ཤིས་ཚིག་ཅིག་གི་ཚུལ་ཏུ།
ཤིས་ཚིག་ཅིག་གི་ཚུལ་ཏུ།
མུན་པའི་གཏིང་མཐའ་ན་དཀར་གསལ་གྱི་ཟླ་བ་གཅིག་མོག་པོར་འཚེར།
ཟང་ཟིང་གི་འདུ་འཛི་ན་སྙན་འཇེབས་ཀྱི་པི་ཝང་ཞིག་ལྷང་ངེར་གྲག
དུས་གསུམ་ལ་སྔོན་མཁྱེན་མེད་ཀྱང་།
དཔག་ཚད་ཀྱིས་རྒྱང་ཐག་རིང་བའི་སྐྱ་རེངས་དེ་བསུས།
རེད་ཡ།
ཁྱེད་ནི་རྙིང་ཚབ་གསར་རྗེ་ཐུབ་པའི་ཕྲ་ཕུང་ཚོགས་ཤིག
ཁྱེད་ནི་སྙིགས་དོར་བཅུད་ལེན་མཁས་པའི་བདེ་ཐང་གི་ན་གཞོན་ཚོགས་ཤིག
ཁྱེད་ནི་ཀློག་པ་པོ་བགྲང་མེད་ཀྱི་རེ་བའི་མིག་ཟུང་གཏད་ས།
ཁྱེད་ནི་དུས་རབས་ཤིག་གི་མགྲིམ་ཚབ་པ།
ཁྱེད་ནི་མི་རིགས་ཤིག་གི་སྣེ་ཤན་པ།
ཁྱེད་ཀྱི་ཀླད་སྙིང་ལ་གང་ཟག་ཅིག་གི་དབྱངས་རྟ་ཚང་པར་ཤོག
ཁྱེད་ཀྱི་སྨྱུག་རྩེ་ལ་ལྷོད་པ་མེད་པའི་རྒྱུག་འདུར་གོམས་པར་ཤོག
ཁྱེད་ཀྱི་ལྷུན་འགྲུབ་ཀྱི་ཚིག་རྐང་རེ་རེར་འོད་ཟེར་འཕྲོ་བར་ཤོག
ཁྱེད་ཀྱི་ཁ་ལས་རླུང་རྟ་གདུང་རྒྱུད་ཅིག་གི་བཞུར་དབྱངས་ལ་ཐིམ་པར་ཤོག
ཀླུ་ཆུའི་ན་གཞོན་རྩོམ་རིག་ཚོགས་པ་ལ་མ་བཟང་བུ་མོས་ཤིས་ཤིག་གི་ཚབ་ཏུ་ཕུལ།
མ་བཟང་བུ་མོས།
ན་གཞོན་རྩོམ་རིག་ཚོགས་པ།
