谈谈沪语方言之－－三讲“三字经”词眼（其三）
勒迭个前头，吾已连续写过两篇搭“三”字有关个沪语文章，还有覅少个“三字经”方言，吾就继续去讲沪语闲话“三字经”。
像“噶老三”迭个词眼个意思就是讲：某个人做人忒骄傲、忒自以为是，认为自家对于各式各样个人事物情，侪是属于无所不知无所不晓类型个，呒没啥个是自家覅晓得个各类人事物情；更可以讲自家还是一个上知天文下知地理一类个人；“吾”更是“一个万宝全书”式个人；倷要是勒俗常生活当中，覅管有碰着哪能个问题搭难题，吾侪是能帮忙唻解决个，呒没吾搞覅定个各类事情哦，还会去认为自家所讲个闲话、所去做个每一桩事体，侪是覅大可能去弄错忒个。
只为能更好个说明迭种情况，就让吾唻列举一个迭个方面个例子。打个比方唻讲伐：就有两个大人闲唻无事待勒一道谈山海经（聊天），其中一个人就先开口用沪语方言唻讲道：“老黄伊拉个孙子年纪么覅大，讲起各种闲话唻，覅要忒‘噶老三老嘎三千’，覅要看伊个年纪只有五六岁往里，迭个小鬼头讲出唻个、各式各样个闲话，就好像是一个老年纪，搭七老八十个大人简直就是一色似样个！”另外一个人也唻随声附和去讲道：“有迭能个一句老古闲话是讲得邪气好啊，叫做龙生龙唻凤生凤，老虫个伲子搭囡鱼侪会得去打洞唻，还有得迭能个一句闲话就叫作‘有种像种’，老黄伊阿是一个噶老三，吾伲搭伊是有得几十年交情个老朋友，伊又覅是从今早仔开始噶个咯，伊从年轻个辰光一直要噶到今早仔，伊个孙子同样也是迭能个！”……
上头个一段沪语方言，到底又是勒讲一眼啥么事？！伊就是勒讲有一个人讲老李有一个孙子，年龄是勒五六岁左右，讲起各式各样个闲话，搭自家个年龄是覅大符合、覅哪能相称个，所讲个、任何方面个闲话，搭那些七八十岁个大人是差覅多、相差覅大个。另外一个就唻讲道，之所以老李个孙子勒讲闲话个辰光会是迭能样子，还是搭老李本人则是一色似样个，有一句老话讲得好，覅是一家人覅进一家门，就因为老李勒年轻个辰光，也同样是迭能样子个，从而就会造成伊个孙子邪气可能就是学老李个样子，从而让孙子也变成迭能个人。
吾还要想去讲讲个一句闲话，伊到底又会是啥么事？！迭句闲话就是－－勒第三段文字当中，吾有使用“老嘎三千”迭个沪语词眼，吾认为迭个沪语方言词眼还是属于“噶老三”个升级版本，意思搭“噶老三”有一色似样个地方哦，也同样是讲有一类个人或人群，勒为人处世之道搭待人接物方面，态度就是傲慢个，总惹人讨厌。
像“十三点”伊个意思就是讲：某些人一旦做起各种事体个辰光，讲起各种闲话个辰光，覅是正正经经搭正正规规个，就欢喜去歪做歪讲，迭种人勒行为处事个辰光，或多或少是有一眼眼个“痴头怪脑”，是邪气覅符合常理个，搞勒覅好还会得展现傻里傻气个味道哩！
【备注：上头一段文字当中个“痴头怪脑”是吴语地区个沪语方言，迭个词汇所要表达个意思就是勒讲有些人属于疯疯癫癫个。】
要是吾伲拨“十三点”迭个词眼调换一下，去忒“点”字，勒迭个“十”字个前头去添加迭个“老”字，就会演变成为“老十三”，伊个意思就是勒讲：某些人是老覅正经个，或者讲，某些年纪一大把、上年纪个各位中老年人，拨任何一个人看到以后，始终会产生迭能个一种感觉，觉着此人覅是一个邪气正经个人，“贼忒兮兮”个。
【备注：上头一段个文字当中，“贼忒兮兮”也同样是一句沪语方言词眼，伊个意思就是勒讲，某人勒做人方面是覅够严肃个。】
基本浪向讲，就勒上海方言俚语闲话当中，“十三点”搭“老十三”迭两个词眼，侪是带有贬义色彩个，侪是勒指某些邪气覅好、覅（大）正经个人，只拨过，也会有例外个情形，还会勒交关亲密个亲朋好友之间去使用迭两个词眼，表示彼此间个关系是邪气要好。
继续打比方讲下去：譬如讲，全国人民侪晓得上海女性是“老嗲个”，伊对自家个先生（丈夫）也是欢喜个，还勒外人面前或表扬或赞扬自家个先生（丈夫），就是覅管覅顾个，还会用沪语方言唻讲道：“阿拉屋里向个十三点（老十三）近抢把有一眼眼老覅正经、老变死勒，讲啥个学洋派，过精致个日脚，还讲每趟进出屋里向个门，勒拉出门个前头、进门以后，相互之间一定要去相一记面孔、打一记kiss，否则覅是迭能样子去做个闲话，其他事体僎是覅去做勒！”……
