ད་དུང་དགུན་ཁ་རེད།

ཙག་རླུང་གིས་གཙེས་པའི་དུད་ཚང་གི་སྒོ་དར

ཉི་ཟླའི་མཆེ་བར་ནས་མཚེར་བའི་ནམ་མཁའ་སྐྱ་བོ

མུན་པས་བཏུམས་པའི་ཁ་བ་དང་དེའི་རྣམ་ཤེས

ཕ་ཡུལ་ལ་བཏབས་པའི་ཁྲག་གི་ནས་འབྲུ་ཡིན་ནམ

མྱ་ངན་དོད་པའི་ལུང་པ་དག་གིས་སྨུག་པ་རུམ་གང་བསྡུས་ནས

རུམ་ཁ་རླུང་ལ་བཟེད་ཡོད

ཟེའུ་འབྲུ་རྒྱས་མེད་པའི་གང་བུ

ཁ་བའི་ཁྲོད་ཀྱི་མིག་འབྲས་ཆུང་ཆུང་ཞིག་སྟེ

དུས་ལ་སླེབས་ཚེ

གཏམ་རྒྱུད་དག་གི་རྨུ་ཐག་དུམ་བུར་ཆད་འགྲོ

སྨིག་རྒྱུ་ལྟ་བུའི་རྒྱང་རིང་གི་འབོད་པ་དག་ང་དང་འབྲེལ་བ་མེད་པ་བདེན་མོད

འུར་འུར་ལྡང་བའི་རླུང་ཆེན་འདི་དག་གིས

སུ་ཞིག་འཁུར་འགྲོ་བར་འཐོར་བའི་མིག་མཆི་དེའང

མངོན་ཆུང་གི་གསང་བ་ཞིག་ཡིན

ས་རུབ་རྗེས

རླུང་གི་ལག་པས་སྒེའུ་ཁུང་རྡུང་མགོ་བརྩམ་བྱུང

དུས་ཚིགས་འདི་སྔར་བཞིན་ང་དང་འབྲེལ་འདུག

ཁ་བ་ད་དུང་གྲང་ངར་དང་འགྲོགས་ནས་ཐོན་འོངས