方言词眼，伊就是唻源于明代白话短篇小说集《石点头》一文当中，作者是明代天然痴叟，伊还有另外三个名字，又名《醒世第二奇书》《五续今古奇观》《鸳鸯谱》，勒《石点头·卷三·王本立天涯求父》中就撰写有迭能个一句闲话，讲道：“可怜这清清白白一个好后生，弄得乌不三，白不四，三分像人，七分像鬼。”
当文章撰写到此时此刻个辰光，已经是撰写至末尾哦，吾基本浪向已经拨带有“三”字个沪语方言闲话，通通侪囊括勒其中……
呒没让吾想到个一桩事体，但凡是搭“三”字有关系个沪语方言俚语，竟然会拨吾撰写成为一个系列，吾一口气连着写有五篇。
【备注：①：文章为作者原创；②：第一和第尼张图片是作者自家编辑个；③：各种沪语方言文字图片侪是唻源于网络上头；④：万分感谢原创图片。】
杜老倌侠客居（陆伟）写于2020年11月24日礼拜二夜里向
