【幽默】乱噏廿肆21
自从赌注越落越大之后，一班人开始分化，除几个老细级人马其他人唔敢落场。大家消遣就转去附近大排档宵夜，去工人俱乐部对面士多饮啤酒吹水。
3月11日晚，过年后好耐都无聚埋嘅荷包蛋，大头民，大威，辞差，阿荣，华仔，阿飞，阿唐喺带河路高基口荔湾饭店饮夜茶，街坊叫哩度做：西关食堂。阿飞哩晚个肚搞长沙，最近又思绪联翩，就斋同大头民，荷包蛋，华仔四个饮九江双蒸米酒。大头民两杯落肚又吹佢沟女啲威水史，摆嗮同佢上过床各条女啲深浅出嚟。在座都仲系未经性教育文革过嚟青头仔，大头民啲咸湿香艳经历，听到大伙儿雄性勃发睾丸发热，正系淫意沸腾谷精上脑之际，饭店打烊关门。大家点肯善罢甘休，即刻拉大队到对面路边大排档打边炉重拾话柄。点知，话风已转。
“大头民，你教下我点样做，先可以同个女仔去到锡嘴嘅阶段？即系，唔使氽咁耐。”阿荣问好得突然，出乎个个意料，睇佢个样好正经，大家静嗮。华仔执起个啤酒盖掟过去：“啊，你锅锅都搞爆冷啯啵。”
阿荣平日最搞嘢。上次无到饮酒无食到鸡唔见咗部Walkman ，佢心有余悸。
“有无拖到手仔先？拖到手嘅同你出得街搵个静啲嘅地方直接嘴佢咯，嘴得咖啦，斯斯文文循规蹈矩实听排队。”大头民教路。
“但兼队好容易扑崩嘴。”阿飞窒个大佬兼开下玩笑。
“咁你咪斟茶倒水，氽佢喂你奶嘴。”大头民开始醉，讲到顺嗮口。反而阿荣唔似往日咁活泼。
“唔使问啦，最近肯定有女埋身。”荷包蛋察言观色：“讲嚟听下，讲出嚟大头民先教到窍俾你嗝？”其实佢自己都想攞多啲经验。
大家聚睛阿荣。原来佢屋企紧张佢终身大事，介绍咗个在读师范未来老师俾佢，去过几次街喇，搵唔到话题，有啲拿手唔成势。
“多啲带佢嚟同我哋一齐玩锄大弟，咪有共同话题咯。”华仔不怀好意，想借蛋生鸡。
“唔好叼佢哋啫，俾班柒头带坏嗮。”荷包蛋，大威即刻反对，佢两个此刻正在热恋之中。两人随即指点阿荣多同女朋友去电影院睇戏，去下茶座听音乐，去公园僻静处亲热，气氛渐浓就落嘴等常规教程，成班人听两个爱情成功人士即场指导识女仔，个个正矝危坐，神情肃穆，静过开追悼会。无嗮往常嘅嬉笑取闹，反而把大头民晾在一旁。自从表妹情变，佢完全放嗮撇做人，真正将自己彻底解脱，日头喺荷包蛋档口打工，晚上去舞厅同啲年纪大嘅风骚女人跳舞，话系做陪舞，大家真唔知佢系陪舞定系陪瞓。最后大家将正确爱情家庭观转到对立面大头民嘅戏世态度上声讨，大头民被逼得急，叫嚣道：“我发誓以后一世人里面碰上嘅女人都要玩，临老都要入花丛，你哋全部同我听住，最后同我结婚嗰个女人都系俾我玩紧嗝。”大家劝佢惗开啲，做人唔好咁偏激。大头民已经毫无羞耻，居然讲：“你哋啲老婆我都要沟。”讲下讲下已经醉死瞓着，边个叼佢都无反应。见佢瞓咗成班人转而分析表妹点解飞佢，听最新路透社消息华仔讲，果然系因为嫌弃佢好食懒做。
“大头民识表妹时几多岁啊？”阿飞问。
“16，17岁咯，卜卜脆几容易就俾大头民沟到咗。”八卦精华仔清楚度好似佢经手咁。
阿飞分析：“十几岁啲女对爱情充满幻想，充满奉献精神，只要你陪住佢玩就得喇。到咗二十岁开始识惗，思想逐渐成熟，开始变得现实，对你有要求，会识为以后生活着想。佢拖你嘅时候系十几岁，飞你嘅时候系廿几岁，都唔同一个人，宜家飞你好正常啊。既然人哋都搵到第个，大头民就好死条心，脚踏实地做返啲正经嘢，男人大丈夫扐得起放得低，唔好俾个表妹睇死先系嘛。”
全场鼓掌。
