རྣམ་གཡེང་གི་རྟ་རྒོད་མ་ཐུབ་པ།

དྲོས་ཇ་འཐུང་རྗེས་ནས་རྣམ་གཡེང་གིས་ཁྱེར་ཏེ། ཕྱི་དྲོའི་དབྱིག་ཡིག་གི་སློབ་ཁྲིད་བར་དུ་དུས་ཚོད་ཡོད་ཚད་གར་སོང་ཆ་མེད་དུ་གྱུར། དེ་ནས་གྲ་སྒྲིག་བྱེད་ལོང་ཙམ་ཡང་མ་བྱུང་བར་ཐད་ཀར་སློབ་ཁྲིད་ཞུགས་རྐྱང་བྱས་པས་དགེ་རྒན་གྱི་དྲི་བར་ལན་རྒྱག་མ་ཤེས་པ་སོགས་ཀྱི་གནད་དོན་གང་མང་ལ་འཕྲད། དེས་ནི་དགེ་རྒན་དང་རང་ཉིད་ལ་བརྩི་བཀུར་མ་བྱས་པའི་རྣམ་འགྱུར་ཞིག་ཀྱང་རང་བཞིན་གྱིས་མངོན་ཡོང་། ཞོར་དུ་སློབ་གྲོགས་ཚོའི་སྔུན་ནས་ངོ་ཚ་ཡང་ཉོས་སོང་མོད། དེ་ནི་གླེང་རིན་མེད་པ་ཞིག་རེད། ལན་རེར་འདི་ལྟར་རྣམ་གཡེང་གི་རྟ་ཁ་མ་ཐུབ་པར་དུས་ཚོད་ཡོད་ཚད་རླུང་ལ་སྤུར་འགྲོ་བ་དེ་ཁོ་བོའི་རྒྱུན་ལྡན་གྱི་གནས་སྟངས་རང་ཆགས་བཞིན་འདུག་པས། ནམ་ཞིག་ངན་གོམས་སུ་སོང་ཚར་བའི་རང་གཤིས་མཁྲེགས་པོ་འདི་ཡིས་རང་ཉིད་ཀྱི་རེ་བ་དང་གྲུབ་འབྲས། ཕུགས་བསམ་དང་བྱ་བཞག་ཡོད་ཚད་ཐལ་བའི་རྡུལ་དུ་བརླག་མི་འགྲོ་འམ་སྙན་པའི་འཇིགས་སྣང་ཞིག་ཀྱང་ཚོད་ཚོད་ལ་སྐྱེས་ཡོང་། ཆེས་མ་མཐའ་ཡང་ངན་གཤིས་འདིས་སྐབས་དང་སྐབས་སུ་སློབ་གཉེར་ལ་བར་ཆད་བཟོས་ཏེ་རང་གི་མི་ཚེར་ནག་ཐིག་བགྲང་གིས་མི་ལངས་པ་ཕབ་པའི་ངང་ཚུལ་དེ་དྲན་ན། ཡིད་སེམས་འཁྱགས་པས་བསྡམས་ཡོང་། སྐྱོ་བའི་རླུང་བུ་གཡུག་ཡོང་། དེ་བས་མཚམས་རེར་འུ་ཐུག་ཐབས་ཟད་ཀྱི་ངང་ནས་རང་ལ་ལེ་ལན་མི་འདེད་ཐུ་མེད་དུ་གྱུར་འགྲོ།