上段文字当中个沪语方言，到底又是勒讲一眼啥么事？！伊个意思就是勒讲，有一位上海女性邪气欢喜自家个先生（丈夫），讲近抢把自家个先生（丈夫）勒做事体个辰光，就是有那么一眼眼覅大正经，每趟覅管是出门，还是回到自家个屋里向，相互之间侪要亲嘴，要是自家个太太覅答应做迭桩小事体，其他事体伊就覅大肯去做勒。
反之，要是讲男人也同样是交关欢喜自家个太太（妻子），而且还是“深深个热爱着自家个太太（妻子）”，每趟还勒外人面前或表扬或赞扬自家太太（妻子）个辰光，也一色似样就是属于覅管覅顾个一类人，还会开口闭口用沪语唻讲道：“吾本人是呒没啥个大个方面爱好个，就是欢喜一到夜快头以后，咪一眼眼小老酒喫喫，就觉得心满意足岁月静好，近抢把阿拉屋里向迭只十三点女人，也是属于有得一眼眼覅大对头、覅对劲，勒拉老底子是随便哪能也覅允许吾一顿去喫一瓶老酒个，只好去喫三分之一，讲啥么事，现在经济条件好勒，一顿去喫一瓶老酒覅是啥个大问题，要是覅够还好去添加！”……
上一段沪语方言文字，到底又是勒讲一眼啥么事？！伊个意思就是勒讲，有一个男人，是呒没啥个大个爱好个，就欢喜每日夜快头每趟吃夜饭个辰光，喫一眼小老酒，还会认为要是每日侪是迭能唻做，是邪气幸福个一桩事体。只拨过，勒老底子，伊个太太（妻子）规定伊每日夜快头只能去喫三分之一个酒，一瓶酒需要分三天喫光，今早仔个太太（妻子）就是有一眼覅大对头、覅大对劲勒，允许伊每日夜快头可以喫一瓶酒，伊还要是觉着覅够喫，还可以再去添加个。
像沪语方言词眼“弹老三”，伊又拨叫作“抬老三”搭“翘老三”迭个两组词眼哦，像迭能个一种讲法，其实就是对于那些早已经是“驾鹤西去”一类个人唻讲伐，就是属于一种交关覅庄重个讲法，而且勒其中或多或少还是包含有一眼嘲谑死人个讲法勒里向。虽然讲迭个词眼也是属于沪语方言闲话俚语，只拨过，迭个词眼倒是滴滴刮刮是一个外唻个地方词眼，上海滩是一座移民城市，就勒伊发展个全过程当中，还有吸收过覅少其他地区个方言，伊个出处搭源头是从苏州地方引进到上海个，辰光一长久而久之就变成为上海方言闲话俚语。
勒中华民族个传统文化当中，有“天地人”迭能个一种讲法，要是按照迭能个一种讲法，“老三”就是指“人”，迭个“弹”字就可以去理解并解释成为：交关“稀薄”个、“时隐时现”个搭“飘忽覅定”个，几乎可以去讲就是属于呒没啥个实体个。对于老一辈苏州人讲起唻，像“弹老三”勒苏州方言闲话当中，是等同于“徐大老爷”搭“拆老（赤佬）魑佬”个。嘎么，“徐大老爷”又是哪能个一桩事体呢？！苏州方言侪是晓得“老爷”就是拥有另外个一种意思，但凡是寺庙里向供奉个菩萨，侪是拨叫作“老爷头”。关帝庙里向供奉个是“关老爷”，城隍庙里向供奉个是“城隍老爷”，过年要送灶，送个是“灶君老爷”。“魑佬”个“魑”字伊就是指“鬼属”搭“魑魅”，人面兽身四足，借此就可以唻迷惑众人。所以讲，就勒某一种程度上头去讲，“弹老三”是属于“另外一个世界里向个人”。
像沪语方言“三只手”迭个词眼唻讲伐，老一辈个上海人是迭能唻理解并去认为个，对于但凡是那些拥有小偷小摸、欢喜偷人家各种么事个一类个人或人群，侪是欢喜拨迭一类人叫做“三只手”。
勒近抢把个辰光，让吾看到有迭能一则新闻报道，有一位男性小偷拨警察叔叔捉牢以后，而且伊还是属于一个上年纪、年纪一大把个中老年小偷，伊还自称自家就是属于一个惯偷类型个人，要是每日覅去偷眼么事，好像就会缺少眼么事。当警察去审问伊个辰光，侪是坦白出唻，还去讲道：“迭也是吾最后一趟去做三只手，等到吾放出唻以后，从今往后吾再也覅去做啥个三只手，只因为吾伲做惯小偷一类个人，顶顶欢喜做个一桩事体就是－－去偷盗那些铜钿（钞票），还因为对于今早仔个人唻讲伐，自从绝大多数个人侪去使用各式各样个智能手机以后，更因为移动支付个广泛普及，出门个辰光已经是呒没啥个人会去携带铜钿，从而就会造成吾几乎是偷覅到铜钿，只好是下岗歇业，一些高价个手机也同样是覅敢去偷唻调换成为铜钿个，因为里向是有定位系统个，关机也是呒没啥个用场个，覅管手机勒啥个地方，照样是可以去拨定位锁牢勒，还交关容易拨抓牢捉起唻！”……
【备注：①：文章为作者原创；②：沪语方言俚语解释是作者自己编辑个；③：所选择个图片基本上全都是海派艺术大师李守白先生个作品，图片侪是唻源于网络上头；④：万分感谢原创图片。】
杜老倌侠客居（陆伟）写于2020年10月23日礼拜五夜里向