哩场深夜“男青年爱情观大辩论”以阿飞豪言壮语激昂陈词结束。大家摇醒大头民齐声谴责，大头民懵鸠盛盛，仲话：“俾我玩多四年女人，四年后改过自新。”阿飞未拖过女，自然未失过恋，今日唔知咩上身讲得咁具学术性。宜家佢亦好醉，深情咁握住个结拜大佬嘅手讲：“大头民，同你一场兄弟，听我讲最后一次，四年后就无改过自新，只有不能自拔。”佢其实知道大头民份人有自己做人嘅道理，对生活有自己嘅睇法，单靠讲系嗮鸠气。惗返自己十几岁又咪咁，以为大家会有难同当，有福同享，好朋友会成日玩一辈子。宜家各有惗发唔同追求，迟早都会好似大头民同表妹咁，你飞起我我飞起佢。
商店里面工资唔高，奖金发唔出，多嘅只有独立核算后公司每月额外补贴嘅11，12文，严重打击阿飞积极性。同陈经理嘅斗争亦无停滞，已经由局部向全面推进。陈经理亦改变策略，不同以往，宜家专门针对阿飞：
一，针对商店有员工认为阿飞系商店年轻有为顶梁柱，就干脆唔使佢做，睇下系咪无你唔得。
二，阿飞提出工作改革，凡以后跟车提货返店卸货后可以落班，提高最劳累嘅跟车提货积极性。宜家唔使佢跟车，其他人睇下边个敢胆落班？咁以后睇你点走？
三，每月补贴分级制。拉大距离，从金钱上对阿飞打击。
四，因为面临公司以后要求民选经理，仲有可能进一步改革，要将商店由员工个人承包。所以佢宜家按时上落班，亲力亲为装卸货物，好收买定人心。对阿飞不理不睬，唔佢同讲嘢，唔叫佢做嘢，明摆要将佢阴干空置。
阿飞喺大经理连环放出几手九阴白骨爪面前一于扮猪食老虎，继续采取欺硬怕软嚟应对：经理好相与就借阶落台，顺佢意工作做下嘢。搵笨柒嘅就迎头痛击：“我系国营职工谁怕谁？佢九十几样唔掂，我就九十几样顶住。”静待其变见招拆招。
阿飞一直努力想厘清同英姐嘅暧昧，曾经试过硬起心肠，都系发觉好难做到。明明想拒绝嘅，一到开口却变成顺佢意，好怕惹到佢唔开心。感觉之间已非同一般，只系心照不宣。商店所有人知道英姐对阿飞好，英姐又好得光明磊落，阿飞却只系觉得喺女性咁柔情嘅攻击下毫无还手之法。明知道咁嘅心态唔道德，但情感嘅本性却无法抑制抵御，都唔知发展落去会点？内心不时意乱情迷，不时自我谴责，感觉真系被人打动咗个心，觉得越来越不安。但有一点佢系非常坚定非常清醒：“两个人无将来，亦脱离现实。”并不是英姐年纪大过佢十年嘅原因，系佢老公同自己系老友，系英姐已经有家庭。佢始终坚信佢哋之间就那么一段友情，清白，纯洁，简单嚟讲就系互相关心已而。
阿飞可以理性分析大头民，却无能力处理自己嘅烦恼。感情总系咁样，好似火唔烧到肉唔识会痛，一旦你有咗感情，先会感到生命里面除咗肉体创伤，仲有咗无迹无痕嘅精神痛楚。为咗唔好俾咁多时间胡思乱想，阿飞除咗健身，有空闲就睇啲著名作品，希冀从新嘅角度理解当前困惑嘅人生，亦同时提高自己阅读能力，顺便学写点对事物嘅认知观感，相应从自己角度评论阅读过嘅名著。
《鲁迅全集》，阿飞系带住睇下鲁迅到底有几巴闭嘅想法去睇，而鲁迅偏偏就系以够胆讲真话，直面痛击时政陋弊著名。对当时中国社会现象针砭精辟，辛辣得毫不留情。十分对阿飞哩挺无名愤青脾胃，一下子就触动佢神经。睇完觉得鲁迅不愧系为中国伟大嘅文学家，思想家，哲学家。从佢嘅作品可以感悟到当时社会嘅悲哀，人民命运嘅悲惨，现实人生嘅无奈。阿飞领悟到好多新观点，识得从新角度去睇问题。鲁迅文学功底深厚，遣词造句新颖独特，自成一格，人物塑造生动形象。就好似《在酒楼上》吕纬甫讲嘅一番话就非常形象：“少年时，睇见蝇子停喺一个地方，俾咩一吓，即刻飞走，兜咗一个圈，又停返喺原来嘅地方，就觉得哩个蝇子实在可笑可怜，殊不知自己也一样出去闯荡多年最后返回家乡，回过头一看也像蝇子一样只不过绕了一个小圈。”哩段话让阿飞好有感触：自己仲可怜，圈都未圈过，一直困喺间死气沉沉嘅商店仔，逃脱唔出女人堆嘅温柔乡。正是：石头解性真吾友，竹子虚心是我师。
